Read Southern Rengma Naga ISAYA 5 Bible Online

ISAYA 5 - Southern Rengma Naga bible

ISAYA 5

¹Nyüshü, ale apvü gü lo a-vain low gen keron lü thyüshü tile: Apvü gü le rincho kazü kegwa aphu ka vain low nme tsübin nyo.

²A-le nnyon tso lo tso aphu jünla; lo vain kegwatsindan pe senshü. A-le tsüdan kekhwen bin jwenshü, lo vain kethün kürun shü, A-le vain kenyen khwen ryü, ai tsüle shonla.

³Tsügenyu apvü gü le hihontse zo bin laso, “Jerusalem lo Juda nyu yhunkebin dan, ale lo avain low joka kemvu shülo.

⁴Ale tsügen thyüshü kezü peha khelale? Tsonlo ale nrin kebin hontse mvuo vain sha keshon nshashüla?

⁵“Tsügenyu ale vain low gen hihontse thyüti; ale a-chwi gü sürhola lo chwi kehun boren la, tson-o tehenthyü dan no tsü kedü lati.

⁶Tehen no yhun pe tsü zeülati. Ale tsü rhon nmvue rhutyü kemvui. Tsünyeki nchara lo tsehü no yhun pe tsü zeü lati. Ale nmha no tsangri pe tsügen shünya lotse khinlatiso.”

⁷Israel tsüle Npugü Kekvutsin gü vain low; Juda temidan tsüle a-le senkeshü vain. A-le anyugun no kegwagü thyükelo nrin, ai anyugun le me dukeshvu tho thyü laso. A-le anyugun no kenjügü thyükelo nrin, ai anyugun genyu kenjü thyükebin nyudan le kenjü gü hio chülo laso.

⁸Nwe thyülo tiso! Kechamvule nle kebin nyekie ka lo low heipe sin binnyo. Thonsari mvutse temi nme-e yhunkelo bin ndilao n-npvü kazü tsügü nyu yhuntiso.

⁹Kekvutsin Npugü le hihontse kezo ale nyülo, “Ka keda kezegwadan hi aphu nrun-o ren lati.

¹⁰Vain low eker tseryü ketsü ka liter tetse nti thünloti. Thatsi khvuda tseryü pe keshü ka khvuda nme nti gvü loti.”

¹¹Hagun we thyülo tiso! Hagun le kenzeü tsü tsü nrün genyu nshwen sola, lo nzeü bin-o tsang zenla kehü genyu.

¹²Hagun keho bin nyu harp, tambourine, khüli lo zu tse le bin hü. Ai Npugü le nyu thyübinyo tsüwe hagun le shamvu,

¹³tsügenyu donyu hontse hagun pvü tinla ti. Tson-o hagun sharhinyu no khünsila lo mijonyu no teri silat.

¹⁴Kesinyu kazü gü le anyugun tyü nyüo a-mün kvu pe keda thyü bin. Lo tsüle Jerusalem nyu kedanyu lo tsünyu a-kenyü kehünyu sin-o nyi lati.

¹⁵Temi aphu kejo lati, lo kemakin kehünyu aphu süshe lati.

¹⁶Ai kekvutsin Npugü le kenjügü thyüo a-keda pe me tesha lo a-temi jünkera kethyü nyu a-kenshün pe hishü hünyo.

¹⁷Tson-o nyida dan nkekela nyu tsü tanyünyudan lo tenyü nyudan le a-nyugun chvülo tyüti.

¹⁸Hagun we thyülo tiso! Hagun le hagun kemu nyu chwilo mvu laso.

¹⁹Hagun le hihontse zohünyo, “Npugü no a-le nyu thyütitse zohüyo nmhen lolo, agun no tsü hyushü nrün genyu. Israel Sunggigü kenshüngü no a-le rhi kebin dan thyü shwilo; nyu le a-nyun ka binyo ngun nrishü tile.”

²⁰Hagun we thyülo tiso! Hagun le gwakemvu pe kegwa letse lo kegwagü pe gwamvü letse kohü. Kezen pe keben sun thyü lo keben pe kezen sun thyü. Lo kekhü pe kenyeü thyü lo kenyeü pe kekhü thyü tse binkela genyu.

²¹Hagun we thyülo tiso! Hagun npvü hagun le thasha letse rüchün-o kelikelu sa hünyo.

²²Hagun we thyülo tiso! Zutsü kekvu nyu! Kenzeütsü pe keri tsülo-o peche lo nshvu mvula kehünyu!

²³Jvüjwe nme genyu hagun le thyüzü kelanyu hoshüla, ai kemu kendi nyu we no a-kenjü hyukelo tson khinla hünyo.

²⁴Tsügenyu npen lo jonyü keri pe mah nyu rola kehü hontse hagun me no tenla lo hagun kepun no rügulao whün sentin lati. Hagun le Npugü kekvutsin, Israel Sunggigü kenshün gü le pe hagun senthyü keshü khekela genyu.

²⁵Npugü le a-temidan gen anyunkhüo shaja petsüla nrün genyu a-ben penso laso. Kazüthun dan sükenu shüti, lo sikela mindan no tha kerhu hontse tsonda nyu khelati. Tsonlae Npugü nyun kekhü le ndila loha, ai shaja pe tsü nrün genyu a-ben keto binti.

²⁶Npugü le tha zansü thyüo senye nithen ki kebin nyu koshüti, kazü keni ki kebin nyu no ryü nrün genyu a-le nrao koti. Tson-o tsüdan le nmhesa ryüti.

²⁷Anyugun nme hokeli nmvue pha nsü loho. Anyugun le nngü nmvue jü mvu. Anyugun senkephin-e rüyho mvu; anyugun phaje rhyüe tüla mvu.

²⁸Anyugun tholevü tsidan le a-ra ntsen, anyugun levüdan kvushü nrün genyu ndobinnyo. Anyugun keru tsenra le tso hontse, lo anyugun kerugari pha le tsangkenbu zero hontse.

²⁹Shüpahüdan le nrape shünyho le nyukhu ten pen-o nho sen-o mele khilo keho binki gükejü hontse.

³⁰Tsü jon le ryülo, anyugun le züda khwen hontse nrasen-o Israel gen tsü ryüti. Kazü higü nri shülo! Kezün lo shekesi nti sele! Kezün le keben gü nyilo laso.