Read Southern Rengma Naga ISAYA 50 Bible Online

ISAYA 50 - Southern Rengma Naga bible

ISAYA 50

¹Npugü le zo, “Hagun kerüchün we ale pechenyu le a-nyu khekela hontse atemi nila letse hüle? Tsonlo, khekela lesü dikila? Nkerüchün we ale nkhipe temi nme le a-nyenyu lope do hontse jwenkehü nyu hontse jwenla letse hüle? Tson mvule, nkemu genyu nle dothyü tinkela gwenzin; nle tejvü gwenkerho genyu nnikela ntile.

²“Nyuthyüo a temi dan le ale anyugun keni titse kegü ka ajo kenimvula la? Nyu genyu ale anyugun ko kethyü ka khin mvula? Ale kvumvu shüo anyugun keniloho ole? Ale ahza nme khishüo zida no sinla lo züri-e no sinla, tsünyu tsehü no zü kendi nyu sila logwa le la.

³Ale tsang-e no zün lao, kesinyu genyu nyun gwamvu kebin hontse la logwa le.”

⁴Aphu so kekvu Npugü le ano zo mvulo keshvu pe a senthyüshü, ano nyun nkhi kehünyu thyü nkoshü nrün genyu. Lonyütsen a-le ano a-senkethyü jo nyülo nyüho shü hünyo.

⁵Npugü le tha shakekho kegwa pe atsüshü, lo ale a-nrenla mvu nmvue a-nrhila mvu.

⁶Ale aseren pvü pe avü kehünyu tsü, anyugun le anshwen, a sakühü jwi lo nsü pe amhun di-e ale tsüdan khin mvu le.

⁷Anyugun le a kemeni-e ale kejo lamvu, Aphuso kekvu gü le ache kehü genyu. Ale amhun kvuo anyugun nyhen hünyo. Ale kemenila kemvui letse shabin,

⁸Sunggigü le akhoka kebin genyu, lo a-le ale njü letse shaloti. peha le pecheo a nmulo gwale? Nnyi kengüo jokekerabin nyu gü tile! A-no kenkhin jodan senryüta!

⁹Aphuso kekvu Npugü le ajün zoti-- tsonlo següle ale mule tse lomon? A nkhin kehünyu aphu tinlati, tsüdan aphu nyu le tyükela phi hontse ndi lati.

¹⁰Hagun Npugü rühvu kehünyu lo a-gogü jo zenkehünyu aphu, hagun le gükehü tson le tsen kezen thyü bin logwa, ai Npugü tenyenlo, lo hagun a-gen binlo.

¹¹Me nke titse tedo rhikehü nyu aphu anyugun le rhikehü dagü nyu che lati. Npugü le a-npvü tsüno thyü lati; hagun le kenjün kethyü ketetsin tenoti.