Read Southern Rengma Naga ISAYA 51 Bible Online

ISAYA 51 - Southern Rengma Naga bible

ISAYA 51

¹Npugü le zo, “Akhwen nyülo, hagun kenilo kenyü nyu, kekeche genyu aki ryü kehünyu. Hagun le chwikeryü tsonye gü, nyu hagun tsokelo tsü rüchünlo.

²Hagun le anyugun gen chwikeryü hagun shübonyu, Abraham, lo Sara rüchün shülo. Ale Abraham kokelo ka a-nyu ndi, ai ale jochüpe a-tsüo a-nyenyu no binlo; lo a-tsipwen no swülobu keho thyü shü.

³“Ale shwikenjün pe Jerusalem lo nkekela rünyi tsügü nyu keyhun nyu hishüti. A-kazü le kesin yatse-e, ale tsü lope chwi thyüla ti. Ale Eden nyu chwi thyükeshü hontse. Shekerhün lo nkenyü no tsünyu binti, lo chekeno lo keshwenlü thyüpe aki shüti.

⁴“Akhwen nyülo, a temidan, ale zokebin khwen nyü shülo; Ale senkethyüjo khipe senyen dan tsü; ajvu dan le keben senryüo tsüdan tsüti.

⁵Ale whütse ryü anyugun kenilo lati; ale kvulo nrün jon gü nni laso. Ale senye dan so kekvu sen ti. Kazü nithen ki kebin dan le akhwen bin; Tsüdan le ano anyugun kenilo nrün nrin-o khwen binnyo.

⁶Tsang dan nrishü lo kazü nyu nrishülo! Tsang dan le mah kekhu hontseo ndilati; kazü le phi hontse renlati, lo a-temi aphu tekhvu temhu hontse sikü lati. Ai ale senryü titse kebin kenikelo gü we kethonthen ti, ale kvukelo le kenithyü la loho.

⁷“Akhwen nyülo, kenjü shakehü nyu, lo a senkethyü jo lope anyunki shü kegwa thyü pvü kehünyu. Mele hagun nshwen lo hagun kemeni-e nshvu nya,

⁸anyugun le tsemeü le tyükela hi hontse ndikelai le! Ai ale kenikelo senryü nrüngü we kethonthen; lo ale kvukelo gü tsüle gwünkho aphu binti.”

⁹So-o, agun cheshülo, Npugü! Nkekvu sen-o agun keni shüta; nduka hontse kekvu tsü sen shülo. Züringi Rahab duthüdurü kelagü tsüle nle.

¹⁰Zida thyü nsin kela gü tsüe nle lo tsünyu tson thyüshü, nle kenilo kelanyu no pfüthülo nrün genyu.

¹¹Nle kenishwilo kela danle shekerhün thyüo Jerusalem tilo ti, shekerhün genyu lüthyü lo sen-o gun ti. Tsüdan le kethonthen anyugun kenyüti, nyun kenjün kethyü lo nyun gwakemvu shamvu tse binti.

¹²Npugü le zo, “Ale nthyü nkoshü kehü güle. Nyuthyüo sila kehü temi nshvu mon, a-le tehen nye yhunthon hü mvule?

¹³Nle nthyü keshügü tsangdan sükhun keshü lo kazü gü binjwen keshü Npugü nmhinla se ole? Nyugenyu nle a-zin tse n nshwen kehü, n nkela titse kebin nyu nyunkenthün nshvuo nkensü bin hü nla? Anyugun nyunkenthün gü tsüle thame nkesü loho so.

¹⁴Dothyü kebin nyue whütse hoshüla ti; anyugun le yhunthon lo tyütsülo kegwa aphu hyuloti.

¹⁵“Ale Npugü, n Sunggigü; ale züda bokennu shü lo a-kentyü no nhoso. Azan le kekvutsin Npugü!

¹⁶Ale tsang dan sükhun shü lo kazügü binjwen shü; ale Jerusalem ka, ‘Nle a temi! Ale senkethyü jope ntsüshü, lo aben pe n ntsen hünyo.’ ” tse zohü.

¹⁷Jerusalem, chon solo! Chon soryü-o solo! Nle shaja honpen gü tsü-o nzeü laso tsüle Npugü le a-nyunthün-o pe nketsü; nle tsü tsükelo ka kezeü kego la.

¹⁸Nme-e ntsontsin nrün ndi, ntemi dan nyu nme nben sü keloi ndi laso.

¹⁹Kenke jünhvu le ngen tsü laso: nkazügü le teri no nkela, lo ntemi le khün bin. Mme n njünkeho ndiso.

²⁰Tsonda aphu quen ka ntemi ju le pesio ketokü bin laso; tsüdan le thyüjen le thyükehünyu joh ka minkelo hontse laso. Anyugun le Sunggigü nyunkekhü kekvu gü sha laso.

²¹Jerusalem temi kenjünthyü kebin ju, kenzeü nyu hontse kezeü kego kebin nyu,

²²Npugü, n Sunggigü le nnopen-o zo, “Ale anyunthün-o pe nketsü honpen gü khilo la tiso. Nle tsüo keze kego kehü zugü tsüsin mvuso.

²³Ale tsügü tsü pen pe n nshwen kehünyu nno tsonda nyu chelao nlope tha nshün kemvu hontse kedü kela nyu tsü lati.”