Read Southern Rengma Naga ISAYA 54 Bible Online

ISAYA 54 - Southern Rengma Naga bible

ISAYA 54

¹Jerusalem, nle nyeginyu nyu kendinyu hontse hü, ai ntsoka we nle sherhün-o lüthyü lo bwenlo gwa. Nle a-nyepvü nyu le a-khehü kemvu nyu nyeginyu nyeki nyu kechon zenlo ti!

²Nle kebin phika gütsü thyü ngolo; a-ron thonkenye shüo dyütun yhen nkolo.

³Nle ntekehun terhi aphu kethün gü loti; ntemi dan le senye kecha le ntsoka nkhensen kebin kazü dan loni lati. Ntsoka khekela nyida aphu temi no swü lati.

⁴Nshvu nya nno keja pfü ni mvuso; nle kemeni nilo hoso. Nle nyegibwen thyü ketse ka keja kemvu tho thyü kehü nmhinla, lo maginyu hontse nyuketsemi tsü shamvu lati.

⁵N nyhunkeshügü le nnyepvü hontse-- A-zan le kekvutsin Npugü. Israel kenshün Npugü le nkeni loti-- a-le kazü aphu so kekvu kesengü.

⁶Israel, nle nyegibwen nyu, a-nyepvü le a-khelao a-nyukenjün thyüsa kehünyu hontsele. Ai Npugü le nkonio nka zo:

⁷“Ale keshanyu jaka nkhela; ai nshwi njünsa tse nzen niloti.

⁸Ale gwünkho keshanyu ka anyuntao rani la, ai kethonthen akeso pe ntesha gun ti.” Nkenilo kehü Npugü le tson zo.

⁹“Noah gwünkho ka ale zü lope kazü kemini mvu sele tse zo. Ntsokae nge anyunta mvuso tse zobin nyo; ale nrho nmvue shaja pe ntsü mvuso.

¹⁰Kazüthun lo rincho dan le nnun lae ale nkesogü tsüle ndila loho; ale nzen-o kengügwa titse kejozenkelo tsü kethonthen zenhüti.” Nso kehü Npugü le tson zo.

¹¹Npugü le zo, “O Jerusalem, keche kendi, kenjünthyü kebin nyida, nme-e nnyun thyü nbwenlo kegwa kendigü, ale tso min ketsen pe nbinjwen nishü lati.

¹²Ale rubi pe ntsokhwen khwen, mah kenshwen hontse tso lope nkhinrun thyü, lo tso min ketsen pe nchwida khwen shülati.

¹³“Ale ntemi senthyü shüti, tson-o gwakenyekelo lo nyunkebwen pe anyugun tsüti.

¹⁴Kenjü lo joketsin kesen le nthyü nko shüti. Nle kenshwenkenyhün lo kenshvu shamvu loti.

¹⁵Segü le nwhen hüyo, a-le azen kegwün sha mvuo thyü hünyo; nzen kega kehü güle che lati.

¹⁶“Ale tegi kechanyu rhenshü, a-le mah thyüo tsünyu teri kanyü chalo hünyo. Ale shüpahü nyue rhenshü, lo anyugun le terikanyü tsü sen-o me dushvu hünyo.

¹⁷Ai teri kanyü nme-e n nthyü loho; nle n nshwen kehünyu aphu jo keni loti. Ale agonyu dan nopen, lo kvukelo pe tsünyu tsüti.” Npugü le zo laso.