Read Southern Rengma Naga ISAYA 55 Bible Online

ISAYA 55 - Southern Rengma Naga bible

ISAYA 55

¹Npugü le zo, “Teri kehünyu aphu no ryülo-- hiki züle bin le! Ryülo, pisa kendi nyu-- shye hei tyülo! Ryülo! vain zu lo nyüzü heilo-- nle tsü min thyü loho!

²Nyuthyüo ketegvülo hü kemvu hon genyu pisa nke bin mon? Nyuthyüo njongwen-o nnyon bintila? Akhwen nyüo akezo thyüta, tsonlo nle ketyüketsü kegwatsin hyuloti.

³“Atemi dan, akhwenyüo aki ryüta; aki ryülo, tsonlo hagun le kerhün hyu loti! Ale hagun zen-o kethonthen genyu kejozen lo ale David ka zokenjü jochüdan pe hagun tsüti.

⁴Ale a-no senye dan sharhi lo tsonketsin gü thyü, lo a-gen akekvu pe anyugun hishü.

⁵Ntsoka nle senye kechadan koshü; anyugun le gwüngwa nsha mvu, ai anyugun le nzen-o kerhünla titse tinryü lati! Ale Npugü, n Sunggigü, Israel kenshün Sunggigü, ale hidan aphu thyü shüti; Ale kerhvu lo zankechwi pe ntsüti.”

⁶Npugü ki rani ryüo a-ka hilo, a-le kho nni ketseka.

⁷Serikemvu nyu no anyu keyhun jvü khela lo anyu kerüchün dan kelulo. Anyugun no Npugü, ngun Sunggigü ki rani ryülo; a-le shwinjünsa lo nmhen-o kemu jüshü ti.

⁸Npugü le zo, “Akerüchün le hagun kerüchün hontse mvu, lo atson dan le hagun tson zen-o kekho le.

⁹Tsang le kazü nye tetso kethyü hontse, atson lo a kerüchün dan le hagun nyeki tetso kvule.

¹⁰“A jo dan le khütso lo tsangkenri kazü ntsen titse tsangge tsü keryü hontse le. Tsüdan le thatsi no tsülo, lo thatsi lo ketyüketsü khishü hü.

¹¹Tsühontse ale kezo jo-- tsüle a tharhi thyü mvula loho; lo tsüle ale thyü lotse keshü aphu thyüti.

¹²“Nle n kenyüo Babilon nkenlo; lo nyun bwenye tse nzen-o nyida gü nken lati. Kazüthun lo rincho dan le sherhün-o lüthyü, lo senbin dan le anyugun kenyüo senti.

¹³Ntsoka nchora le kebin bin nyu supress sen; lo murtel sen le tsehü bin nyu yhunti. Tsüle kethonthen bin nrün zansü nme, lo tsüle, Npugü ahigü le thyükeshü tho rüchün nikelo thyüti.”