Read Southern Rengma Naga ISAYA 56 Bible Online

ISAYA 56 - Southern Rengma Naga bible

ISAYA 56

¹Npugü le a-temi dan ka zo, “Ketsin lo kenjü tho thyülo, kechamvule ale whütse hagun kenilola tiso.

²Ale jochü pe a-zintse Sabbath jon zen lo tsü bonrhula kemvu nyu tsüti.”

³Tesin kechanyu Npugü temi zen-o kerhün kelanyu no hihontse zonya, “Npugü le ano a-temi zen-o rüshvu kemvui le.” Pechenyu a-tsigwen kelanyu, a-le a-nyu hyu kemvu genyu Sunggigü temi thyülo kemvui sele tse rüchünlo shvu.

⁴Npugü le tsü hontse kethyü nyu ka zo, “Nle a rühvuo Sabbath zen, akenyü tho thyü lo nnyun ketsin thyüo ale kejozenkelo then hü yatselo.

⁵nnyenyu le kebin nyeki-e nzan no akershvuka nyu lo atemi dan nyu binthon ti. N-nmhinla loho.”

⁶Npugü le tesinkecha, a-temi thyülao a-so lo a-lothyü, Sabbath zen lo nyunketsin thyü a-le kejozenkelo then hükelanyu ka zo:

⁷“Ale hagun zen ryüo a rincho kenshün, Zion kishü, a kehi kanyu shekerhün pe hagun tsü, lo hagun le rotho thyüpe a kershvubin gen keshü dan-e loshüti. A kershvu ka lope senye aphu genyu kehika letse koti.”

⁸Kekvutsin Npugü, a-temi Israel me rünyi ki tinkela nyu zenkeryügü le temi kechae zenryüo anyugun sinti tse zo njü.

⁹Npugü le tesin kechaki senye dan no tehenthyü hontse ryüo a-temi dan nkela lotse zolaso.

¹⁰A-le zo, “A temi dan ka petsü binlo tse zoshü nrün sharhi aphu yhü le po laso! Anyugun le thame shalo mvu. Anyugun le khun kemvu ka kekhwen tehi hontse le jüo a-min nmin kehü gwün zin. A nyugun le jü kvuri laso!

¹¹Tsüdan le tsenkeshvu hi rünyun lohü kemvu hontse. Sharhi hidan le thame sha kekholo hümvu. Anyugun aphu anyugun kenyü lo kechwigü nti fü bin laso.

¹²Kenzeü nyu hidan le kenthon-o, ‘Ngun zu peha fülo-o, tsülo kegwathen tsülo tile!’ Senduki le nthu nyeki gwakvu kethyüi le!”