Read Southern Rengma Naga ISAYA 57 Bible Online

ISAYA 57 - Southern Rengma Naga bible

ISAYA 57

¹Temi kegwanyu le silae, mele shamvu nmvue rüchün mvula hünyo. Ai anyugun we silo kenke le anyugun gen ryülo hoso.

²Kegwa thyüo yhun kehü nyu le kesinyu kebwen lo rüyü tinla ti.

³Ai hagun kemunyu, hagun jo kera nrün genyu, ryülo! Hagun we temvunyu, keyülanyu, lo keyüla chün ketyünyu nyeki gwakvu mvule.

⁴Hagun le segü zope keyü thyühü nla? Hagun kenkunyu segü shwinyü hü ola?

⁵Hagun le nrho kenjü senbin pha ka thyümi kenyü tho thyüo kenya tero rüshvu hünyo. Hagun le rinyu zhe khoka tsonye kü nyu hagun nyenyu dushvu pe rüshvu hünyo.

⁶Hagun le tsünyu tsokenshwu khilo-o pe tero hontse rüshvu hü. Hagun le zu ja pe tsüdan rüshvu lo shye kershvu tho thyü pe tsüdan tsü hünyo. Hagun we ale tsühontse kethyü nyu a kenyühü letse bin le?

⁷Hagun le kazüthun ketetso ki küo hagun thyümi kenyü thyü pe rüshvu hü.

⁸Hagun ka khenpvü nyuzin teromen pe zansü nme thyü njü hü. Hagun le akhela; hagun phi yhünlao hagun sonyu zen-o no keda gen kügü jü tinla hü. Tsügenyu hagun kenyügü thyü hünyo.

⁹Tharün kenyi lo terzü pe hagun nyenlo-o tero molek rüshvu titse güla hünyo. Teronyu füo rüshvu nrün ge nyu hagun le lilonyue nipe nithen ki, kesinyu kazü keti-e shühü.

¹⁰Hagun tero kecha füo hokeli hü, ai khela hü mvule. Hagun le teromen zansü dan tsü kenko khipe hagun tsü hü nle tse rüchün-o hagun tson rüzila hümvu.

¹¹Npugü le zo, “Tero hidan le dihontse kethyü letseo hagun le nshvuo aka nku lo a nmhinla hü nla? Ale matse binthon kelagenyu hagun le a rühvu mvula sele?

¹²Hagun le thyükehü gü tsüle njü letse hü, ai ale hagun tho pe ndolao hagun teromen dan no hagun chemvu lati.

¹³Hagun le kekeche hi kethyü ka hagun teromen dan no hagun keni shüta! Tsangkenbu nme le tsüdan whensen tinkelai. Ai atenyen kehü nyu we no kazü hinyu yhun-o a kershvu kanyu a rüshvuti.”

¹⁴Npugü le zo, “A temi ju no aki rani ryü lalo. Anyugun tson kekhin aphu khila! Tsonda thyüo ndo lolo!

¹⁵“Ale ketetso lo kenshün Sunggigü, kethonthen kehügü le. Ale ketetso lo kenshün binki hü nyo, ai tsenyo lo a-nyun kelu-o yhunkehünyu no ketenyen lo sidyü hyunilo nrün genyu tsüdan-e zen-o bin hünyo.

¹⁶Ale kerhün khipe atemi tsüshü, lo ale a-zintse anyuntao anyugun nkhin bin loho.

¹⁷Anyugun kemu lo tsenkeshvu genyu ale anyuntao shaja pe anyugun tsüo khela. Ai anyugun nyunrüo anyugun tho gü thyübin gwünzin.

¹⁸“Ale anyugun tho hyu laso, tson-e ale anyugun thyü ngwa shü lati. Ale anyugun tson rio anyugun che shü, lo nyungwa mvu kebin nyu nyun thyü nbwen shüti.

¹⁹Ale nyun kebwen pe akhoka kebin lo nithen ki kehü aphu tsü hü! Ale a temidan thyü ngwa shüti.

²⁰Ai temi gwakemvu nyu we matse bin hü kemvu zida a-kentyü le sun tinla mvuo nshün kemvu lo dyükenta chün pfüryü kehü hontse.

²¹Kemunyu genyu we thame nyun kebwen ndi,” Npugü le zo.