Read Southern Rengma Naga ISAYA 58 Bible Online

ISAYA 58 - Southern Rengma Naga bible

ISAYA 58

¹Npugü le zo, “Sen tetsolo kegwathen senshülo! A temi Israel nyu ka anyugun kemu pe zoshülo!

²Anyugun le atson shalo lo ajvü zen nyü bin letseo khenyütsen arüshvu hünyo. Anyugun le ano tejvü kenjü dan pe anyugun tsü lo akershvunyu anyugun kenyü letse zohü nyo.”

³Temi dan le ketso-o, “Npugü le shahü mvulo nyuthyü le tseo nyen bin mon? tso zohü nyo. A-le tsü swümvulo nyuthyüo tyütsü mvu bin tila?” Npugü le tsüdan ka zo, “Ketsin güle, hagun le nyenkethyü ka hagun kechwi gü füo hagun lokethyü nyu nshwen lahü.

⁴Hagun le nyen kethyü ka hagun jvu gwamvuo ketsin kega hünyo. Hagun kerüchün le kenyen hihontse kethyü nyu ano hagun kehi nyüshüti ado tse hüle?

⁵Hagun le nyenkethyü ka kenjün thyüo hagun pe no jonyü hontse nkhünla, lo ronphi pe lashüo jonbü gen yhon bin hü. Hagun tsühontse kethyü lope kenyen letse hüle? Ale tsü hontse kethyü nyu akenyülo ti ado tse hüle?

⁶“Kenyen hihontse kethyü le akenyüle: Me kenshwen ron lo joketsin senkemvu gundakekhen dan shwülao kenjünthyü kebin nyu no rüyülo.

⁷Nketyüketsü pe nnyon kehünyu kenjün tyülo, lo nka khinshe pe ka kendinyu tsü, lo phinya lope kenyhün nyu nbenshü, lo nshvunyenyu che mvula nya.

⁸“Tson yatselo akekenyü le lonyü yhüko keben hontse hagun gen benshü lo hagun tejün shvu dan no whütse gwalo lati. A-zin tse hagun zen-o hagun keni shüti; akekvu le hagun hunpfü bin ti.

⁹Hagun le hilo hagun jo keni shü. Hagun le ako shülo ale hagun keni shüti. “Hagun le mekenshwen, metsin kethyü lo gwakemvu kezo khela;

¹⁰ketyüketsü pe nnyon kehünyu tsülo, rhokedyü nyu shwenshwi lo; tsonlo kezen hagun hunpfü kebin dan tsüle kelupe nhennyu hontse lati.

¹¹Lo ale a-zin tse hagun tsontsin lo tha kegwa pe hagun no ketegvuti. Ale hagun no kvu lo gwa binti. Hagun no zü kechon le kebin chwi hontse, lo tsunthüla hü kemvu zükenthün bin hontseti.

¹²Hagun temidan le nduka nke kela, thyüni, lo binkegwa when gen thyüni küti. Hagun lope chwida bonshvu kela khwenikelonyu lo ka kechakela thyü nikelonyu le tseti.”

¹³Npugü le zo, “Hagun le Sabbath jon kenshün zen lo tsü nyü hagun kechwigü thyü tinla mvu yatselo; hagun le akenshün jon rüchün tetso, lo tsü rühvuo tsünyü njwen mvula, thatho thyü mvu, nmvue jo zozü kemvu zomvu yatselo,

¹⁴hagun le alokethyü genyu shekerhün hyu loti. Ale kazü aphu no hagun rühvu ti, lo hagun no ale khipe hagun bon Jakob ketsü kazü nyu hagun kenyü loti. Ale Npugü, ale tsü zolaso.”