Read Southern Rengma Naga ISAYA 59 Bible Online

ISAYA 59 - Southern Rengma Naga bible

ISAYA 59

¹Npugü le kvumvu sao hagun kenilo ho nmvue a-nyetin rügü rilao hagun le keche kehi khwen nyülo mvu letse rüchün nyalo!

²Tsüle hagun kemu dan genyu a-no hagun khwen nyü mvula hü. Hagun kemu dan npvü hagun le Sunggigü rüshvu titse keso ka hagun sükho la kehü gwünzin le.

³Hagun le kenku nyu tha gwakemvu kethyü lo me dukeshvu nyu tsü thyü zü laso.

⁴Hagun le jokera nyu güe hagun kenjü hyulo mvu. Hagun le jokera nyu kvulo nrün nku hü nyo. Hagun le me kecha titse tedo rhi hünyo.

⁵Hagun le tedo gwakemvu rhikehü dan tsüle peri kerhu zü hontse le. A-zü ka shülo peri le chwiryü hünyo. Ai hagun tedo dan we hagun genyu thame kegwa thyü shü loho-- tsüdan le kenterokaron hontse a-min ndi!

⁷Hagun le a-zintse gwakemvu rhi lo tsü khwenlokeho thyü hünyo. Hagun le kegwanyu dushvula nrün hümvu. Hagun kegübin aphu nyu tha nke lo kecha kela la kvuri,

⁸hagun le kebin ka we nme bin lo mvu. Hagun tho kethyü aphu njümvu. Hagun le tson njükemvu then lo tsütson then kehünyu nme nyun kebwen sha mvu.

⁹Temi dan le zo, “Ntsoka we nyu genyu Sunggigü le agun nshwen kehünyu ben nyu agun kenilo mvu hüyo shalaso. Agun le keben nyu tsonchükelo nrin ai kezün ntila,

¹⁰lo agun le yhükeponyu hontse keseü hü. Nhenyue khejegwen hontse agun pha nsü, kesinyu kazü kezün ki kehü hontse.

¹¹Agun kershvu pe agun tson rüzila. Sunggigü no agun nshwen nyhün lo thyüzükehünyu ben nyu agun kenikeshü khwe bin, ai thame thyü mvu.

¹²“Npugü, agun le nmhundyü nyu thyüzü sa laso. Agun kemu le agun nkhin bin laso. Agun le tsü aphu shapetsü bin nyo.

¹³Agun le n nren, nkeni lo nsithen nyümvu laso. Agun le me nshwen tinlao nkipon rani laso. Agun kerüchün le ketsin mvu lo agun joe nku.

¹⁴Joketsin gü temi dan nyu pha nsüla, lo kenjü gü le agun kho nnilo mvu laso. Ketsingü le temi dan nyu ndi laso, lo joketsin kesen le a-bin ndi laso.

¹⁵Joketsin kezo nyu rhori kela genyu gwakemvu kethyü nyu a-kekhe kelo nyu le thyüzü kehü hontse laso.” Npugü le tsü hyu, lo ketsin kesen ndi kela genyu a-kenyü mvu laso.

¹⁶Nme-e mele nshwen kehünyu keche kelo min hyu mvu kela genyu a-le a-dun thyüla. Tsügenyu a-le a-npvü a-kekvu nyu tsüdan kenishwi shüo kvulo lati.

¹⁷A-le ketsin kesen pe teribola hontse lo kvukelo pe tegi peren hontse pvü loti. A-le shaja pe njü kemvu nyu temi no kenjünthyü kela nyu khün lo-o tha thyü kenjü la nrün genyu kenko khiben lo lati.

¹⁸A-le a-shwi kerüchün dan tho kendyü ka shaja pe a-nyugun tsüti, tsüle kazü nithen ki kebin nyue.

¹⁹Nphozin gü nkhün keti temi aphu a-kekvu keda nshvuti. A-le züri zü keda lo tsangkenbu kekvu hontse ryüti.

²⁰Npugü le a-temi ka zo, “Ale Jerusalem nyu ryüo hagun nokhinlo lo kemu nyu ranikelonyu aphu keniloti.

²¹Lo ale hagun zen-o kejozen bin nyo: ale akekvu lo senkethyüjo pe hagun no kethonthen hagun hon thyü lotse khishü laso, tsügenyu ntso ka genrho hagun le ajo zen lo tsüpe hagun nyenyu ju nyenyu dan no kenthon zen hü lotse senthyü shülo.”