Read Southern Rengma Naga ISAYA 6 Bible Online

ISAYA 6 - Southern Rengma Naga bible

ISAYA 6

¹Uzzia rajagü le sikethyü chen ale Npugü hyu. A-le rajakhün ketetso nme gen dunlo a-mirün le kershvuka swübin.

²A-kho lizin hizin rhün kehü nyukhu dan le sobin, nme le a-sekin tseroro. Anyugun aphu a-sekin kenyhun pe a-mhunsun, kenyhun no a-min jeü, lo kenyhun no nyehü.

³A-nyugun le khinyunyu ka hihontse zobin: “Kenshün, kenshün, kenshün! Kekvutsin Npugü le nshün! A-zankechwi gü le kazüe swübin.”

⁴A-nyugun kenra khwen le kershvuka kasin-e pvü kenila, lo mah kekhu le Kershvuka süla.

⁵Tsüka ale hihontse zosola, “Ale thamvu so! A we thyülo tiso, kechamvule ajo kezo aphu kemu nti, lo ale kemujo nti zokehü dannyu yhunhü laryü. A npvü ayhütyü pe kekvutsin Npugü Raja gü hyula sele!”

⁶Tsüselo nyukhu tsüdan nme le Npugü kershvubin nyu magi kenhon tseü sen-o aki tsüryü.

⁷A-le magi kenhon tsüpe amüntse kesüshüo aka hihontse zo, “Hile n müntse kesüshü laso, lo n kemu dan le ndi laso, n kemu aphu jülaso.”

⁸Tsüsika Npugü le hihontse zokebin nyü, “Ale segü nishü mon? Segü le ngun lilo thyü tila?” Ale hihontse kenishü, “Ale gü tile! Anishü lo!”

⁹Tsügenyu a-le ano güo jo higü lope temi dan tsü shülo tse shü: “Hagun le nyüzin bin-e shalo kemvui. Hagun le nribin-e nyuthyü bin yo shaloho.”

¹⁰Tsüsika a-le aka, “Temi hidan nyun no pinla, anyugun nyetin no rügüla, lo anyugun yhütyü no po lalo, anyugun no hyu mvu, tsemvu lo shalo mvu nrün genyu. Anyugun le hyu, nyü lo shalo-o aki ryüo gwalo lalo kenshvu genyu.”

¹¹Ale hihontse ketso, “Npugü, dithen lakhi hihontse tila?” A-le zoni-o, “Nyida dan nkelao nrunla kemvuthen--kanyu meno yhun mvula--lo kazü gü khipe nrun la kemvuthen le, tsonshü.

¹²Ale temidan nipe nithenki shülao kazü gü nyu meno yhun mvushü lati.

¹³Temi tseryü ka nme le tsünyu bin-e nkelati; a-no teshobin phenkelatun hontse lati.” (A-tun tsüle Sunggigü temi keshün yhun ni nrün kon.)