Read Southern Rengma Naga ISAYA 60 Bible Online

ISAYA 60 - Southern Rengma Naga bible

ISAYA 60

¹Jerusalem, so-o yhüko hontse benshülo; Npugü zenkechwi le ngen ben bin laso!

²kezen le senye kechadan sun lati, Ai hagun gen we Npugü keben le binti; A-ke kekvu kebengü le nzenbinti.

³Senye dan le nkeben kho nni ryüti, Lo raja dan le n jon keshün gü le benchwi ryü kejü gü ki ryüti.

⁴Hagun tekho nyuthyü binyo nrishülo: N temi ju le ka ki ryüla titse kequen bin laso! Nnyu peche dan le nithen ki bin-o ryüti; Nnyu tenunyuju le ntsenyu hontse mele anyugun penti.

⁵Nle tsü hyukeshü ka nsherhün sa lati; Nkenyüo ndün soti. Senye dan kenya sen-o nki ryü; Lo Züda pere kipon anyugun kenya le nki ryü lati.

⁶Midian lo Efa kipon ut danda le nki ryüti. Anyugun le sheba kipon suna lo rünkegwa sen-o ryüti. Anyugun le Npugü le thyükeshü jolokegwa zoti!

⁷Kedar lo Nebaioth tanyü aphu pe kershvu thyü titse sen-o nki ryüti. Lo pe Npugü kenyü thyü nrün genyu pe kershvubin gen rüshvuti. Tson-o Npugü le hi mhundyü nyeki a-ka no zen kechwi thyükvu shüti.

⁸Nmha hontse tin, Lo nsu le kaki ryü kejü hontse tsüle nyula?

⁹Tsüdan le kazü nithen ki zürun dan, Sunggigü temi dan pfüo ka ki ryüjü nyo. Tsüdan le rakagi lo suna pfüryü jü nyo, Npugü Israel kenshün Sunggigü zan rühvu nrün genyu, A-le senye aphu no a-temi rühvu lotse laso.

¹⁰Npugü le Jerusalem ka zo, “Sinrünyi kecha dan le nchwida khwen niti, Lo anyugun raja dan le nlo thyüti. Ale anyuntao shaja pe ntsüshü, Ai ntsoka we ale kerhvu lo shwikenjün pe nhishü tiso.

¹¹Nhenyu lo kheje-e nkhinrun le khinshe binti, Senye raja dan le, Anyugun kenya sen-o nki ryü nrün genyu.

¹²Ai nlothyü hü kemvu senye dan we Nkeshü lati.

¹³“Jerusalem, nthyüni nrün genyu Lebanon chün nyu senkegwatsin dan, senhü, Juniper lo supress sendan pfüryü ti. A kershvuka thyü kezegwa sa, Lo nyida gü thyüpe gingvü la nrün genyu.

¹⁴N nshwen kehü nyu nyenyu le ryü Nkhün-o kerühvu pe ntsü ti. Lo gwüngwa ka nsüshü mvu kela nyu aphu n pha ka n rüshvuti. Anyugun ben lope, ‘Npugü Nyida gü,’ lo ‘Israel kenshün Sunggigü Nyida Zion, letse koti.’

¹⁵“N keli la nmvue n ntsü lao, Nno mele khelao yhun mvu kela nyida hontse mvuso. Ale nno gon lo zegwao Kethonthen shekerhün bin nme thyü lati.

¹⁶Nyeginyu le a-nyu nucha kehü hontse Senye raja dan le nleyiti, Lo nle, ale Npugü, nkenilo, Lo Israel nyu kekvutsin Sunggigü le nkenishü letse shaloti.

¹⁷“Ale Lazo sunka suna, Tegi lo tesen sunka rükagi lo lazo, Lo tso sunka tegi senryüo ntsüti. Nso kedanyu le n nshweni lohoso; Ale anyugun no ketsin lo kebwen sen-o keda thyüti.

¹⁸Gwakemvu kethyü khwen nyü ni loho; Kenke no nkazü kenjün lohoso. Ale chwida hontseo hagun nolo ntsen loti; Ale hagun kenilokela genyu hagun le a shwenti.

¹⁹“N henyu yhüko no n keben thyümvu, Nmvue sheh no khejegwün n keben thyü mvuso; Ale Npugü, ale kethonthen n keben gü thyüti; A zankechwi keben gü le n ge ben shü ti.

²⁰N nyun gwakemvu jondan tsüle keni thyü lati. Ale Npugü, ale kethonthen n keben gü thyüti, Tsüle yhüko lo sheh nyeki binthon kvuti.

²¹N temi dan aphu kenjügü thyüti, Kethonthen kazü gü tsü loloti. Ale tsüdan thyü lo pe senshü, A keda pe aphu hishü nrün genyu.

²²Ndanyu kami kerho lo ketsenyotsin-e Senye keda kekvu hontse lati. Gwenkho gü le ryülo, Ale tsüno whütse thyü lati. Ale Npugü le!”