Read Southern Rengma Naga ISAYA 61 Bible Online

ISAYA 61 - Southern Rengma Naga bible

ISAYA 61

¹Aphu sokekvu Npugü le a-kapu pe a kesü thyüshü. A-le a kejülo-o a nishü Ano jolokegwa senryüo rhokedyü nyu tsü, A-nyukenjün kethyü nyun thyü nbwen shü, Khishwikeshü jolo pe donyu ka zoshü Lo hoshükela pe dokanyu kebinnyu ka zoshü nrün genyu.

²A-le ano Npugü le shwikerüchün nyu so kvulolao Gwenkho le ryüla sele tse zoshü nrün genyu a-le a nishü. Tsünyü Npugü le a-temi kenilo lo anyugun shwikerüchün nyu so kvu loti. A-le ano anyugwamvu kehünyu aphu nyun thyü nbenshü lotse anishü.

³Nyunkenjün kethyü sunka shekerhün lo kenyü kethyü Nyungwa kemvu sunka keshwenlü pe Zion nyu chükebin nyu tsü nrün genyu. Anyugun le Npugü le senkeshü senbin hontse lati. Anyugun aphu kenjügü thyüti, Lo Sunggigü le thyükeshü thodan genyu mele a-shwenti.

⁴Nduka nkekela nyida dan tsü anyugun le thyüni loti.

⁵A temi dan, Sinrünyi nyu le hagun lothyüti. Anyugun le nsenru dan shwi loti N low tsü lo n vain chwi ntsen loti.

⁶Tson-o hagun lope Npugü peshükedanyu, Ngun Sunggigü gonyu letse shaloti. Hagun le senye dan kenya sen-o sherhünti Lo tsüdan le hagun hon letseo hagun sü thyüti.

⁷N keja kepfü lo n kemeni le ndi laso. Hagun le hagun kazü nyu yhunlo, Hagun kenya le chon kvu; Lo hagun shekerhün le kethonthen bin ti.

⁸Npugü le zo, “Ale kenjü le akenyü lo me kenshwen lo tejvü gwün kerho ntsü hü. Ale joketsin nyu atemi dan chün thyü ti Lo anyugun zen-o kethonthen genyu kejozen ti.

⁹Anyugun le senye dan nyu kentsen nme thyüti Anyugun kehyu nyu aphu anyugun le ajochü kepfü nyu letse sha loti.”

¹⁰Jerusalem le Npugü thodan genyu a-kenyübin Shenhügi le a-sunkethyü phinya ben kehü hontse. Sunggigü le kenikelo lo kvukelo pe a nben laso.

¹¹Ntsi le tsü yhunlo tsentsü kehü hontse Aphuso kekvu Npugü le a-temi kenilo ti, Lo Senye tsipwen dan aphu a-shwen ti.