Read Southern Rengma Naga ISAYA 63 Bible Online

ISAYA 63 - Southern Rengma Naga bible

ISAYA 63

¹“Edom ki Bozrah nyida gü kipon ryü kejü higü hile segü la? Kenhon pe a-nthyü nzensa pvüo kvu lo nko sa ryü kejü hile segü la?” “Tsüle Npugü, kvu sa tse kenilo nrün genyu a-kvukelo pe tesha titse ryü kejü güle.”

²“Nyuthyüo a-phinya le nhon pe temi nmele vain sha kedü pe zu thyü kebin hontse la?”

³Npugü le kenio, “Ale senye dan lope vain sha hontse kedü, ai nme-e ache titse ryümvü. Ale anyunkenta nyu anyugun kedüla, tson-o anyugun zi le aphi nye laso.

⁴Atemi ju kenilo lo shaja pe anyugun shwikerüchün nyu tsüla mvulo keshvu gwünkho seletse rhiloso.

⁵Ale nrikeshü ka temi nme acheshü nrün ndikela genyu adun thyüla. Ai anyunkenta le athyü nkoshüo a npvü kvukelo tsü hyulo.

⁶Anyunkenta pfüo senye apentha kedülao anyugun no nren nrula. Ale anyugun zi no tsun pe kazü rhenla.”

⁷Ale Npugü le sozin kehü pe zoti; A-le ngun genyu thyükeshü tho aphu genyu ale a-shwenti. A-le a-shwikenjün lo sozin kehügü genyu jochü pe Israel nyu tsüsa laso.

⁸Npugü le zo, “Anyugun le atemi; anyugun le asala loho.” Tsügenyu a-le

⁹kenjünkethyü aphunyu anyugun kenilo. Tsüle tsanggenlonyu kemvu, ai Npugü le anyugun kenilo. A-keso lo shwikenjünyu anyugun kenishwishü. Gükela ka a-le a-zintse anyugun nucha ryü,

¹⁰ai anyugun le a-ntsun nren tson-o a-no nyungwamvu sala. Tsügenyu Npugü le anyugun kenrhinyu thyüo anyugun zen kega.

¹¹Ai tsüsika anyugun le nduka Npugü gogü Mosa gwünkho rüchünlo-o ketso, “Zida nyu a-temi shenhe dan kenikeshü Npugü tsüle dikipon güla ola? A-kapu lope Mosa ketsü Npugü le dikipon binla?

¹²A-le zan kegwa pfülo nrün genyu Mosa ge tha keda thyü, zida kenjün lao a-temi dan zen-o zü kentsun nyu chwi kela Npugü tsü le dikipon hü nla?” Npugü le anyugun tson tsinlo kela genyu anyugun tehen-keru pha hontseo pha nsüla mvu.

¹⁴Senru dan zen-o kazü kebwen ketejon nyu gü kela hontse Npugü le kerüyü pe a-temi tsüshü. A-le a-temi tsontsin shüo a-zan no gingvulo.

¹⁵Npugü, nle tsanggen kenshün lo zankechwi nyu yhunkehü bin nyu bin-o agun nrishüta. Nle agun phin rüchünsa kehü tsü dihontsela ola? N kekvu le dikipon la? N keso lo shwikenjün le dikipon güla la? Agun shamvula nyata.

¹⁶Nle agun pvü. Agun bonnyu Abraham lo Jakob le agun shalo mvula, ai Npugü nle agun pvü, nle a-zin tse agun kenishwi shükehü güle.

¹⁷Nle nyuthyüo agun no ntson gwünzü la ola? Nle nyuthyüo agun no agun nyun rülao nkipon rani tin lala? A-zin tse nlothyü kehü nyu, lo nhon thyüryü kelanyu genyu rani ryüta.

¹⁸Agun, ntemi kenshün dan hi gwünkho nmeka we agun kenrhi nyu le agun hüshwila: tsüdan le nbin kenshüngü kedüla.

¹⁹Nle agun khipe nle agun so gonryü kemvu hontse lo agun le ntemi thyü ryü kemvu hontse hü.