Read Southern Rengma Naga ISAYA 64 Bible Online

ISAYA 64 - Southern Rengma Naga bible

ISAYA 64

¹Nyuthyüo tsang sürhen-o tsenryüla mvu ola? Kazüthun le nhyu shülo nshvuo nnunti.

²Tsüdan le züle mah kenyen sa njwa kebin hotse kensüti. Tsüryü nkekvu pe nkenrhinyu hishülo, lo senye dan no nmhundyü nyu kensülo!

³Gwengwa ka we agun le rüchünbin kemvu ka nle ryüo kenshvu thodan thyü, kazüthun dan le nhyu shüo nshvuo ndün.

⁴Temi nme, a-tenyen kehünyu gen thatho tsühontse thyüshü kehü Sunggigü hontse hyu nmvue nyülo mvuzun le.

⁵Nle thatho kenjün kethyü nyu a-kenyü kehü nyu lo nle anyugun no dihontse yhun nyü bin yo rüchünlo kehü nyu zenlo hü. Nle agun gen nnyun ntala, ai agun le kemu tho thyü tinla; nduka nyu nle nnyun nta bin-e agun le thyüzü zin ryüla.

⁶Agun aphu musala; agun tho kegwatsin dan-e rhuritsinla sele. Agun kemu dan genyu agun le tsangkenbu le when sen tinla kehü jon nyü kesidan hontsela sele.

⁷Temi nme kehi nyu nkiryü mvulaso; nmvue nka keche hiryü mvulaso. Agun kemudan genyu nle agun kheo kebu tin laso.

⁸Ai Npugü, nle agun pvü le. Agun le gin hontse, ai nwe la kethyü gü hontse. Nle agun nyhunshü,

⁹tsügenyu agun gen nnyunta rila nya nmvue kethonthen agun kemu genyu agun ntsunla nya. Agun le ntemi le, agun njün shüta.

¹⁰N nyida kenshün dan le kazü kesi hontse la, Jerusalem le nkelao khe laso,

¹¹lo agun bonyu le nshwen kehü kershvuka nshün lo zegwasa kethyü gü tsüe mah le ro laso. Agun kenyü kehü bin dan aphu nke laso.

¹²Npugü, hihontse kebin nyu nle nnu mvu bin ti ole? Nle agun genyu thame thyüshü mvuo agun no nyhenlo keho nyu kenjün thyüni ti ole?