Read Southern Rengma Naga ISAYA 65 Bible Online

ISAYA 65 - Southern Rengma Naga bible

ISAYA 65

¹Npugü le zo, “Ale atemi dan kehi nyü shü titse bin, ai anyugun le himvu. Ale anyugun no ahyulo titse bin, ai anyugun le a fü mvu. ‘Ale hiki hünyo, ale hagun cheshü titse binle.’ tson zo-o anyugun kehi kenishü titse bin-e senye higü le aka hishwi mvu.

²Ale a-zintse atemi a-nyunrüo thyüzü lo anyugun npvü anyugun tson nyu hü tin kela nyu zenlo titse bin.

³Anyugun le keja mvushüo ano a nyunta bin hü. Anyugun chwi kenshün dan nyu tsü tero kecha kershvu tho thyü lo kershvubin ge rün kenyi ro hü.

⁴Kheje gwün anyugun le kazü kü lo sika nyu güo kesinyu kapu zen kenthon hünyo. Anyugun le tebo thyü tyü lo thyü pe teronyu kerüshvu henkeni zü tsü hünyo.

⁵Tsüsika anyugun kechanyu ka zo, ‘Agun kho nni nyalo; agun le nshün ritsin-o hagun le kejulo kemvui le!’ Ale temi tsü hontse kethyü nyu zen-o binlo kemvui--anyunkenta le nmhüla hü kemvu mah hontse anyugun ntsun binle.

⁶“Ale shaja pe anyugun tsüti tse rhiloso, tsü rüla pe thu laso. Ale anyugun thodan tsü hyukemvu rothyü lo kemvui, ai tsü kethun nishüti,

⁷tsüle anyugun lo anyugun bonyu kemu dan genyu. Anyugun le terokershvu rincho gen rünkenyi ro-o azo nshvu hü nyo. Tsügenyu gükela ka anyugun kemu chün hyulozü kebin genyu ale shaja pe tsüti.”

⁸Npugü le zo, “Temi nme-e vainsha kegwa nkela hümvu, tson kethyü gü mvule tsü pe vain zu thyü hünyo. Tsü hontse ako a temi aphu n keli loho. Ale a lothyü kehünyu kenishü ti.

⁹Ale jochüpe Israel temi Juda kami tsüti, lo anyugun tsipwen le a kazüthun gwen loti. Ale kejü kelo temi a lothyü kehünyu dan le tsü nyu yhun ti.

¹⁰Anyugun le arüshvu ti lo anyugun tanyü lo senru dan zen-o nphozin sharon ketejon lo nkhünzin Kekevü Kazü Ketejon nyu a-chvülo ti.

¹¹“Ai tsüle hagun, a khe kela, a kenshün rincho Zion khelao henkegwa lo temvu tero, Gad lo Meni hvu rüshvu tin kela nyu genyu we a-kecha ti.

¹²Ale hagun ko kethyü ka ajo kenimvu nmvue ale jo zo kethyü ka hagun le nyü mvula kethyü genyu hagun no ketetsin thyüo si ti. Hagun le ajo zenmvu lo gwakemvu thyü titse kejülo laso.

¹³Tsügenyu ale hagun ka zoti, a jozen-o a rüshvu kehünyu le ketyü ketsü kesü kela thyü ti, ai hagun we n nyon lo teri ti. Anyugun le sherhün ti, ai hagun we kemeni ti.

¹⁴Anyugun le shekerhün genyu lüthyü ti, ai hagun we nyun kenjün thyüo chü ti.

¹⁵Ale kejü kelonyu le hagun zan zope shochün hontse ti. Ale aphuso kekvu Npugü, ale hagun no sila ti. Ai zan keshün khipe a jozen kehü nyu tsüti.

¹⁶Kazü tsünyu lihigüe jochü hi kehünyu le joketsin kezo Sunggigü no jochü pe tsülo tse hiti. Lihigüe keswen thyü kehü nyu le joketsin kezo Sunggigü zan nyu swenti. Gükela kenjün kethyü dan tsüle ndilao nmhin lati.”

¹⁷Npugü le zo, “Ale kazü keshün lo tsang keshün thyü bin nyo. Gükela gwünkho dan tsü le nmhin shü lati.

¹⁸Ale rhenshü kebin nyu tsü hagun kenyü lo sherhünlo. Ale thyü titse kebin Jerusalem keshün nyu ts'u shekerhün le swü, lo tsünyu temi le anyugun kenyüti.

¹⁹Ale Jerusalem lo a-temi genyu shekerhün pe a sü loti. Tsünyu we kechü ndi, lo kekeche kehi ndi lati.

²⁰Nyuhonyu le a-ncheka sila loho, lo temi aphu keyhunne nyeki yhunthon loti. Chen tsi yhunkela nyue selo letseti. Tsü penmvuo sikela nyu le ale shaja pe tsükela zensü.

²¹Temi dan le anyugun npvü anyugun ka kethyü nyu yhun ti, tsünyu kechanyu no yhun loho. Anyugun le vain low tsüo vainzu tsüo shekerhün thyü ti, kechanyu le tsü tsüla loho. Atemi dan le senbin hontse yhunthon ti. Anyugun tho thyü kenjü dan sen-o anyugun kenyü penlo ti.

²³Anyugun tho kethyü nyu gwakenye loti, lo anyugun tsipwen le kenke tenola loho. Ale ryü kejü gwünkho aphu ka jochü pe anyugun lo anyugun tsipwen tsü ti.

²⁴Anyugun le aka hibin nsen ale anyugun kehi thyü shüla ti.

²⁵Teken lo tanyünyu dan le kengüo a-chvülo tyü ti; shünyho le senru hontse npen tyüti, lo peri dan kenshvu ndi lati. A rincho kenshün Zion gen we thame kejün keja nmvue gwakemvu ndi lati.”