Read Southern Rengma Naga ISAYA 66 Bible Online

ISAYA 66 - Southern Rengma Naga bible

ISAYA 66

¹Npugü le zo, “Tsangge le a kedakhün, lo kazü le a phabin. Tsonlo hagun le ka dihontse kethyü thyü mon, bin dihontse kethyü nyu ano yhu nmon?

²Ale a npvü tsang kazü apentha rhen shü! Ale temi yhun tsenyo kehü, anyun kelulo kehü, lo arühvuo a jozen kehünyu gen akenyü hünyo.

³“Temi dan le anyugun kenyü gü thyü hünyo. Tsühontse anyugun le methutse nmvue temi keyhun pe rüshvu metse; tanyünyu pe rüshvu nmvue tehi gunda rüthü metse; anyugun le shyeni nmvue tebo zi pe rüshvu metse; tha rünkenyi pe rüshvu nmvue teromen ka kehi thyü metse tsü aphu keme. Anyugun le kentsü kenchen kerüshvu nyu tsü anyugun kenyü hünyo.

⁴Tsügenyu ale anyugun le nshvu kehü kenke gü senryüo anyugun ge shü lati. Ale ko shüe nme khin mvu nmvue ale jozo kethyü ka a khwenyü mvu kela genyu. Anyugun le a khwenyü mvuo gwakemvu thyü ti tse kejülo laso.”

⁵Npugü rüshvuo a-jo zen kehünyu ju, a-le hagun ka nyu zo yo nyü shülo; “Hagun le aka joketsin zo kehü genyu, hagun temi peha le hagun ntsüe thame thyülo nrün ndi tse bin. Anyugun le hagun shwinyüo zo, ‘Agun no hagun le sherhün kebin hyu nrün genyu Npugü no a-keda pe hagun hi shüo hagun keni lota.’ Ai anyugun npvü keja pfüla ti!

⁶Nyülo! Nyida nyu nra nri kebin, kershvuka nyu sen kebin tsüle Npugü le shaja pe a-kenrhinyu tsü kebin khwen le!

⁷“A nyida kenshün gü le Nyeginyu nme le kenjünthyü mvuo whütse nyuzen kelo hontse le.

⁸Temi peha le tson kethyü hyu nmvue nyülo sele? Senye nme le khenyüme jon thyü binlo la sele? Zion le senye nme thyülo kemvu ka kenjün thyü thon loho.

⁹Ale atemi dan zen ryüo gwünkho tio anyugun no nnyulo kemvui le tse rüchünla nya.” Npugü le zo laso.

¹⁰Jerusalem zen-o sherhünlo; a-genyu n kenyülo, hagun nyida higü so kehünyu; aphu! Ntsoka a-zen-o sherhünlo, hagun a-chechü kehü ju!

¹¹Hagun le a-le gwakenye kelo zen-o sherhün loti, n tsenyu le a-jvü hontsüo a-kenyü kehü hontse.

¹²Npugü le zo, “Ale kethonthen gwakenye kethyü senryüo hagun tsüti; senye dan kenya le sinla hü kemvu züri hontse hagun ka ryü bin ti. Hagun le ntsenyu jvü le a-so a-ben nyu khipen-o nucha kebin hontse ti.

¹³Me jvü nyu le a-nyu kerünyun thyüshü kehü hontse ale Jerusalem nyu hagun kerünyun thyü shüti.

¹⁴Hagun le tsü hontse kebin hyu kelo ka hagun kenyü lo; lo tsügenyu hagun le nko lo phu sherhün loti. Tsü sika hagun le, ale Npugü, ale a jozen kehü nyu che shü lo anyun kenta pe a shwikerüchün nyu ntsun hü letse sha loti.”

¹⁵Npugü le mah sen-o ryü ti. A-le tsangkenbu terhi ge bin-o shaja pe a-le a-ge nyunta kebin nyu tsüti.

¹⁶A-le mah lo zhethon nyu shaja pe kazü temi thyüzü kebin hyu kelo aphu tsü ti lo kechon dushvu lati.

¹⁷Npugü le zo, “Kethen sen-o chwi kenshün nyu güo tebo lo tepvüthyü kentsü kenchen dan chvü tyüo tero rüshvu nrün genyu a-thyü kenshün kehünyu genyu gwünkho keni thyü bin laso.

¹⁸Ale anyugun kerüchün lo anyugun tho sha. Ale senye kequen lo nrün genyu ryüjü nyo. Anyugun le ryüo kequen kelo ka a kekvu le nyu thyü logwa yo hyu loti,

¹⁹lo shaja pe anyugun tsü kehü gü tsü le ale letse sha loti. “Ai ale tsüdan peha nrho lo-o nipe senye kecha kazü nithen ki kehü a zankechwi nyü hü kemvu lo a keda lo a kekvu hyu hü kemvu tsipwen dan Spain, Libia, Ludia lo a-temi tholevü pen keshanyu Tubal lo Greece ki shüti. Anyugun le senye hidan nyu a keda rüla zoti.

²⁰Anyugun le senye hidan dan nyu hagun pvünyu aphu zen niryüo jwe hontse pe a tsüti. Israel nyu le shyeni lope kerüshvu tho thyü nrün genyu pe thakhin kenshün dan ka shü sen-o kershvuka nyu gü kejü hontse anyugun le temi tsü dan lope keru, gada, ut, keru gari lo temi kepfü gari dan ka shü pfüo a rincho kenshün Jerusalem ki ryüti.

²¹Ale anyugun peha lope püshükedanyu lo Levi nyu hontse thyü shüti.

²²“Kazü keshün lo tsang keshün le a kekvu genyu binlo kehü hontse, hagun tsipwen lo hagun zen le bin loti.

²³She keshün nga lo Sabbath jon tsen senye aphu Jerusalem hinyu ryüo arüshvu ti,” Npugü le zo.

²⁴“Anyugun le chwilo a nren kehü nyu simin hyu ti. Tsüdan ketyü nyun le si loho, lo tsüdan ro kehü mah güe nmhüla loho. Temi aphu tsü hyuo ntsü küti.”