Read Southern Rengma Naga ISAYA 7 Bible Online

ISAYA 7 - Southern Rengma Naga bible

ISAYA 7

¹Uzziah nyu Jotham nyugü, Raja Ahaz le Juda so kekvu sen ketseka teri le soryüla. Siria raja Rezin, lo Israel raja Remaliah nyugü Pekah, au le Jerusalem whe, ai lolo mvula.

²Siria rihüdan le Israel kazü nyu ryü la sele tse kethyü jolo le Juda raja tilo ntsin raja gü lo a-temi-e aphu nshvu pe tsangkenbu le senbin whün kenu kebin hontse ndün sola.

³Npugü le Isaya kazo-o, “Nnyugü Shear Jashub zenlo-o gü Raja Ahaz teno shülo. Hai le zi nme nyu zütson sü kebin saka, phikedo nyu le bin kehü tson ka a-hyu loti.

⁴A-ka a-no perhinperho-o matse bin, lo nshvu nmvue nyhun nhi nyalo tse zoshülo. Siria nyu Raja Rezin lo a-temi, lo Raja Pekah au nyunkenta le masentun senro shahvu gen mah kekhu hontse gwenzin laso.

⁵Siria lo Israel raja hvu le tedo nme rhilo.

⁶Au le Juda hüo a-temidan no nshvuo au kipon ryüla, tson-o Jabeel nyu lope raja thyüla nyübin.

⁷“Ai Ale Npugü, Ale zoshübin nyo, tsü thyü kemvui.

⁸Nyugenyula? Kechamvule Siria le a-nyida Damaska nye kvu mvu, lo Damaska le a-raja Rezin nyeki kvu mvu. Chen hentsero-o pvün jaka Israel le kenjün kholao senye nme thyü loho lati.

⁹Israel le a-nyida Samaria nye kvu mvu, lo Samaria le a-rajagü Pekah nyeki kvu mvu. “Nle nketenyen nkolo mvu yatselo nko nhen loho.”

¹⁰Npugü le jolo kecha nme ninipe Ahaz ki shü.

¹¹“Npugü n Sunggigü ka zansü nme hishülo. Tsüle kesinyu kazü kentsun ki nmvue tetsoki tsangge-e logwa.”

¹²Ai Ahaz le hihontse kenila, “Ale tha zansü hiloho. Ale Npugü semeloho le.”

¹³Isaya le jo tsügü kenio hihontse zo, “Nyülo, Raja David nyenyudan, temi nyunkethon khwen loho kela tsü le ngenyu gwa mvuri yatselo nle Sunggigü nyunkethon ko khwen loho ti ole?

¹⁴Tsonlo Npugü le a-npvü zansü nme pe ntsü lati: lünyu nme le nyuphou pfülo-o pechenyu nme nnyu loti lo a-zan thope Immanuel thyüti.

¹⁵A-le nkin lo-o a-kerüchün thyülo sha kela siki temidan le nyüzü lo khuzü tsüti.

¹⁶Tsü gwünkho le keryü mhundyü nkedün kehü raja hvu kazü nyu meno yhun mvu lati.

¹⁷“Israel le Juda nyu kenjü kho kela siki shahü kemvu kenjünthyü sa nrün jon dan Npugü le senryüo n ge, n temi ge, lo raja kami aphu gen shüti-- tsüle a-le Assiria raja zen ryüti.

¹⁸“Tsü jon le keryü ka Npugü le nhuo tha zansü thyüpe nithen ki kebin Ijipt nyu Nile züri rinyu dan ki kebin nyu no tekhvu temhu hontse ryü, lo Assiria nyu no anyugun kazü kipon khu hontse ryülati.

¹⁹Tsüdan le ryüo kazü ketejon, tsokü lo tsehüphun lo shai aphu sü lati.

²⁰“Tsü gwünkho le ryülo Npugü le Eufrates züri pere kipon pe kethu nyu nme jonshe zen ryüti-- tsüle Assiria nyu raja gü! a-le nmü, npe lo nmi gen nhü aphu thu lati.

²¹“Tsü gwünkho le ryülo low ketsünyu nme le methu ben nme lo tenyü kenyhun nkinlo yatse-e,

²²nyüzü kechon thünlo-o a-le sen mvulo keshvu thyülo ti. Ketsinle, temidan kerho nsen pe kazü tsügü nyu kebindan le nyüzü lo khüzü tsüti.

²³“Tsü gwünkho le ryülo, vain low nme nyu a-bin yie nme le kebin a-bin nme min le rükagi yie nme min le binkehü kazü kegwa nyu tsü tsehü lo nchara le yhun hen zeü lati.

²⁴Temi dan le tholevü lo a-tsidan pen-o tsünyu thyükehü bin thyü tin lati. Kazü tsü aphu tsehü lo nchara le kesü thyü lati.

²⁵Rincho ki low ketsü bin aphu tsehü le yhun pe sülao temi nme-e tsünyu gülo mvu lati. Tsüle methu lo tanyü dan le anyu gun chvü lo ketyü bin thyü lati.”