Read Southern Rengma Naga ISAYA 8 Bible Online

ISAYA 8 - Southern Rengma Naga bible

ISAYA 8

¹Npugü le aka zoshü, “A-gen tha thulo kegwa pon nme khilo, tson-o tsügen jokon keda hihontse thulo: ‘Khi Nmhenlo, Seü Nmhenlo.’

²Shahu tho thyü nrün genyu tenyenlo kekü Uriah peshükedagü lo Jeberechiah nyugü Zechariah hvu zenlo.”

³Gwenkho keshanyu sika anun le nyuphou pvülo. Tson-o pechenyu zenkelo ka Npugü le aka zo, “A-zan pe ‘Khi Nmhen lo seü Nmhenlo tholo.’

⁴Nyugü le yhun soryüo ‘Apvü’ lo ‘Ajvü’ tse kolo kemvu ka Assiria raja gü le Damaska nyu kenya lo Samaria hon khikelo aphu pvü tin lati.”

⁵Npugü le aka zonishü.

⁶A-le zo, “Temi hidan le Shiloah rinyun kipon zü gwasa tse tsuntsüryü kebin lonyü mvuo raja Rezin lo Pekah hvu mhundyü ka tsü kedü kela genyu,

⁷ale Npugü, ale Assiria raja gü lo a-shüpahü dan zen ryüo Juda whenti. Anyugun le Eufrates züri zükeda hontse zürise aphu kesü thyü tsüryü lati.

⁸Anyugun le zükeda hontse Juda yho kekhün tsüryü ti, lo tsü no temi gunda kho tetso lao tha aphu hen lati.” Sunggigü le agun zenhü nyo! A-sekin le kazü gü henpvü bin.

⁹Senye dan, nshvuo kequenlolo! Kazü nithen ki kebin dan, nyülo. Teri kethyü genyu ndolo, ai nshvulo! Ele, ndolo, ai nshvulo!

¹⁰Tha rhibinta! Ai tsüle thyüpenloho. Kenthon kenyüthen kenthonlo! Ai tsüle a-min ndi, kechamvule Sunggigü le agun zen hünyo.

¹¹Npugü le kvusa tse ano temidan tson nyu gü nyalo tse zo shü. A-le zo,

¹²“Temidan le rhikebin nyu tsü kerhün nya lo anyugun le nshvu kehü nshvu nya.

¹³Ale Kekvutsin Npugü, Ale nshün letse kethyü rüchünlo; hagun le nshvu mvulo keshvu gü tsüle Ale le.

¹⁴A kenshün le ketetsin kethyü genyu Ale tso hontse lao temidan le age pha nsüla hünyo; lo Ale chwa hontse Juda lo Israel kedadan lo Jerusalem nyu temidan min lati.

¹⁵Kechon le pha nsüo nto tsügü jonren lati. Chwa nyu anyugun minlo lati.”

¹⁶Hagun asikethenyu, Sunggigü le jo pe aketsü tsü ntsen hülo.

¹⁷Npugü le a-temi kebu tin laso, ai ale a-tenyen lo a-nrin hüzunle.

¹⁸Ale hinyu Npugü le pe atsükeshü dan zen-o bin. Kekvutsin Npugü, a-rajakhün le Zion kazüthun gen kebin gü le agun lope kerhün jolo hontse nipe Israel nyu dan nyu shü laso.

¹⁹Mele hagun no temvünyu, Jadunyu, kebükerü kehünyu ka tha shünlo tseti. Lo anyugun le, “Temi le kapu dan ka jolo hi, lo kerhün nyu sunka kesinyu nthon züle,” tson zoti.

²⁰Ai hagun le hihontse tsüdan jo kenishü mvulo shvu, “Npugü le hagun senthyü kebin jo tsü nyülolo! Jadunyu kenthon jo nyünya-- tsüdan le hagun ka kezo tsüle hagun genyu kegwa thame thyü loho.”

²¹Temidan le nnyon lo shese-o kazü tsünyu nmhon ti. Nnyon lo anyugun nyunkenta genyu shochün pe anyugun raja lo anyugun Sunggigüe tsüti. Anyugun le tsangge nri,

²²nmvue kazü nyu nrisati, ai anyugun le anyugun hüpe shükebin kezün ketetsin gü lo kenjün kethyü nyeki tha kecha nme-e hyu loho.