Read Southern Rengma Naga ISAYA 9 Bible Online

ISAYA 9 - Southern Rengma Naga bible

ISAYA 9

¹Anyugun genyu thame kae kenjün kethyü gwünkho higü nrhilo nrün ndi lati. Zebulun lo Naftali tsipwen hvu kazü le gwüngwa ka kemenila, ai hisi gü ka we senye kecha le kebin kazü Mediterranian züda, nphozin gü Jordan züri perezin keti, lo gü tesin le yhun kebin Galilee keti-e temi le kerühvu pe lojvü higü tsütin lati.

²Kezen nyu kehü temidan le keben keda nme hyulaso. Anyugun le kazü kezün nyu yhunhü, ai ntsoka we keben le anyugun gen binlaso.

³Nle shekerhün keda pe anyugun tsülaso, Npugü; nle anyugun no anyugun kenyüloso. Anyugun le ntho genyu anyugun sherhünsa, temidan le logvü keloka nmvue kenya nkhenkelo ka anyugun kenyü kehü hontse.

⁴Kechamvule nle anyugun khvu kensu gunda kekhen lo anyugun vü kehü thün boren kela genyu. Nle nduka Media rihü so kvukelo hontse ntemi nshwen lo anyugun gen kechwi tyü kehü senye dan so kvulo laso,

⁵Hü kehü rihüdan phaje lo anyugun phinya tezi no nyekela dan tsü mah pe rolati.

⁶Nyu nme nnyu pe ngun tsülaso! Pechenyu nme pe ngun tsülaso! A-le ngun sharhi gü thyüti. A-lope, “Ndunkethyü Tharhi kesha gü,” “Kekvu Sunggigü,” “Kethonthen pvü gü,” “Gwaketho Raja gü,” tse koti.

⁷A-raja kekvu le gwakethün hüti; A-kedaphen le a-zintse bwenye tse binti. A-le David raja sunka, ketsin lo kekvu sen-o, ntsoka gungü keni keti kekvu senti. Npugü kekvutsin gü le tha hi aphu thyü titse rhilo laso.

⁸Npugü le Israel kedaphen gen, Jakob tsipwen gen kenjün kethyü pe shü titse zoshwi laso.

⁹Npugü le hi thyüshü letse kethyü Israel nyu Samaria nyida nyu yhunkebin aphu shaloti. Ntsoka anyugun le ketekho lo kemakin bin. Anyugun le hihontse zohünyo.

¹⁰“Ita kadan le nlalaso, ai agun le tsü sunka tsoka thyü lati. Chündün sen pe kenpere kethyü duthü laso. Ai agun le tsü sunka Sedar sen pe thyü lati.”

¹¹Npugü le shwikerüchün dan thu keyhun pe anyugun when.

¹²Israel nyilo la nrün genyu Siria no nphozin lo Filistia no nkhün zin tse au mün kvu pen bin laso. Tson-e Npugü nyunkenta le ponlo mvuo shaja pe a-tsüni titse bin zun.

¹³Kekvutsin Npugü le shaja pe Israel nyu tsü yatse ai anyugun le nyunkeluo rani a-ki ryü mvu.

¹⁴Npugü le khenyüme jon thyü shaja pe Israel sharhi lo a-temi dan tsüo a-pe lo a-ma duthüti.

¹⁵Peshünyu lo rühvulo kekü dan le a-pe-lo a-ma tsüle kenku pe senthyü kehü sidyükeshanyu dan!

¹⁶Temi hidan tsonketsin nyu le anyugun tson tsinzülao anyugun kevü laso.

¹⁷Lo temi aphu serimvu lo gwamvu, anyugun jokezo aphu gwamvu kela genyu Npugü le anyugun selo nme-e nsen loho, lo tegonyu lo maginyu nme-e njün shü lohoso. Tsonla yatse-e Npugü nyunkenta le ranilo ho, ai shaja pe tsüsin titse binzun.

¹⁸Mah le nhentsehü rola kehü hontse temi gwakemvue tsonla hünyo. Tsüle chün kero mah kekhü kechon le lugen küla kehü hontse lahü.

¹⁹Kekvutsin Npugü le a-nyunta binkela genyu a-shaja le mah hontse kazügü aphu ro-o temi aphu nkelati, lo tsüle temi nmeme tse a-npvü a-genyu.

²⁰Kazü tsü nyu bin lika hikae temi le ketyüketsü a-kehyu aphu khi tyüti, ai a-gin nyü loho. Anyugun npvü anyugun nyu tyüti!

²¹Manasseh lo Ephraim temi le khinyunyu when lo au kengüo Juda when ti. Tsüketi-e Npugü nyunkenta le ndi lamvu; ntsokhin shaja pe tsüti tsebinzun.