Read Southern Rengma Naga LEVINYU 13 Bible Online

LEVINYU 13 - Southern Rengma Naga bible

LEVINYU 13

¹Npugü le tejvü hidan pe Aaron lo Mosa au tsüshü.

²Temi nme le kethyüshvu nmvue a-jepvü nmvue nmen-o nyu le ketyü keho le bin laya tselo a-zen Aaron nmvue a-tsipwen püshükeda nyu ka ryüti.

³Püshükeda gü le kethyüshvu gü shwishüo tsünyu a-hü le chonpwen la lo kethyüshvu güle a-tekehun a-gi kecha nyeki ntsun laya tselo temi tsügü le nshünmvu laso tse zoshüti.

⁴Ai kethyüshvu güle chon lo a-gi kecha nye ntsun mvulo a-hü le chonla mvu yatselo Püshükeda gü le temi tsügü no jon tsenyü a-npvü binti.

⁵Tson-o püshükedda güle jon tsenyü nyü a-shwi niti, tson-o kethyüshvu tsüle chonkenye mvulo jon tsenyü no a-npvü bin niti.

⁶Püshükeda gü le jon tsenyü nyü a-shwinio a-kethyü le chon kenyemvuo ponla lo a-le nshün la sele tse zoshüti, tsüle kethyü nme gwenzin. Tsü güle a-phinya thu lao nshün lati.

⁷Ai Püshükeda güle a-shwishüo a-le nshünla sele tsezokela siki kethyü güle chon kenyela lo Püshükeda gü no a-shwini mvulo shvu.

⁸Püshükeda gü le shwinio tsüle chon kenye bin yatselo a-le nshünmvu letse zoshü lati; tsüle nyule ketyü.

⁹Ligü higü nyu le tyü yatselo a-zen püshükeda gü ki ryüo,

¹⁰no a-shwiti. A-kethyüshvu le chonpwen tseo a-hü le chonla lo kepozü le süla yatselo

¹¹tsüle nyu le ketyü when nme laso. Püshükeda gü le a-le nshünmvu letse zoshü lati; a-khin bin mvue gwa a-le nshünmvu tsekethyü shatsentsü kelasi genyu.

¹²Nyule ketyü tsüle temi gü pe ka tsügü a-pha keti aphu bin laya tselo,

¹³Püshükeda gü le a-shwini ti. Tson-o tsüle a-mipen henkela hyulo yatselo a-le temi tsügü le nshün laso tsezoshü lati. A-gi aphu chonla yatselo a-le nshün laso.

¹⁴Ai a-thyükesen peha le chwiryü yatselo a-le nshünmvu laso.

¹⁵Püshükeda gü le a-shwinio a-thyükesen peha hyulo yatselo a-le nshünmvu tse zoshü lati. A-thyükesen le kebin tsüle nyule ketyü lo temi tsügü le nshünmvu laso.

¹⁶Ai a-thyü tsü le chonnila yatselo, a-le püshükeda gü ka güo,

¹⁷no a-shwi niti. Tson-o kethyüshvu tsüle chon layatselo a-le nshün laso, püshükeda gü le a-le nshün tse zoshü lati.

¹⁸Temi nme le kinthyüpfüo pon la

¹⁹lo kethyüshvu katsü nmen-o chonpwen tse nmvue nhon chwiryü yatselo a-le püshükeda gü ki güti.

²⁰Lo Püshükeda gü le a-shwio a-shvu le a-gi kehun nyeki ntsunla lo tsünyu kebin a-hü le chon laya tselo a-le nshünmvu sele tse zoshüti. Tsüle nyule ketyü le kinthyü shvunyu chwiryü laso.

²¹Ai Püshükeda gü le shwio tsünyu kebin a-hü le chonpwen lamvu le a-gi kehun nyeki ntsun mvu ai nhon ben yatselo püshükeda gü le a-no jon tsenyü a-npvü bin ti.

²²Tson-o a-shvu le gon kenye layatselo püshükeda gü le a-le nshünmvu la sele tse zoshüti; tsüle kethyü gwakemvu laso.

²³Ai tsüle chon kenye mvuo a-gwenzin bin yatselo, tsüle kinthyü shvu gwenzin lo püshükedda gü le a-le nshün laso tse zoshüti.

²⁴Mah le rokela nyu nme le, a-thyü kerhün le chon nmvue chonnhon chwiryü bin yatselo,

²⁵Püshükeda gü le a-shwishüti. Tson-o kethyü shvu günyu a-hüle chon la lo a-gi le a-tekehun nyeki ntsun kvu laya tselo tsüle nyule ketyü le mah le keroshvu nyu chwiryü laso, Püshükeda gü le tsügü le nshünmvu laso tse zoshwi shü lati.

²⁶Ai a-hüle chon lamvu lo a-gie a-te kehun nyeki ntsunkvu mvu ai tsüle nhonben bin yatselo Püshükeda gü le jon tsenyü a-khin tseti.

²⁷Tson-o jontsenyü nyü a-shwiniti, lo tsüle chon kenye bin yatselo nyule ketyü laso, Püshükeda gü le tsügü le nshünmvu letse zoshü lati.

²⁸Ai a-shvu le chonkenye mvu lo nhonben bin yatselo tsüle nyule ketyü kemvu. Tsüle mah le kero kenki shvu genyu Püshükeda gü le tsügü le nshün letse zoshü lati.

²⁹Peche nmvue tenunyu nme le a-pe nmvue a-sakhü ge kethyü le bin yatselo,

³⁰Püshükeda gü le tsü shwiti. Tson-o tsüle a-tekehun a-gi nye ntunkvu lo tsünyu a-hüle nyhün lo nsen yatselo tsüle nyule ketyü, a-le temi tsügü le nshünmvu tse zoshü lati.

³¹Püshükeda gü le a-shwio kethyü shvu gü le a-gi a-tekehun nye ntsunkvu kemvu hontse ai tsünyu a-hü le gwamvu yatselo jontsenyü a-khin ntse ti.

³²Tson-o Püshükeda güle jon tsenyü nyü kethyü shvu gü shwiniti, tsüle chon kenye mvu lo tsünyu a-hü kenyhün ndi lo a-tekehun a-gi kecha nye ntsunkvu kemvu hontselo,

³³temi gü no a-pe thu lati ai kethyü shvu te kehun khela, lo püshükeda gü le jon tsenyü a-khin ni tseti.

³⁴Jon tsenyü nyü Püshükeda gü le a-kethyü shvu shwiniti, tson-o tsüle chon kenye mvu lo a-gi a-tekehun nye ntsun kenye mvu yatselo a-le nshün letse zoshü lati. Temi güle a-phinya thu lao nshün lati.

³⁵Ai a-le nshünla sele tse zoshükela siki kethyüshvu gü le chon kenyela lo,

³⁶Püshükeda gü le a-shwiniti. Tson-o kethyüshvu gü le chon kenye la lo, a-hü kenyhün shwinimvue temi tsügü le nshünmvu tsen tsü laso.

³⁷Ai Püshükeda gü le kethyüshvu güle chonkenyemvu, a-hü kemetse tsübin, kethyüshvu le ponla yatselo, a-le nshün tse zoshwi shüti.

³⁸Peche nmvue tenunyu nmele a-gi ge a-shvu kechon le bin lo,

³⁹Püshükeda gü le temi tsügü shwiti. Tson-o a-kechon shvu tsü le sinkin tselo a-gi ge tetsin le chwikeryü gwenzin; temi güle nshün.

⁴⁰Temi nme le a-südo nmvue a-senpfü hü pu layatse-e hi genyu a-le nshünmvu lamvu.

⁴¹

⁴²Ai chon nhon kethyü shvule a-pe kendo ge chwiryü layatselo tsüle nyule ketyü laso.

⁴³Püshükeda gü le a-shwishüo chonnhon kethyü shvu le bin laya tselo,

⁴⁴Nyule ketyü le a-pe ge bin kela genyu püshükeda gü le tsügü le nshünmvu tse zoshwi shüti.

⁴⁵Nyule ketyü nyu le phikenrhe ben, a-pe whennya, phi pe a-mün henpfü, lo “Nshünmvu, Nshünmvu” tsonti!

⁴⁶A-le keho tsügü le a-ge kebinthen nshünmvu, lo a-le chwida tegwen zin a-npfü bin nme ka yhunti.

⁴⁷Nyule ketyü kehonyu le phi ge bin yatselo, thyühü nmvue linen-e,

⁴⁸nmvue linen phi nmvue thyühü phi nmvue thyügi nmvue thyügi pe kethyü lihi ge-e,

⁴⁹tsüle njvudin nmvue nhon di chwiryü yatselo tsüle nyule ketyü laso, tsügenyu pe püshükeda gü hila mvulo shvu.

⁵⁰Püshükeda gü le tsü shwishüo pe jon tsenyü bin ntseti.

⁵¹A-le jon tsenyü nyü tsü shwiniti, tson-o nyule ketyü tsüle chonkenye bin ya tselo tsüle nshün mvu laso.

⁵²Püshükeda gü le tsü pe ro lati, tsüle chonkenye kebin nyu le ketyü kehonyu kelasi genyu mah pe nkie la mvu loshvu.

⁵³Ai a-te tsü shwikethyü ka, nyule ketyü tsü le chonkenye kemvu hyulo yatselo,

⁵⁴a-le züpe tsü sü lao jon tsenyü pe bin ntse lo tse ahza hoshüti.

⁵⁵Tson-o a-le tsü shwiti, lo nyule ketyü tsüle chonkenye mvue a-jvu kelumvu yatselo tsüle nshünmvu; nyule tyü kebin tsüle sizin nmvue mhundyü zin metse pe rola mvulo shvu.

⁵⁶Ai Püshükeda güle shwini kethyü ka nyule ketyü tsüle ndila lo a-le phi nmvue thyügie a-shvu tsü sürhe lati.

⁵⁷Tson-o nyule ketyü tsü hyuni chwiryü yatselo tsüle chonkenye kebin nyule ketyü la so, tsügenyu phi npugü no tsüpe ro lati.

⁵⁸A-le züpe sü lao a-shvu hyumvu layatselo a-le zü pe süni lati, lo tsüle nshün laso.

⁵⁹Hile nyule ketyü le phi ge kebin genyu tejvu, thyühü, linen, thyühüphi, linenphi, nmvue thyügi pe kethyü lihi ge-e, hihontseo nshün lo nshünmvu tse shalo nrün genyu.