Read Southern Rengma Naga LEVINYU 14 Bible Online

LEVINYU 14 - Southern Rengma Naga bible

LEVINYU 14

²Nyule ketyü nyu nme le ponlo la lo thyü nshün kelo tejvü dan hi khipe. A-le nshün laso tse zoshwishü nrün jon nyü a-zenryü Püshükeda gü ki shüti,

³lo Püshükeda gü le a-zen-o kagwen ki gü a-shwiti. Lo keho tsüle ponla yatselo,

⁴Püshükeda gü le tegü kenshün kenyhun, Sedar sen nme, ni kenhon nme lo hissop chwenme tse senryü lotse zo shüti.

⁵Tsüselo Püshükeda gü le zü kenshün pe shü kebin nnyo la nme soge tegü nme dushvu lolo tse zoshüti.

⁶Lo a-le tegü kerhün gü, sedar sen nikenhon lo hissop tse kesinpe tegü dushvukela gü zinyu ntsen shüti.

⁷Tson-o a-le gwen tsenyü ge tezi gü kezen pe nyule ketyü ka thyü nshün la nrün gü gwenshüo a-le nshün laso tse zoshwi shüti. Lo tegü kerhün gü hoshüo no nyetin lati.

⁸Temi güle a-phinya thula, a-hü aphu thula lo zü lula tson-o a-le nshün lati. A-le kensenbin nyu yüryü logwa ai jon tsenyü a-phika gü tegwen ki bin mvuloshvu.

⁹Jon tsenyü nyü a-le, a-pe, a-mün, a-yhütyü lo a-mige a-hü kecha aphu thu nila ti; a-le a-phinya thula lo zülu lao nshün lati.

¹⁰Jon tetsenyü a-le a-ge tetsin kendi tanyü tse kenyhun lo lü chenme nyu nme, oliv terzü pe tho kerhün kethyü kilogram kenshen lo oliv terzü liter jünshen jünme tse senryüti.

¹¹Püshükeda gü le temi gü le thaho keshü hidan sen-o Npugü kehü Phika gü khenpvü ka güti.

¹²Tson-o püshükeda gü le tanyü tse nme pe terzü liter jünshen jünme sin-o thonikethyü kerüshvu thyüti. A-le tsü pe Püshükeda gü genyu jwe kerüche thyü pe Npugü tsüti.

¹³A-le kemu genyu kerüshvu lo rope kerüshvu nyukhu dushvu kehü kenshün bin gü ka tanyü gü dushvu ti. Kechamvule thonikethyü kerüshvu hile kemu genyu kerüshvu hontse püshükeda gü hon lo tsüle nshünsa.

¹⁴Püshükeda güle tanyü gü zi peha khilo-o pe thyünshün loti tse kebin gü nyüchwe nzhüzin, a-ben zentsü nzhüzin, a-pha zentsü nzhüzin yün shüti.

¹⁵Püshükeda gü le oliv terzü peha jape a-npvü a-benje ngwazin shülo-o,

¹⁶a-ben nzhüzin a-zenkero pe tsünyu ntsenlo-o tsüka gwen tsenyü ge Npugü mhundyü nyu kezen shüti.

¹⁷A-le a-benje ka terzü peha lo tanyü gü zi peha tse khipe nshün la sele tse zoshwishü nrün gü nyüchwe nzhüzin, a-ben zentsü nzhüzin lo a-pha zentsü nzhüzin tse yün shüti.

¹⁸A-le a-ben nyu terzü nsen kebin tsüpe temi gü pe ge shü lati. Hihontse-o a-le thyünshün kelo jvu thyü shüti.

¹⁹Tson-o Püshükeda gü le kemu rokethyü pe shüo thyü nshün kelojvu thyüti. Tsüsika a-le rope kerüshvu nyukhu gü dushvu ti

²⁰lo tsüpe shye sin-o kershvubin ge rüshvuti. Hihontseo Püshükeda gü le thyünshün kelojvu thyüo temi gü le nshün loti.

²¹Temi güle tha ndio thyütiloho yatselo, a-le a-rokethyü a-thyükenshün nrün genyu tanyü tse nme nti senryü püshükeda gü genyu jwe kerüche thyüpe Npugü tsüti. A-le shye pe kerüshvu kethyü kilogram nme lo oliv terzü liter jünshen jünme tse nti senryüti.

²²A-le nsu nmvue paro kenyhun pe sin senryüti, nme le kemu genyu kerüshvu lo nmele rope kerüshvu genyu tse.

²³A-thyükenshün kethyü jon tetsenyü a-le tsü senryü phika gü khenpvü ka püshükeda gü tsüshüti.

²⁴Püshükeda güle tanyü nyu gü lo oliv terzü tse khipe püshükeda gü genyu kerüshvu kerüche thyü pe Npugü tsüti.

²⁵Tson-o a-le tanyü nyugü dushvuo a-zi peha khipe temi gü nyüchwe nzhüzin, a-ben zentsü nzhüzin, lo a-pha zentsü nzhüzin tse yün shüti.

²⁶Püshükeda gü le terzü peha jape a-benje ngwazin shülo-o

²⁷a-ben nzhüzin a-zenkero pe ntsen-o tsüka Npugü mhundyü nyu gwen tsenyü ge kezen shüti.

²⁸A-le terzü ko peha khipe tezi pe yün keshü bin, temi gü nyüchwe nzhüzin, a-ben zentsü nzhüzin lo a-pha zentsü nzhüzin tse ka shüti.

²⁹A-benje ka terzü nsen kebin tsüpe temi gü pe yünshü, hihontseo thyünshün kelo jvu thyüti.

³⁰Tson-o a-le nsu nmvue paro nme pe rüshvuti

³¹nme no kemu genyu kerüshvu lo kecha gü pe rope kerüshvu thyüo shyepe kerüshvu sin-o rüshvuti. Hihontseo püshükeda güle thyünshün kelo kerüshvu thyüti.

³²Nyule ketyü thyükenshün kethyü jvu thyütilo keho nyu genyu tejvu le hi.

³³Npugü le pe Mosa lo Aaron au tsüshü

³⁴Nyule ketyü le kakhwün nyu bin kela nyu genyu tejvü le hidan hi. (Israel nyu le Npugü le anyugun no gwen lotse pe ketsü Kanan nyu yü kelo siki higü hi thenti.) Temi peha le Npugü le nyule ketyü nipe a-kakhwün nyu shükela hyulo yatselo, a-le gü püshükeda gü ka tsü rüla zoshü mvuloshvu.

³⁵

³⁶Püshükeda güle yügü nyule ketyü gü shwi kethyü mhundyü kanyu thalihie khishwi la lotse zoshüti; kemvu we kanyu kebin lihie nshünmvu laso tse zoshwi shü lati. Tson-o a-le kanyu güo

³⁷nyu le ketyü gü shwishüti. Tson-o kabon gü tyüpe njvu nmvue nhonro chwiryü bin yatselo,

³⁸a-le ka nyu chwilao jontsenyü kakhin lati.

³⁹A-le jontsenyü ka niryüo tsü shwiniti. Lo nyule ketyü tsüle gon kenye laya tselo,

⁴⁰a-le nyu le tyü kebin tso dan tsü khipe nyida gü tegwenzin nshünkemvu bin peha ka shwe la lotse zoshüti.

⁴¹Tsüsiki kanyuzin kabon kehü lo kakehyu tsü aphu senchwi gü chwida tegwenzin nshün kemvu bin nme ka shü la mvuloshvu.

⁴²Tson-o tso kecha sen gü tso khikela dan bin ka shüla, lo kakehyu keshün pe kabon gü hyu lati.

⁴³Tso dan khila lo ka kehyu khü nne lao hyuni kela siki nyule ketyü tsüle nichwi ryüya tselo,

⁴⁴Püshükeda gü le gü nriti. Tson-o tsüle chwiryüla yatselo ka tsüle nshünmvu laso.

⁴⁵Ka tsü rhola, lo tso, tesen lo ka kehyu tsü aphu sen chwigü nyida gü tegwenzin nshünkemvu bin nme ka shüla mvuloshvu.

⁴⁶Ka tsü khinkebin ka ligü higü tsünyu keyü güle ngwün gü keti nshünmvu binti.

⁴⁷Ligü higü tsünyu zhü nmvue tyütsü kethyü güle a-phinya thula mvuloshvu.

⁴⁸Ka tsü hyunikelasiki Püshükeda gü le ryü nrio nyule ketyü tsüle nichwiryü mvula yatselo, ka tsügü le nshün laso tse a-le zoshwishü ti, nyule ketyü tsü khi kela si genyu.

⁴⁹Ka gü thyükenshün nrün genyu a-le tegü kenyhun, sedar sen peha, ni kenhon nme lo hissop chwe me tse senryüti.

⁵⁰A-le nnyonla nme nyu zü kenshün pe shü kenjü soge tegü nme dushvu loti.

⁵¹Tson-o a-le sedar sen, hissop, ni kenhon, lo tegü kerhün gü tse pe zü kenshün soge dushvu kelo tegü gü zinyu ntsenlo-o gwen tsenyü ge kezen pe ka gü ge shüti.

⁵²Hihontseo a-le tegü zi, zü kenshün, tegü kerhün, sedar sen, hissop lo ni kenhon sen-o ka gü thyü kenshün ti.

⁵³Tson-o a-le nyida tegwenzin kendo nyu tegü kerhün gü hoshüo no nyetin lati. Hihontse kagü thyükenshün jvu thyülao tsü le nshün loti.

⁵⁴Nyule ketyü keho genyu tejvu dan le hi;

⁵⁵kethyü shvu, kinthyü, nmvue kenkhü; lo phinya nmvue ka ge nyule ketyü genyu.

⁵⁶

⁵⁷Nshünmvu lo nshün tse tsinshü nrün tejvü le hidan hi.