Read Southern Rengma Naga LEVINYU 15 Bible Online

LEVINYU 15 - Southern Rengma Naga bible

LEVINYU 15

¹Npugü le tejvü hidan pe Mosa lo Aaron au tsüshü,

²Israel temi genyu. Pechenyu nme le a-ge tsunchwiryü lo, tsun chwikeryü tsüle nshünmvu,

³a-ge tsun chwiryü bin nmvue tsüle tsun mvulae.

⁴A-le lihi ka dun nmvue zhü-e tsüle nshün mvu.

⁵Ligü higü a-zhü kesü keshü gü

⁶nmvue temi tsügü kedunbin lihi ka-e dun kethyü güle a-phinya thula lo zülu la mvuloshvu tson-e a-le nshünmvu bin-o ngwün gü titi.

⁷Ligü higü a-ge tsunchwiryü kebin gü kesü keshü güle a-phinya thula lo zülu la mvuloshvu lo nshünmvu bin-o ngwün gü titi.

⁸A-ge tsun chwiryü kebin güle nsüpe temi kenshün ligü higü ge shü laya tselo, tsügü no a-phinya thula lo zülu la mvulo shvu, tson-e a-le nshünmvu bin-o ngwün gü titi.

⁹A-ge tsun chwiryü kebin güle kerusen kedunbin nmvue bin kecha ka dun-e tsü le nshün mvu.

¹⁰Ligü higü temi gü kedunbin lihie kesü keshü gü le nshünmvu bin-o ngwün gü titi. Temi güle a-ge dunkela lihie pen kethyü güle a-phinya thula lo zülu la mvuloshvu, tson-e nshünmvu bin-o ngwün gü titi.

¹¹A-ge tsun chwikeryü gü le a-ben tsela mvuo temi peha kesü shü yatselo, tsügü le a-phinya thula lo zülu la mvuloshvu, tson-e nshünmvu bin-o ngwün gü titi.

¹²Temi gü le kesü kela nnyola lihie jonrenla mvulo shvu lo senkhun lihie kesüla mvuloshvu.

¹³Temi güle tsun chwiryü kebin ponlo kela siki, jon tsenyü bin tseo a-phinya thula lo zütsun kebin nyu zülu lao nshün loti.

¹⁴Jon tetsenyü a-le nsu nmvue paro kenyhun senryü Phika gü khenpvü nyu Npugü mhundyü ka püshükeda gü tsü shü ti.

¹⁵Püshükeda gü le tsü nme pe kemu genyu kerüshvu lo kecha gü pe rope kerüshvu thyü shüti. Hihontse a-le temi gü genyu thyükenshün jvu thyüti.

¹⁶Temi nme le a-phouzü chwiryü yatselo, a-mipen zülu la mvulo shvu, lo ngwün gü keti a-le nshünmvu binti.

¹⁷Phi nmvue thyügi pe kethyü phinya lihie a-phouzü le nyenkela thula mvuloshvu lo tsüle nshünmvu bin-o ngwün gü titi.

¹⁸Peche tenujvu thyü kela sika pechegü lo tenugie zülu la mvulo shvu, lo nshünmvu bin-o ngwün gü titi.

¹⁹Tenunyu nme le shyekechwi jvu kethyü ka a-le jon tsenyü nshünmvu binti. Ligü higü a-kesü keshü güle nshünmvu bin-o ngwüngü titi.

²⁰Shyekechwi jvu gwenkho ka a-le lihika dun nmvue zhü lo tsüle nshünmvu.

²¹Ligü higü a-zhü kesü nmvue tsügi le lihi ge dun lae tsü süla, a-phi thula, lo zülu la mvulo shvu, lo nshünmvu bin-o ngwün gü titi.

²⁴Lo a-le tson kebin gwenkho ka peche nyu nme le zenzhü yatselo tsügi nshünkemvu le a-ge kü laso, a-le jon tsenyü nshünmvu binti, lo a-le zhü lihika zhü-e jon tsenyü nshünmvu binti, lo a-le zhü lihika zhü-e tsüle nshünmvu.

²⁵Tenunyu nme le shyekechwi jvu mvuo jon kethon tezi tsun binla nmvue shyekechwi jvu tsü le tsun thümvu laya tselo, shyekechwi jvu gwenkho ka hontse tezi tsun kebin then a-le nshünmvu binti.

²⁶Higwenkho ka a-le zhü nmvue lihi ge dun yatse-e tsüle nshünmvu.

²⁷Ligü higü tsüdan kesü kethyü güle nshünmvu laso, a-phinya thula lo zülu la mvuloshvu lo nshün mvu bin-o ngwün gü titi.

²⁸Tezi tsunmvu kela siki jon tsenyü bin tseo a-le nshün loti.

²⁹Jon tetsenyü a-le nsu nmvue paro kenyhun senryü Npugü kehü Phika gü khenpvü ka püshükeda gü tsü shüti.

³⁰Püshükeda gü le tsü nme pe kemu genyu kerüshvu lo kechagü pe rope kerüshvu thyüti, hihontse püshükeda gü le a-rora thyüti.

³¹Npugü le Israel nyu no a-nyugun nshünkemvu genyu pütsü lo mvulo keshvu rüla pe Mosa ka zoshü, tson-o a-nyugun no a-nyu kensenbin lvu ka kebin a-le kehü Phika gü nrhula mvu nrün genyu. A-nyugun le tsonshü yatselo a-nyugun le silati.

³²Tejvü hidan hile temi nme ge chwikela nmvue a-phouzü chwikela,

³³tenunyu le shyekechwi jvü nmvue temi nme le tenunyu nshünmvu kebin gwenkho ka zen zhü kethyü genyu tejvü.