Read Southern Rengma Naga LEVINYU 16 Bible Online

LEVINYU 16 - Southern Rengma Naga bible

LEVINYU 16

¹Aaron nyu hvu le mah nshünkemvu pe Npugü rüshvuo sikela siki Npugü le Mosa ka zoshü.

²“Ntsa gü Aaron no gwenkho toka nti phisüden kebin sizin Kenshün tsin Bingü ka yüryülo, tse zoshülo, ale kejozenkelo Khinpha ge shwikenjün bin so nmhu nme ka tsünyu me yhühyu thyüti. A-le johi nyümvu yatselo, a-le silati.

³A-le kemu rokethyü genyu methu tsebwe nme lo rope kerüshvu genyu tanyü tse nme tse senkeryü siki Kenshün Tsin Bin gü nyu yü logwa.”

⁴Tson-o Npugü le jo hidan khishü. Aaron le Kenshün Tsin Bin gü nyu keyü mhundyü, zülula lo püshükeda phinya senlo: linen mirün, nyasin, senkephin lo pe kejwe pfülo.

⁵Israel nyu süda le kemu rokethyü genyu tenyü tse kenyhun lo rope kerüshvu genyu tanyü tse nme tse pe Aaron tsüti.

⁶A-le a-npfü a-kemu lo a-kami kemu sentinla nrün genyu methu tse nme pe rüshvuti.

⁷Tsüsiki a-le tenyütse hvu zen-o Npugü kehü Phika gü khenpvü ka güti.

⁸Tsüka a-le tso kenyhun khi lo-o nme le “Npugü genyu,” lo kecha güle “Azazel genyu” tse whe shwiti.

⁹Aaron le whe shwio Npugü genyu kejükelo gü pe kemu genyu kerüshvu thyüti.

¹⁰Lo Azazel genyu kejükelo gü tsü temi dan kemu pfütinla nrün genyu Npugü mhundyü nyu nipe Azazel tsü lati.

¹¹Aaron le methu tse gü pe a-npfü lo a-kami kemu genyu kerüshvu ka,

¹²a-le kershvubin ka magi kenhon makepenkhun kesü nme lo tharün kegwa jenthün kenyhun sen-o Kenshün Tsin bin nyu yüryüti.

¹³Tsüka Npugü mhundyü nyu a-le tharün kegwa gütsü pe mah soge shüo tharün kegwa gü makekhu le kejozenkelo Khinpha ge shwikenjünbin gü sun lao a-le tsü hyumvuo simvu loti.

¹⁴A-le methu tse gü zi peha khilo-o a-zenkero pe ntsen-o kezen pe shwikenjün bin mhundyü zin shü lo gwün tsenyü ge kezen pe Kejozenkelo Khinpha mhundyüzin shüti.

¹⁵Tsüsiki a-le temidan kemu genyu kerüshvu tenyü gü dushvu lo-o, tsü zi sen-o Kenshün Tsin Bin nyu ryüti, tson-o methu tse gü zi pe kethyü hontse tsü kezen pe shwikenjünbin ge lo Kejozenkelo Khinpha mhundyü zin shüti.

¹⁶Hihontseo a-le Israel nyu nshünkemvu lo anyugun kemu nyu Kenshün Tsin Bin gü thyü nshün kelo jvü thyüshü. A-le Phika gü ko tson mvuloshvu, tsüle nshünkemvu anyugun kensenbin lvuka kebin genyu.

¹⁷Aaron le Kenshüntsin Bin gü nyu yügü thyünshün kelo rora thyüo chwiryü kemvuthen temi nme Phika günyu bin nya. A-le a-npfü a-genyu, a-kami lo süda genyu rora kethyü ka,

¹⁸a-le rope kerüshvu thyüo tsü thyünshün nrün genyu kershvubin ka chwiryü mvulo shvu. A-le methutse zi lo tenyü zi peha tse pe kershvubin quen dan ka a-to aphu yünshü mvuloshvu.

¹⁹A-le a-zenkero pe tezi gü nyu ntsen-o gwen tsenyü ge kejen pe kershvubin gü ge shüti. Hihontseo a-le Israel nyu kemu tsü anyugun thyükenshün-o no nshün loti.

²⁰Aaron le Kenshüntsin Bin gü, lo Npugü kehü Phika, lo kershvubin gü thyükenshün penkela siki a-le Azazel genyu kejükelo tenyü gü kerhün sen-o Npugü mhundyü ka ryüti.

²¹A-le a-ben hvu pe tenyü gü pe ge shü lo njüo Israel nyu serikemvu, kemudan lo tejvu gwenrho kela aphu zoshwipe tenyü gü ge shü lati. Tson-o tsügenyu kejükeshü temi gü no tenyü gü tsü hüsengü kazü kesi ki shü lati.

²²Tenyü gü le anyugun kemu aphu pfüo temi kendi bin ki tinlati.

²³Tsüselo Aaron le Phika gü ki ryüo Kenshüntsin bin gü nyu keyü ka ben kehü Püshükeda phinya dan yhünpe tsüka shü lati.

²⁴A-le Kenshün bin nme ka zülu lao a-phinya ben nya lola mvuloshvu. Tsüsiki a-le a-npfü a-genyu lo temi dan kemu sentinla nrün genyu gü rope kerüshvu thyüti.

²⁵A-le kershvubin ge kemu genyu kerüshvu senru keshvu roti.

²⁶Tenyü gü zen gü kazü kesi ki Azazel tsü kela güle a-phinya thula lo zülu lao kensenbin nyu ryü mvuloshvu.

²⁷Kemu sentinla nrün genyu a-zi sen-o Kenshüntsin bin nyu keryü kemu genyu kerüshvu methutse lo tenyü hvu tsü pen-o kensenbin tegwenzin gü roti. A-gi, a-thyü lo a-ri aphu ro lati.

²⁸Tsü kero gü le a-phinya thula lo zülu la terio kensenbin ki rani ryü mvuloshvu.

²⁹Ryükejü gwenkho aphu tejvu hidan thenti. Shye tsenyü gü jonryü nyü Israel nyu lo tesin hagun dan nyu yhun kebin nyu le nyenti lo thatho nme thyüloshvu.

³⁰Tsüjon nyü anyugun kemu aphu nyu anyu thyü nshün kelo rora thyüti, tson-o anyu no nshün lati.

³¹Anyugun le thame thyü mvuo nyen kethyü jon tsüpe nshünsa kethyü jon nme thyüti. Ryükejü gwenkho aphu nyu tejvu higü thenti.

³²Püshükeda khikho kechathyü lo thyü kenshün pe a-pvü sun thyü kebin gü le thyü kenshün kelo rora higü thyü ti. A-le püshükeda phinya sen-o

³³Kenshüntsin bin gü, Npugü kehü Phika gü, kershvubin, püshükedadan lo süda aphu thyükenshün jvu thyüti.

³⁴Ryükejü gwenkho aphu nyu tejvu higü thenti. Kenshün jvu higü hi chenme ka gwengwa thyüo Israel nyu kemu aphu nyu anyuthyü kenshün mvuloshvu. Tsüselo Mosa le Npugü le johokeshü hontse thyülo.