Read Southern Rengma Naga LEVINYU 17 Bible Online

LEVINYU 17 - Southern Rengma Naga bible

LEVINYU 17

¹Npugü le Mosa no

²Aaron, a-nyudan lo Israel nyu aphu tsüshü lotse tejvu hidan khishü.

³Israel nyu nme le Npugü kehü Phika gü khenpvü ka mvuo bin kecha liki hiki methu nmvue tanyü nmvue tenyü dushvu pe Npugü rüshvu yatselo a-le tejvü gü borho laso. A-le tezitsun laso lo a-lope Sunggigü temi nme tse rüchün sinmvu lati.

⁵Johokeshü higü kon le Israel nyu le phenchvüki senru dushvu kehü tsü ntso ka we sen Npugü ki ryülo nrün genyu. A-nyu le ntsoka we tsüdan sen Phika gü khenpvü ka Püshükeda gü ki ryüo tsü dushvu pe kepvüshe kerüshvu thyüti.

⁶Püshükeda güle tezi gü shwenpe Phika gü khenpvü ka kershvubin te lizin hizin shüla lo a-keshvu rope a-rün kenyü thyüpe Npugü ki shüti.

⁷Israel nyu no phenchvüki anyugun senru dushvu pe tero rüshvuo Npugü mhundyü nyu pütsü kemvutho thyü sinlo haso. Ryükejü gwenkho aphu ka Israel nyu le tejvu higü then mvu loshvu.

⁸Israel nyu nmvue tesin anyudan nyu kehü ligü higü rope kerüshvu nmvue kerüshvu kecha lihie

⁹Phika gü khenpvü ka mvuo kecha ki Npugü rüshvu yatselo tsügü le Sunggigü temi letse rüchün sinmvu lati.

¹⁰Israel nyu nmvue tesin hagun dannyu keyhun nyu ligü higü tezi lihie tyüyatselo Npugü le a-ntsun ti lo tsügü le a-temi letse rüchün sinmvu lati.

¹¹Yhun kehü lihie a-keyhun ronzin le tezi günyu bin, tsügenyu Npugü le temi dan kemu sentinla nrün genyu tezi aphu run pe kershvubin ge shü lalo tse johoshü. Kerhün le a-ge kebin, Tezi tsüle kemudan sentin lahü.

¹²Tsü genyu Npugü le Israel temi nmvue tesin a-nyu dan nyu kehü nyue no tezi tyünya lotse shü.

¹³Israel nyu nmvue tesin hagun dan nyu kehü nyu ligü higü thyü nmvue tegü kenshün hüo bolo yatselo a-zi runpe kazü nyu shü lao nnyo pe henla mvuloshvu.

¹⁴Yhunkehü lihie a-keyhun ronzin le tezi günyu bin, tsügenyu Npugü le Israel nyu no tezi tyü nya lo ligü higü tezi ketyü gü we a-temi letse rüchün sinmvu lati tse zoshü.

¹⁵Ligü higü Israel nyu nmvue tesin-e nyukhu a-npfü kesi nmvue thale tün kela thyü ketyü güle a-phinya thula lo zülu la mvuloshvu lo nshünmvu bin-o ngwün gü tio tsü siki nshün loti.

¹⁶A-le tsonmvu yatselo a-kemu genyu kenjün thyü mvu loshvu.