Read Southern Rengma Naga LEVINYU 18 Bible Online

LEVINYU 18 - Southern Rengma Naga bible

LEVINYU 18

¹Npugü le Mosa ka zoshü

²Israel nyu ka zoshülo, “Ale Npugü hagun Sunggigü.”

³Hagun le gwengwa a-kazünyu yhun keryü Ijipt nyu nmvue ale ntsoka hagun zen-o gü kejü Kanan nyu dan jvu then nya.

⁴A tejvu dan zen lo lo a-johokeshü thyü lo. Ale Npugü hagun Sunggigü.

⁵Ale rhikeshü lo tejvu khi keshü dan thenlo; tson yatselo hagun le rhün loti. “Ale Npugü.”

⁶Npugü le tejvu hidan khishü. Nshvunye nme zen-o peche tenu jvu thyü nya.

⁷Njvu zen peche tenu jvu thyüo Npvü nshwenya. Nle npvü njvu nshwe nya.

⁸Nle npvü nu kechadan zen peche tenu jvü thyüo Npvü nshwenya.

⁹Nlügi kame nyu nmvue ka cha ki yhun soryü metse nle zen-o peche tenu jvu thyünya.

¹⁰Nle ntsugi zen peche tenu jvu thyünya, tsüle nnpvü nkenshwe.

¹¹Nle njvu nyugi zen peche tenu jvü thyünya, tsügi ko nlügi.

¹²Nle npvü lügi nmvue njvu sikezengi zen peche tenu jvu thyünya, tsüle nnyü lo njvuso.

¹⁴Nnyo nu zen peche tenu jvu thyünya, a-le njvu genyu.

¹⁵Nmonyu zen peche tenu jvu thyünya

¹⁶nmvue ntsasikezen nu zen nya.

¹⁷Nle zen-o peche tenu thyü kela gi nyugi nmvue a-nyenyu nyugi zen peche tenu jvu thyünya, anyugun le nshvunye thyü bin logwa lo tsüle serikemvu.

¹⁸Nnu le rhün kebin ka a-sikezen gi lope nnu nme thyü ni nya.

¹⁹Tenunyu nme le tenunyu jvu thyü kebin ka a-zen peche tenu jvu thyünya, a-le nshün kemvu genyu.

²⁰Nle me nunyu zen peche tenu jvu thyüo nthyü nrhu lanya.

²¹Nnyenyu nme-e khipe Molek tero gü kerüshvu thyüo Npugü Sunggigü zan kenshwe thyü nya.

²²Temi nme le tenunyu zen zhü kethyü hontse pechenyu zen zhü loshvu; Sunggigü le tsü shwintsü.

²³Peche nmvue tenunyu nme le senru zen-o peche tenu jvü thyülo nthyü nrhu lati.

²⁴Tha hidan hi nme thyüpe hagun npfü hagun thyü nrhula nyalo, kechamvule ale hagun mhundyünyu hüpe shwe kebin tsipwen dan aphu hipe anyugun nrhu kela genyu.

²⁵Anyugun tho le kazü gü nrhula tsügenyu Npugü le shaja pe kazü gü tsüo tsünyu keyhun nyu kenilaso.

²⁶Anyugun le kentsükenche tho hidan aphu thyüo kazü gü nrhula, ai hagun we tsüdan thyünya. Israel nyu nmvue hagun dannyu kebin tesin dan metse hagun aphu Npugü tejvu gü lo a-johokeshü dan thenlo,

²⁸tson yatselo kazü gü le hagun mhundyü keyhun temi dan kenikela hontse hagun kenila loho.

²⁹Ligü higü kentsükenche hidan kethyü güle Sunggigü temi nme letse rüchün sinmvu lati tse hagun le shabin nyo.

³⁰Npugü le zo, “Ale johokeshü gü zenlo lo hagun mhundyü keyhun nyu dan jvu then nya, Ale Npugü hagun Sunggigü.”