Read Southern Rengma Naga LEVINYU 19 Bible Online

LEVINYU 19 - Southern Rengma Naga bible

LEVINYU 19

¹Npugü le Mosa ka zoshü

²Israel temi dan ka zoshü lo tseo, “Nshün lo, ale Npugü hagun Sunggigü ale nshün kethyü genyu.

³Ale johokeshü hontse, hagun nmeme tse a-jvü lo a-pvü rühvulo lo Sabbath zen mvuloshvu. Ale Npugü hagun Sunggigü.

⁴“Akheo tero kecha rüshvu nya; tegi pe teromen thyüo tsü rüshvunya. Ale Npugü hagun Sunggigü.

⁵“Hagun le kepvüshe kerüshvu senru dushvu kethyü ka ale khipe hagun ketsü jvü thenlo, lo ale hagun kerüshvu loti.

⁶Senru gü dushvu kethyü jonnyü lo sendu gü thyü gü tyüla mvu loshvu. Thyü lihie jonshen keti nsen bin lo rola mvuloshvu,

⁷tsüle nshünmvu laso, lo ligü higü tsü tyüya tselo ale kerüshvu tsü lo loho.

⁸Ligü higü tsü ketyü güle thyü kenshün pe atsü kela tsüpe kedukeru thyü kela genyu kemu pfüti, lo a-le atemi letse rüchün sinmvu lati.

⁹“Nle nlow gvü kethyü ka a-temhun tsü gvü nya.

¹⁰N vain low nyu rani gü vain sha nmhin kela dan fü kequen nmvue che kela dan jün nya; khepe kendinyu lo tesin dan tsüla lo. Ale Npugü hagun Sunggigü.

¹¹“Rühu nmvue mesalo nmvue nku nya.

¹²Nle then kemvui yatselo azan zo-o swe nya, tsüle azan nrhula hünyo. Ale Npugü hagun Sunggigü.

¹³“Nle me nshwe nmvue a-hon selo nrün ndi. Nle jonshe chün pe tsümvuo khejeme khinbin lo nrün ndi.

¹⁴A-yhütingwa kemvunyu swe tsünya nmvue tha pe yhükepo nyu mhundyü ka shüo no a-pha nsü nya. A nshvulo; Ale Npugü hagun Sunggigü.

¹⁵“Nle jokera kethyü ka kenjü lo ketsinnyu jopenlo; kendi gü njün nmvue kenya gü nshvunya.

¹⁶Nkuo temi nme rüla zo nshvunya, lo temi peha no sila titseo a-jünkera kebin ka nle a-chye lo kegwa rüla shabin yatselo zoshü. Ale Npugü.

¹⁷“Nle me rüchün nshvunya, ai a-genyu kemu thyüla mvu nrün genyu hai kenthon penlo la mvuloshvu.

¹⁸Temi nme ge hagun khünzo ni nmvue a-nrhizin bin nya, ai nkazon nyu so pe n npvü nkeso hontselo. Ale Npugü.

¹⁹“A johokeshü dan zenlo. N senru no senru a-zan kecha chon nya. Low nme nyu ntsi kecha kenyhun pe shünya. Kechacha kethyü kenyhun pe kedo phi ben nya.

²⁰“Do gi nme le temi nme thenu thyü bin lo tsügü le a-min thyü lao a-hoshü kela thyü mvu kebin ka kechanyu nme le zen zhüla yatselo shaja pe au tsüti ai dushvu lo nrün ndi, a-le do gi genyu.

²¹A-le tejvu gwenrho kela kerüshvu genyu tanyü tse nme sen-o ale kehü Phika gü khenpvü ka ryüti,

²²lo Püshükeda gü le tsü pe kemu sentinla nrün a-rora thyü lao Sunggigü le a-kemu jüpe tsüti.

²³“Hagun le Kanan kazü nyu ryülo-o terasha bin lihie sen yatselo, chenkeri chenshen tsüle terasha gü le nshünmvu tse rüchün mvuloshvu. Tsü gwenkho ka hagun le tyünya.

²⁴Chenzi chen terasha tsü aphu thyü kenshün pe atsüo Npugü chenkeno tsinshü mvuloshvu.

²⁵Ai chenpvün chen hagun le terasha gü tyü logwa. Hagun le hi aphu thyü yatselo hagun rasha le nsha kvu loti. Ale Npugü hagun Sunggigü.

²⁶“Tezi pe kesin-o thyü nme tyünya. Temvu nme thyü nya.

²⁷Hagun peshwehun nmvue hagun mün hü tsela nya

²⁸hagun ge thazü nmvue kesi genyu hagun thyü rüthüo chechü nya. Ale Npugü.

²⁹“Nnyu gi dan no kerüshvuka nyu keyüla chün ketyünyu thyüo keja pfünya, nle tson yatselo rani tero kecha ki güo serikemvu le kazü gü sü lati.

³⁰Sabbath thenlo, lo a-kershvubin gü rühvulo. Ale Npugü.

³¹“Kesinyu kapu nthon kehü nyu ki gü tha ketso nya. Nle tsü thyü yatselo nshünmvu lati. Ale Npugü hagun Sunggigü.

³²“Püshünyu mhundyü solo lo rühvulo. A rühvuo ajo zenlo. Ale Npugü.

³³“Hagun kazü ka kebin tesin dan ge a-zükemvu thyünya.

³⁴Israel nyu ge thyü kehü hontse anyugen thyülo, lo n npvü nkeso hontse anyugun solo. Hagun ko gwengwa me Ijipt ki tesin thyü kehü tsü rüchünlo. Ale Npugü hagun Sunggigü.

³⁵“Nkuo kethon, kensu, nmvue kechonkerho kenda ka mesa nya.

³⁶Kesükü, kensu lo thakendo ka ketsin senlo. Ale Npugü hagun Sunggigü, Ijipt nyu hagun zenchwi keryü güle.

³⁷A tejvü lo a johokeshü aphu zenlo. Ale Npugü.”