Read Southern Rengma Naga LEVINYU 2 Bible Online

LEVINYU 2 - Southern Rengma Naga bible

LEVINYU 2

¹Ligü higü shyeni pe Npugü rüshvu titse lo, a-le tsü dun shwelo. Oliv terzü lo tharün kegwa jape tsü ge shüo,

²senryü Aaron nyu püshükeda dan tsüshü mvuloshvu. Lo Püshükeda güle tho jenthün gwa, terzü lo tharün kegwa aphu pe kershvubin ge ro-o tsü aphu pe Npugü rüshvukebin zansü thyü shüti. Ketyüketsü kerüshvu rün hi Npugü le a-kenyü.

³Shyeni pe kerüshvu thyü kensen tsüle püshükedanyu hon; tsüle ketyüke tsü pe Npugü kerüshvu ka khikelo genyu nshünsa.

⁴Kerüshvu tsüle maphun nyu tsen kelo tensü yatselo, kebu no shükemvu mvulo shvu. Tsüle oliv terzü pe tho kerhüo kethyü tensü kesü nmvue tensü kerüpvü oliv terzü pe yün kethyü logwa.

⁵Kerüshvu gü tsüle ketsen khun ge tsen kelo tensü yatselo; tho pe oliv terzü ka kerhün ai kebu shükemvu ti.

⁶Nle tsü pe rüshvu kethyü ka boren lo njüo terzü jape shülo.

⁷Kerüshvu gü tsüle tensü yatselo tho lo oliv terzü ketsenkhun ka tsenlo mvuloshvu.

⁸Tsü senryü Npugü rüshvuo püshükedagü tsüshü, lo a-le tsü sen kershvubin ka güti.

⁹Püshükeda gü le tsü aphu pe Npugü rüshvu tse kethyü zansü peha khilo-o pe kershvubin ge ro shüti. Ketyüketsü kerüshvu rün hi Npugü le a-kenyü.

¹⁰Kerüshvu thyü kensen tsüle püshükeda nyu hon; tsüle ketyüketsü pe Npugü kerüshvu ka khikelo genyu nshün sa.

¹¹Hagun le shyeni pe Npugü kerüshvu lihikae kebu no shü lo nrün ndi; hagun le ketyüketsü pe Npugü kerüshvu ka kebu nmvue khuzü sen nya.

¹²Chen kechwi hagun logvü lokeri sen Npugü ki ryüti; ai tsü pe kershvubin ge ro nrün genyu mvu.

¹³Ketyüketsü kerüshvu aphu ka tsi pe shülo, tsi le Sunggigü hagun jaka kejozenkelo gü sun genyu. (Hagun kerüshvu aphu ka tsi pe shü mvulo shvu.)

¹⁴Nle logvü lo keri sen Npugü rüshvu keryü ka shvukela nmvue dun kela pe rüshvulo.

¹⁵Oliv terzü lo tharünkegwa pe sinlo.

¹⁶Püshükedagü le ketyüketsü, terzü lo tharün kegwatsin aphu rope ketyüketsü pe Npugü rüshvu kebin zansü thyüti.