Read Southern Rengma Naga LEVINYU 20 Bible Online

LEVINYU 20 - Southern Rengma Naga bible

LEVINYU 20

¹Npugü le Mosa ka zoshü

²Israel nyu ka zoshü lotse, “Hagun nmvue tesin hagun dannyu yhunkebin ligü higü a-nyu pe Molek tero gü rüshvu yatselo süda no tsope jonshvu lati.

³Ligü higü a-nyu pe Molek tsüo a phika kenshü gü nrhu lo a nshwen yatselo ale a-ntsun ti lo a-le atemi letse rüchün sin mvu lati.

⁴Ai süda gü le a-le thyü keshü tsü rüchün shümvuo a-dushvu mvula yatselo,

⁵Ale temi tsügü lo a-kami apentha lo a-zen kerhün-o Molek kerüshvu dan ntsunti. Ale anyugun le atemi letse rüchün sinmvu lati.

⁶“Ligü higü kesinyu kapu zen kenthon kehü nyu ka tha ketso yatselo ale a-ntsunti, lo a-le atemi letse rüchün sinmvu lati.

⁷Hagun npfü hagun thyü kenshünlo, ale hagun Sunggigü genyu.

⁸A tejvü dan zenlo, ale hagun thyü kenshün shü kehü Npugü.”

⁹Npugü le tejvu higü khishü. Ligü higü a-pvü lo a-jvu swe ketsü gü boshvu la mvulo shvu; a-le sikela tsüle a-npfü a-ge.

¹⁰Israel nyu nme le Israel nyu nme nu zen keyüla layatselo a-ko lo tenu gi ko tse boshvula mvuloshvu.

¹¹Temi nme le a-pvü nu zenzhü yatselo a-pvü nshwe laso, tsügenyu a-ko lo tenu gi ko tse no sila mvulo shvu. Au le sikela tsüle au npfü au ge.

¹²Temi nme le a-mo nyu zenzhü yatselo au kenyhun nren boshvula mvuloshvu. Au le khinyunyu nrhu kela genyu au le sikela tsü le au npfü au ge.

¹³Pechenyu nme le tenunyu zenkezhü hontse pechenyu nme zenzhü yatselo, au le kentsükenche thothyü kela genyu au mihvu nren boshvu lati. Au le sikela tsüle au npfü au ge.

¹⁴Temi nme le tenunyu nme pe tsügi jvu sin-o loya tselo anyugun le kenshwe kenyhün tho thyü kela genyu mishen nren mah pe roshvu lati; tsühontse kethyü no hagun dannyu bin loho.

¹⁵Temi nme le nyukhu nme zenzhü lo a-ko lo nyukhu güe boshvu lati.

¹⁶Tenunyu nme le nyukhu no a-zenzhü titse ndo yatselo tsügi lo nyukhu güe boshvu lati. Au kesi le au npfü au ge.

¹⁷Temi nme le a-npfü a-lügi nmvue a-pvü nmvue a-jvu nyugi loya tselo süda mhundyü nyu kemenio hüla mvu loshvu. A-npfü a-lügi zenzhü kela chün a-le kenjünthyü mvuloshvu.

¹⁸Temi nme le tenunyu nme le shyekechwi jvu thyü kebin ka zenzhü yatselo süda dan nyu au mihvu nren hüla mvu loshvu, au le kenshün jvu borho kela genyu.

¹⁹Temi nme le a-nyü zenzhüla yatselo, au mihvu nren khinyu nyu nrhukela chün kenjün thyü mvulo shvu.

²⁰Temi nme le a-nyo nu zenzhüla yatselo, a-le a-nyo nshwe laso a-ko lo tenu-e tse kemuchün thoti; au ge tsipwen yhun loho.

²¹Temi nme le a-tsasikezen nu loyatselo au no nyu ndio siti. A-le nshünkemvu tho nme thyüo a-tsasikezen nshwe laso.

²²Npugü le zoshü, “Ale hagun zen-o gü kejü kanan kazü gü no hagun kenila mvu nrün genyu a tejvu lo a johokeshü dan aphu zenlo.

²³Tsünyu keyhun nyu dan jvuthen nya; hagun no yü nrün genyu temi tsüdan hü bin nyo. Anyugun serikemvu tho tsüdan aphu genyu ale anyugun shwintsü laso.

²⁴Ai ale kazü kebwe kegwa higü pe hagun tsü titse zo njü lo ale tsü pe hagun tsü ti. Ale Npugü hagun Sunggigü, tsipwen kecha dan nyu hagun khikho kelo güle.

²⁵Tsügenyu hagun le nyukhu lo tegü kenshün lo nshünkemvu dan pe kechacha thyülo. Nyukhu nmvue tegü nshün kemvu dan tyünya. Ale tsüle nshünmvu letse laso, tsügenyu tsü tyülo hagun gwün nrhu lati.

²⁶Hagun le nshün-o ahon thyüti, ale Npugü ale nshün kethyü genyu. Hagun pe a npfü ahon thyü nrun genyu ale tsipwen kecha dan nyu hagun khikho kecha thyü laso.

²⁷“Peche-e tenu-e kesinyu kapu kenthon gü tso pe jonshvu lati; a-le sikela tsüle a-npfü a-ge.”