Read Southern Rengma Naga LEVINYU 21 Bible Online

LEVINYU 21 - Southern Rengma Naga bible

LEVINYU 21

¹Npugü le Mosa no Aaron nyenyu dan ka, “Püshükeda nyu nme-e a-shvunye nyu kesi ka güo a-thyü nrhu la nyalo tse zoshü lotse johoshü,

²tsüle a-jvu, a-pvü, a-nyu peche nmvue tenu, a-tsasikezen

³nmvue a-lügi kalu mvuzun-o a-kanyu kebin nyu kemvu we.

⁴Tenu kelo ka a-nye thyükelo nyu kesi ka güo anpfü a nrhu lanya.

⁵“Püshükeda nyu nme no a-pe thu, nmvue a-münhü tse nmvue a-thyü rüthüo a-nyugwamvu kebin pe mehi loho.

⁶A-le nshün mvuloshvu lo a-zan nrhunya. A-le ketyüketsü pe a rüshvu hü tsügenyu nshün mvulo shvu.

⁷Püshükedanyu nme le tenunyu keyülachün ketyünyu nmvue phousen kemvu nmvue a-nyepfü le khekela nyu lo loho; a-le nshün.

⁸Temi no püshükeda gü le nshün tse rüchün mvuloshvu, a-le ketyüketsü pe arüshvu kehü genyu. Ale Npugü, ale nshün lo ale atemi thyü kenshün shühü.

⁹Püshükeda nyu nyugi nme le keyülachüntyü yatselo, tsügi le a-pvü nshwe laso; mah pe a-roshvu lati.

¹⁰“Püshükengun gü terzü jape a-pe ge shüo thyükenshün pe no püshükeda phinya sen hü, tsügenyu a-le chükebin zansü a-pe whenmvu nmvue a-phi sürhepfü loho.

¹¹A-khikho keshün kecha thyüpe atsü laso, lo a-npfü a-pvü nmvue a-jvu yatse-e kesi le kebin kakhwün nyu yüo a-npfü a-nrhu nmvue a kenshün phika gü khe lao tsü nrhu lo nrün ndi.

¹³A-le lünyu phousen loti,

¹⁴Maginyu, nmvue mele lo-o khekela nmvue keyüla chün ketyü nyu lo loho. A-npfü a-temi dan nyu phousen nyu loti.

¹⁵Kemvu we anyenyu nshün mvulo keshvui dan le nshün mvu lati. Ale Npugü, ale a-khikho pe Püshükengun gü thyü laso.”

¹⁶Npugü le Mosa ka zoshü

¹⁷Aaron ka zoshü lotse, “Ntsipwen a-keyhun kephukemvu nme no ketyüketsü senryü arüshvu nya. Ryükejü gwenkho aphu nyu hihontse ti.

¹⁸A-keyhun kephukemvu nmeno tha senryü arüshvu nya: a-yhükepo, phayho, a-hinkon kenren nmvue a-zojagwakemvu:

¹⁹a-pha nmvue a-ben gwakemvu:

²⁰a-sen ketse nmvue kuzükemvu; a-yhütyü keteshe nmvue kenkhünyu; lo a-züshe boshwe kelanyu.

²¹Aaron tsipwen a-keyhun kephu kemvu nme no ketyüketsü senryü arüshvu nya.

²²Tsühontse kethyü nyule ketyüketsü pe akerüshvu kenshün lo kenshüntsin hon dan tyü logwa;

²³ai a-le keyhun kephu kemvu genyu phi süden kenjü kenshün gü lo kershvubin gü kho nni ryü loho. A-no kenshün hon dan nrhu la nya, ale Npugü a-nyugun thyü kenshün shü kehü gü genyu.”

²⁴Tson-o Mosa le hi pe Aaron, Aaron nyudan lo Israel nyu aphu ka zoshü.