Read Southern Rengma Naga LEVINYU 22 Bible Online

LEVINYU 22 - Southern Rengma Naga bible

LEVINYU 22

¹Npugü le Mosa ka zoshü

²pe Aaron lo a-nyudan ka zoshü lotse, “Hagun azan kechen la mvu nrün genyu Israel nyu le khikho pe aketsü kenshün kerüshvu hon dan rühvulo. Ale Npugü.

³N tsipwen nme le a-le nshünmvu kebin ka Israel nyu le khikho pe a ketsü kenshün kerüshvu dan kho nniryü yatselo, a-le kershvubin ka lothyü nilo nrün ndi. Hile ryükejü gwenkho aphu nyu honti. Ale Npugü.

⁴“Aaron tsipwen nme nyu le tyü nmvue a-ge tsun chwiryü kehü güle nshün lokemvu kawe kerüshvu hon kenshün dan tyülo nrün ndi. Püshükeda nyu lihigü simin kesüo nshün mvula nmvue a-phouzü tsunla,

⁵nmvue nyukhu nshünkemvu nmvue temi kesüla yatselo.

⁶Püshükeda ligü higü nshünmvu kela güle nshünmvu bin-o ngwün gü titi, lo a-le zülu la kemvuthen kerüshvu hon kenshün dan tyülo nrün ndi.

⁷Yhüko keche siki a-le nshün laso, lo kerüshvu hon kenshün dan tyü logwa tsüle a-chvü.

⁸A-le nyukhu a-npfü kesi nmvue ntün thyü tyü loho; tsüle a-nrhu la logwa; Ale Npugü.

⁹“Püshükedanyu aphu ale khikeshü tejvu gü thenti. Kemvu we, anyugun le a tejvu kenshün gü then mvutse mu lao si lati. Ale Npugü anyugun thyü kenshün keshü gü.

¹⁰“Püshükedagü kaminyu nti a-me, temi kecha püshükeda gü zen kebin nyu nmvue a-le zonshe zenkehü nyu le kerüshvu hon kenshün dan tyü loho.

¹¹Ai Püshükeda güle a-raka pe heikelo a-do, nmvue a-kanyu nnyunkelo nyu le püshükeda güle hyukelo chvü gü tyü logwa.

¹²Püshükedagü nyugi le püshükedanyu kemvu ki kalu layatselo a-le kerüshvu hon kenshün dan nme tyü loho.

¹³Ai püshükedagü nyugi nme a-nyenyu ndio magi nmvue a-nyepfü le a-kheo rani ryü a-pvü kanyu bin hü yatselo a-pvü le hyukelo chvütsü tyü logwa. Püshükeda nyu kami nti tsü lihie tyülo kegwa gwen zin.

¹⁴“Püshükeda kami kemvu nmele shamvuo kerüshvu hon kenshün tyüla yatselo, a-le tsümin lo tsünyeki tsi ka jün nki sin pe Püshükedagü tsüla mvuloshvu.

¹⁵Püshükeda nyu le kerüshvu hon kenshün dan nrhu lanya

¹⁶tyülo tseshü kemvu nyu no tyüo; hile kemu lo shaja senryü temi tsühontse kethyü nyu ge shü logwa. Ale Npugü ale kerüshvu thyü kenshün shü kehü gü.”

¹⁷Npugü le Mosa ka zoshü

¹⁸tejvu hipe Aaron lo a-nyenyu dan lo Israel nyu temi aphu tsü shülo. Israel nyu nmvue tesin Israel nyu dan nyu yhun kebin ligü higü, a-le zoshwishü kenjü nmvue a-kendo thyüo rope kerüshvu hoshü yatselo, senru gü tsü no a-ge tetsin kendi mvuloshvu.

¹⁹Lolo nrün genyu tsüno tse a-ge tetsin nme kendi mvuloshvu.

²⁰Hagun le senru lihie tetsin kepfü khishü yatselo Npugü le tsü lo loho.

²¹Ligü higü a-le zoshwishü kenjü nmvue a-kenyü ka kepvüshe kerüshvu khipe Npugü ketsüka no lotiyatselo tsü no tetsin nme kendi mvuloshvu.

²²Senru lihie a-yhükepo, kenyho, a-pha a-bu ketü, kethyüshvu kepfü nmvue kenkhü pe Npugü tsünya. Senru tsühontse kethyü nme pe ketyüketsü kerüshvu thyüo kershvubin ge shü nya.

²³Nle nkenyü nyu rüshvu kethyü ka senru gonri nmvue penmvu kethyü khishülo gwa, ai zoshwi kenjü thyüpen kethyü nyu we tsü lo loho.

²⁴Senru lihie a-züshe boshwe, duthü, boketa nmvue borhen kela pe Npugü tsünya. Hagun kazü nyu hihontse thyü loho.

²⁵Tesin ki senkeryü senru lihie pe ketyüketsü pe kerüshvu thyünya. Senru tson kethyü tsüle tetsin kepfü, tsü lo kemvui.

²⁶Methu, tanyü nmvue tenyü nme le nchelo yatselo jon tsenyü a-pvü zenbin mvuloshvu, ai tsü siki we pe ketyüketsü kerüshvu kethyü loti.

²⁸Methu nmvue tanyü nmvue tenyü metse khenyü me jon nyü a-pvü a-nyu dushvu kesin nya.

²⁹Chenkeno kerüshvu pe Npugü ketsü ka a-no lolo nrün genyu tejvu dan thenlo;

³⁰tsü jon nyü tsü tyülo, tsü nsen bin-o lonyü gü tinya.

³¹Npugü le zo, “Ajo hokeshü zenlo; Ale Npugü.

³²Azan kenshün bo nrhu nya; Ale nshün, Israel temi aphu sha mvulo shvu. Ale Npugü lo ale hagun thyü nshün shü kehü gü;

³³lo Ale hagun Sunggigü thyü titseo Ijipt nyu hagun zen chwiryü kela gü. Ale Npugü.”