Read Southern Rengma Naga LEVINYU 23 Bible Online

LEVINYU 23 - Southern Rengma Naga bible

LEVINYU 23

¹Npugü le pe Mosa tsüshü

²Israel nyu le rüshvu nrün genyu kequen kelo ka, nyünyü nga genyu tejvü dan pe zoshülo.

³Hagun le jon tsero hagun tho thyüloti, ai jon tsenyü gütsü shalo, Sabbath tsüle kerüyü jon. Tsünyü thatho thyünya ai kequen-o rüshvulo. Sabbath tsüle Npugü hon hagun le lihi ki hüe.

⁴Gwenkho tho kenjü ka nga hidan pe zo senshülo.

⁵Nkenkelo Npugü kerühvu nga tsü shye kerigü jonryü pezi nyü yhüko keche gerho binzenti.

⁶Jon ryü pvün nyü kebushükemvu tensü ketyü nga binzen soti lo jon tsenyü hagun le kebu no keshü tensü nme-e tyünya.

⁷Jonkeri nyü hagun le rüshvu nrün genyu kequen ti lo hagun thonme thyünya.

⁸Jon tsenyü ketyüketsü pe Npugü rüshvuti. Jon tsenyünyü hagun le rüshvu nrün genyu kequen niti, ai hagun tho nme thyü loho.

⁹Npugü le pe hagun tsükebin kazü günyu ryüo hagun low gvü lolo, lowpwe keritsin gü sen püshükeda gü ki ryüti.

¹¹A-le tsü pe kerüshvu kerüche thyüpe Npugü ki shüti, hagun kerüshvu gü lolo nrün genyu. Püshükeda gü le Sabbath jon sinyü tsü sen güti.

¹²Hagun le shye güpe rüshvu kethyü nyü tanyü tse chenme nyu a-ge tetsin kendi nme ko rope kerüshvu thyüti.

¹³Tsüpe tho kilogram kenyhun pe oliv terzü ka kerhüo ketyüketsü kerüshvu thyüti. Kerüshvu higü rün Npugü le a-kenyü. Lo vainzu liter nme ko pe sin-o rüshvuti.

¹⁴Hagun le kerüshvu higü senryü Sunggigü tsü kemvu ka shye keshün, ketegi, keshvu, nmvue pe tensü-e thyü tyünya. Hagun tsipwen dan no ryükejü gwenkho aphu nyu tejvu higü thenti.

¹⁵Sabbath jon sika hagun le low pwe senryü Npugü ketsü nyü swüo hapta tsenyü swülo.

¹⁶Tson-o Sabbath tsenyü gü sika jon henpvün nyütsü shye keshün pe Npugü ketsü kecha nme thyüti.

¹⁷Kami nmeme tse tensü thün hvu senryü jwe kerüche thyü pe Npugü tsüti. Tensü thün mele kebu no shü kethyü tho kilogram kenyhun thyüo low gvü lo keri kerüshvu thyü pe Npugü ki shüti.

¹⁸Lo tensü gü sin-o süda le tetsin kendi chenme nyu tanyü tsenyü, methu tse nme lo tenyü tse kenyhun senryüti. Tsüpe Shye pe kerüshvu lo vainzu pe kerüshvu kesin-o rope kerüshvu thyü pe Npugü ki shüti. Kerüshvu rün higü Npugü le a-kenyü.

¹⁹Kemu genyu kerüshvu tenyü tse nme lo kepvüshe kerüshvu tanyü tse chenme nyu kenyhun ko sin hoshüti.

²⁰Püshükeda gü le tensü lo tanyü kenyhun pe jwe kerüche Npugü ketsü thyü pe püshükedanyu tsü lati. Kerüshvu hidan le nshün.

²¹Tsünyü thame thyünya ai rüshvu nrün genyu kequenlo. Hagun le lika hika yhun-e hagun tsipwen no ryü kejü gwenkho aphu ka hi then ti.

²²Hagun low gvü kethyü ka low temhun gvü nya, lo rani gü sifü nya; kendinyu lo tesin dan genyu tsü khelalo. Npugü le hagun Sunggigü.

²³Shye tsenyü gü jon kerinyü kerüyü jon kecha nme thyü ti, lo hagun le shukekhu nyü lolo rüshvu nrün genyu ryü kequenlo.

²⁵Ketyüketsü pe kerüshvu thyü pe Npugü tsüshü lo hagun tho nme thyü nya.

²⁶Shye tsenyü gü jonryü gü tsüpe temi dan kemu sentin la nrün genyu chenkechwi rora kethyü jon thyüti. Tsü jonnyü thame tyünya; rüshvu nrün genyu ryü kequen lo ketyüketsü pe kerüshvu thyüpe Npugü ki shülo.

²⁸Tsünyü thatho thyünya, tsüle kemu sentinla nrün genyu rora kethyü jon.

²⁹Ligü higü tsünyü tha lihie ketyü güle Sunggigü temi letse rüchün sin mvu lati.

³⁰Lo ligü higü tsünyü tha lihie thyülo Npugü le a-no sila ti.

³¹Hagun le lika hika yhun hü-e tejvü higü hile hagun tsipwen aphu genyu.

³²Shye jon tekü nyü yhüko keche ka gü shye jonryü nyü yhüko keche keti kerüyü jon kecha nme thyü ti, tsügwenkho ka thame tyülo nrün ndi.

³³Then nyu kebin nga le shye tsenyü gü jonryü pvün nyü binzen lo-o jon tsenyü thyüti.

³⁵Jon kerinyü rüshvu nrün genyu ryükequen lo, lo tsünyü thatho nme thyünya.

³⁶Jon tsenyü tsü khenyü tsen ketyüketsü pe kerüshvu thyüti. Jon tetsenyü rüshvu nrün genyu kequennio ketyüketsü pe kerüshvu thyüti. Tsüle kerüshvu jon, hagun le thame thyü nya.

³⁷(Hidan hile nyünyü nga hagun le kehun kequen-o Npugü rüshvu lo nthu nthu mvulo keshvu ketyüketsü pe kerüshvu, rope kerüshvu, shye pe kerüshvu, dushvu pe kerüshvu, lo vainzu pe kerüshvu dan.

³⁸Nga hidan hile hagun le thyü kehü Sabbath, hagun zoshwikeshü thyüpen keshü lo kenyü ka thape Npugü tsü kehü nye kesin le.)

³⁹Hagun low gvü lo lalo, shye tsenyü gü jonryü pvün nyü binzen lo-o jontsenyü nga ti. Jonkerinyü tsü kerüyü jon kecha nme thyüti.

⁴⁰Tsü jonnyü hagun senbin ge a-sha kegwatsin peha senlo, kvunyü lo a-nyü kebin senro peha sen Ngao Npugü hagun Sunggigü rühvu ti.

⁴¹Jon tsenyü nga ti. Tejvu higü hi ryükejü gwenkho aphu nyu hagun tsipwen no then ti.

⁴²Israel nyu aphu jon tsenyü then nyu bin ti;

⁴³Hagun nyenyu no Israel nyu le Ijipt nyu chwiryü kejü ka Npugü le anyugun no thenpon hensin sun kethyü shalo nrün genyu. A-le hagun Npugü Sunggigü.

⁴⁴Hihontse Mosa Le Npugü kerühvu nga then nrün jvu dan pe Israel nyu temi tsüshü.