Read Southern Rengma Naga LEVINYU 24 Bible Online

LEVINYU 24 - Southern Rengma Naga bible

LEVINYU 24

¹Npugü le Mosa ka zoshü

²ahza hidan pe Israel nyu tsüshü lotse: Phika günyu makhin gü no nben zin bin nrün genyu oliv terzü kegwatsin senryülo.

³Khejetsen Aaron le tsü nben shüo no nben bin lonyü gü titi, Npugü kehü Kenshüntsin Bin gü, Kejozenkelo Khinpha le kebin phi süden kenjü sizin. Tejvü higü hi ryü kejü gwenkho aphu nyu then ti.

⁴Aaron le suna ketsin pe kethyü makenben bin ge makhin dan no Npugü mhundyü nyu nben zin bin kelo nucha loti.

⁵Tho kilogram tseryü kenyhun pe tensü thün tseryü kenyhun rolo.

⁶Tson-o pe Npugü kehübin ka kebin suna ketsin pe jeh kethyü miz gü ge tsonhvu thyüo peha zin tseroro thyüshü.

⁷Tensü gü bin ka ketyüketsü pe Npugü kerüshvu zansü tharün kegwa peha pe tson meme ge shüshü.

⁸Sabbath tsen, ryükejü gwenkho aphu nyu tensü gü pe Npugü mhundyü ka shü mvuloshvu. Hile kethonthen Israel tho.

⁹Tensü güle Aaron lo a-tsipwen hon, anyugun le kenshünbin nme ka tsü tyüti, hile püshükeda nyu genyu ketyüketsü pe Npugü kerüshvu nshünsa kethyü genyu.

¹⁰Shelomit tse kethyü nme a-pvü le Ijipt nyu lo a-jvu le Israel nyu, Dan kaminyu ka Dibri nyugi le bin. Kensenbin nyu temi higü le Israel nyu nme zen kega lola. Kega ketseka a-le Sunggigü swetsüla, tson-o anyugun le a-zen Mosa kiryü,

¹²Anyugun le Npugü le anyugun no nyuthyü lotse tiyo khwen-o a-khin njü.

¹³Npugü le Mosa ka zoshü,

¹⁴“Temi tsügü zen kensenbin tegwen ki chwilo. A-le swetsü kebin nyü kethyü nyu aphu a-le mu tsekethyü kon ka ben pe a-ge shüti, tson-o süda gü apentha tso pe a-jonshvu lati.

¹⁵Lo Israel nyu temi aphu ka ligü higü Sunggigü swetsü kethyü gü le a-npfü a-khvu pfüti tse zoshülo,

¹⁶lo a-no silati. Israel nyu nmvue tesin Israel nyu dan nyu yhun kebin ligü higü Sunggigü swetsü kethyü gü le süda apentha tso pe jonshvu lati.

¹⁷“Ligü higü medukeshvu gü dushvu lati,

¹⁸lo ligü higü me senru boshvu lo thoti. Kerhünronzin sun kerhünronzin.

¹⁹“Ligü higü mekechanyu jün layatselo, a-le thyükeshü hontse thyüni pe a-tsüti.

²⁰A-le meru nme bose lalo a-ru nme bose lati; me yhütyü nme bopha lalo a-yhütyü nme bopha lati, mehü nme boryü lalo a-hü nme boryü lati. A-le mekechanyu ge thyü keshü, tsühontse thyüpe a-tsüti.

²¹Ligü higü senru nme boshvu lalo a-sun pe thoti ai ligü higü me dushvu lalo a-ko no siti.

²²Israel nyu lo tesin hagun dannyu keyhun nyu aphu tejvu higü hi thenti, ale Npugü hagun Sunggigü genyu.”

²³Mosa le Israel nyu ka hi zoshü lo anyugun le temi gü zen kensenbin tegwenzin chwigü tsope jonshvu la. Hihontse Israel nyu le Npugü le Mosa ka johokeshü dan thyülo.