Read Southern Rengma Naga LEVINYU 26 Bible Online

LEVINYU 26 - Southern Rengma Naga bible

LEVINYU 26

¹Npugü le zoshü, “Hagun le rüshvu titseo, teromen zü nmvue teromen pe sen ndunshü, tso sen nmvue tso pe teromen thyü nya. Ale Npugü hagun Sunggigü.

²Sabbath jon zen lo lo a kerüshvubin gü rühvulo.

³“Hagun le a tejvu then lo a johokeshü zen-o yhun yatselo,

⁴ale gwenkho to ka tsangri shüti, tson-o low lo senbin dan no nsha shüti.

⁵Hagun low no gwasa-o low gvü bin-o vain sha kelü titi lo vain sha lü bin-o ntsi keshü gwenkho titi. Tson-o hagun le nyu tyünyü yo tsü aphu bin ti, lo hagun kazünyu kenshvu ndio yhun loti.

⁶“Ale gwaketho pe hagun kazü nyu shüti, lo hagun le temi nme nshvumvu tse zhü loti. Ale hagun kazü nyu kenshvu kenrin nyukhu dan hü lati, lo tsünyu teri no binsin loho.

⁷Hagun le hagun shwinyü kemvunyu so kvulati;

⁸hagun minpvün le tsime hü lati lo tsime le yetseryü hü lati.

⁹Ale jochü pe hagun tsüti lo ntsenyu kechon pe hagun tsüti; ale hagun zen kejozen kelo gü tsü then ti.

¹⁰Hagun shye le chonsa-o a-keshün pe shü nrün genyu a-when pe shweti.

¹¹Ale a kenshün Phika günyu hagun dan nyu yhunti lo ale hagun kheo tinla loho.

¹²Ale hagun zen hüti; ale hagun Sunggigü lo hagun no atemi thyüti.

¹³Hagun no me do thyü sinmvu nrün genyu ale Ijipt nyu hagun zenchwi ryükela Npugü Sunggigü le.”

¹⁴Npugü le zoshü, “Ai hagun le a johokeshü zenmvu yatselo shaja pe hagun tsüti.

¹⁵Hagun le a tejvu lo a johokeshü zen mvu lo ale hagun zen kejozenkelo gü borhola yatselo,

¹⁶ale shaja pe hagun tsüti. Ale kenke kemhü ponlo kemvui kethyükenyü, lo yhükepo lo keyhun nke kelai keho senryü hagun ge shüti. Hagun le ntsishü shüe tsü no kenke thyü lati, hagun shwikerüchün nyu no hagun nyekvulo-o tsüle yhunsokeryü tyüla nrün genyu.

¹⁷Ale hagun ntsunti, tson-o hagun no kvulomvu lao hagun kenrhi nyu no hagun so gonti temi nme hü mvue hagun no nshvuo tin ti.

¹⁸“Hihontse kebin sikie hagun le a-jo zenmvu yatselo, hagun shaja hi gwen tsenyü pe sin shüti.

¹⁹Ale hagun ketekho boshe shüti; tsangri shümvu lao hagun kazü no sin pe tegi kenko hontse lati.

²⁰Hagun no hokeli pe thaja thyü lati, hagun kazü no tha yhun mvula lo senbin no nsha shümvula nrün genyu.

²¹“Tson-o hagun le a ntsun lo ajo zenmvu bin yatselo, ale hagun shaja gwentsenyü pe sin ni shüti.

²²Ale tehenthyü kensho nipe hagun dan nyu shüo no hagun nyenyu tün lo hagun senru nke lati, lo hagun no temi rho lao hagun tsonda no rin lati.

²³“Shaja hi aphu siki-e hagun le a khwenyü mvuo azan thyü nshvu yatselo,

²⁴ale himhundyü nyeki shaja kerü gwentsenyü pe hagun ge shüti.

²⁵Ngun kejozenkelo borho kela genyu ale teri senryü hagun ge shüti. Lo hagun le nyidanyu kequen lolo ale kenpen nipe hagun dan nyu shüo hagun pe shwikerüchün nyu ben ka shü lati.

²⁶Ale hagun chvü le ryükehü tson khin lati; tson-o tenunyu mitseryü no anyugun tensü kebin aphu pe maphun nme ka roti. A-nyugun le kenjün ketun shüo hagun le aphu tyü lao nnyo binti.

²⁷“Hi aphu siki-e hagun le azan thyü nshvu lo a jozenmvu bin yatselo,

²⁸ale nyukekhü nyu rani ryüo himhundyü nyeki keshvu shaja gwentsenyü pe hagun ge shüti.

²⁹Hagun no nnyo ritsin-o hagun nyenyu thyü tyüti.

³⁰Ale kazüthun gen hagun kershvubin dan, tharün kegwa pe kerüshvu bin dan tsü nke lati, lo hagun kesimin shwe pe hagun teromen le keto kebin so shü lati. Hagun shwi ntsü rio

³¹ale hagun nyida dan nkela, hagun kershvubin dan gwen la, lo hagun kerüshvubin dan lomvu lati.

³²Ale hagun kazü nke lao hagun shwikerüchün nyu hagun kazü khinkelo nyu no shwipe a-kekerü thyüti.

³³Ale teri senryü hagun dan nyu shüo hagun hü kezen pe kazü kecha ki shü lati. Hagun kazü no rinryü la, lo nnyida dan nke lati.

³⁴Tson-o kazü güle nle kerüyü pe tsümvu kela rüyüshü kethyü chen thyüo shekerhün thyüti; nle khalao nshwikerüchün nyu kazü ki kehü ka tsü tsüle ryüyü loti.

³⁶“Ale hagun me kazü ki kehü dan thyüpe no nshvuo tsangkenbu le zonyü whün keshü khwe-e nyüo tinti. Teri le hagun hü kebin hontse hagun no tin-o, shwikerüchün nyu le hagun kho ka ndie che lati.

³⁷Temi nme hagun hü mvue hagun no khinyu nyu ge pha nsü ti, lo hagun no shwikerüchün nyu nme-e nren loho lati.

³⁸Hagun no kazü kecha ki si lati, shwikerüchün nyu kazü gü no hagun nyilo lati.

³⁹Hagun shwikerüchün nyu kazü ki simvu kelo temi kerho dan-e hagun npfü hagun kemu lo hagun pvübon nyu kemu genyu hagun phusherhün mvu lati.

⁴⁰“Ai hagun tsipwen dan le anyugun kemu lo a-nyu pvübon nyu le a ntsun-o ajozen mvu kela kemu dan lothyü lao;

⁴¹ano anyugun ntsun-o anyu nipe shwikerüchün nyu kazü ki shükela zoshwi ti. Tson-o siki hagun tsipwen dan le tsenyo-o anyugun kemu lo a-jozenmvu kela genyu kenjün thyü kelo shao anyugun nyu kelu lolo.

⁴²Ale Jakob, Isak lo Abraham dan zen-o kejozenkelo gü rüchün loti, tson-o ale kazü gü pe atemi dan tsüti tse ajoshü kenjü gü thyü keshün ni shüti.

⁴³Tson-e kazü güle temi dan no a-khe lao, rüyüshüo ketegvü lo riti, lo anyugun le atejvü lo a johokeshü kenikela genyu shaja hyupen lo mvulo shvu.

⁴⁴Tson ai anyugun le anyu shwikerüchün nyu kazü ki kehü ka ale anyugun kheshüla nmvue nkela loho. Tson yatselo ale anyu zen kejozenkelo gü tsüle a-kenithyü lati, Ale Npugü anyugun Sunggigü.

⁴⁵Ale Npugü, anyugun Sunggigü thyü nrün genyu tsipwen aphu mhundyü nyu a kekvu pe hio Ijipt nyu anyu zen chwikeryü ka anyu pvübon nyu zen kejozenkelo gü thyü keshün niti.”

⁴⁶Hidan hi aphu Npugü le Sinai kazüthun ge Israel nyu genyu tejvu lo johokeshü pe Mosa tsüshü.