Read Southern Rengma Naga LEVINYU 27 Bible Online

LEVINYU 27 - Southern Rengma Naga bible

LEVINYU 27

¹Npugü le pe Mosa tsüshü

²Israel nyu genyu tejvü hidan hi. Zoshwikenjü thyüpen nrün genyu temi nme pe Npugü tsü kela ka, pisa pe a-mi thyü lao temi gü hoshü la logwa;

³aphu sen kehü ha hontse: - Pechenyu chen nki kagü hentsero keti: rakagi henpvün - tenunyu yatselo: rakagi shenryü - pechenyu chen pvün kagü nki keti: rakagi nki - tenunyu yatselo: rakagi tseryü - pechenyu nyuhonyu kagü chen pvün keti: rakagi pvün - tenunyu yatselo: rakagi kenshen - pechenyu chen hentsero sa: rakagi tseryü pvün - tenunyu yatselo: rakagi tseryü.

⁸Zoshwikeshü temi güle rhadyü rio mele senkehü kho tsüpe a-mi thyülo hoyatselo, a-le temi tsügü zen püshükeda gü ki ryüo, püshükeda güle temi güle a-mi thyülo kegwa ka tho tsenyu shüti.

⁹Zoshwi keshü tsüle pe Npugü rüshvu lo kegwa senru nme yatselo jwe lihie pe Npugü ketsü tsüle nshü,

¹⁰tsügenyu zoshwi keshü güle senru kecha pe tsü sun thyü mvue gwa. A-le kecha pe tsü kelu yatselo kenyhun nren Npugü hon.

¹¹Ai zoshwi keshü senru gü tsüle pe Npugü rüshvu hükemvu nshün kemvu senru nme yatselo, temi güle senru gü sen püshükeda gü ki ryüti.

¹²Lo Püshükeda gü le kegwa keshvu shwio, a-mi tho shülo, tsüka thyüti.

¹³Temi güle heinilo lanyü yatselo, a-le a-mi nyeki jüntsi ka nki pe sin-o a-mi thyü mvu loshvu.

¹⁴Temi peha le a-ka khikho pe Npugü tsü yatselo püshükeda güle kegwa keshvu shwio a-mi tho shülo tsüka thyüti.

¹⁵A-ka khikeshü güle heinilo nyü yatselo, a-mi nyeki jüntsi ka nki pe sin-o a-mi thyüti.

¹⁶Temi nme le a-kazü peha khikho pe Npugü tsü yatselo, ntsi dikho pe shü logwa yo tsü rüchün-o a-mi thoti, thoshe kilogram nki no keshü pe rakagi tseryü ka.

¹⁷A-le Jubilee thyüo tsüsi chen kazü gü khikho shü yatselo a-mi a-phu.

¹⁸Ai a-le tsüsiki khikho shü yatselo püshükeda güle Jubilee ti nrün chen dikho bin zun yo rüchün-o a-mi sen-o tho shüti.

¹⁹A-low khikho keshü güle heinilo lanyü yatselo a-mi nyeki jüntsi ka nki pe sin-o a-mi thyüti.

²⁰A-le Npugü ka low tsügü heinilo lari mvuo pe kecha nyu ka jwe yatselo a-le tsü heinilo kegwa akenjü ndi laso.

²¹Tsü sigü Jubilee ka low tsügü le kethonthen Npugü hon laso; tsüle püshükeda nyu hon thyü lati.

²²Temi nmele a-le hei kelo low nme khikho pe Npugü tsü yatselo,

²³Püshükeda gü le ryükejü Jubilee keti rüchün-o a-mi tho shüti, lo temi tsügü le tsünyü a-mi thyüla mvulo shvu; pisa güle Npugü hon.

²⁴Jubilee chen low güle ranio kerika low npugü lo a-tsipwen dan ki nigü lati.

²⁵Thami aphu mele sen kehü ha ka tho küti.

²⁶Senru nyuri gü tsüle Npugü hon, tsügenyu temi nme a-kendo thyüo tsü khikho pe a-tsü mvue gwa. Methu, tanyü nmvue tenyü nyu tsüle Npugü hon,

²⁷ai senru nshün kemvu nyuri dan we mele sen kehü ha ka a-mi tho keshü nyeki jüntsi ka nki pe sin-o nle hei nilo lagwa. Hei nilo mvu yatselo mele sen kehü ha ka temi kechanyu peha ka jwe lo lagwa.

²⁸Lihi thyüe khikho pe Npugü tsü laso tse kethyü dan we, tsüle temi, senru nmvue kazü yatse-e temi nme jwe nmvue hei nilo nrün ndi. Tsüle kethonthen Npugü hon.

²⁹Lihithyüe khikho pe Npugü tsü laso tse kethyü gü tsüle temi yatse-e a-hei nilo nrün ndi, a-no sila mvu loshvu.

³⁰Kazü günyu hyukelo shye nmvue terasha-e aphu jüntseryü ka jünme le Npugü hon.

³¹Temi nme le tsü hei nilo nyüyatselo mele sen kehü ha ka lo tsünyeki jüntsi ka nki pe sin-o hei logwa

³²Senru lihie tseryü ka nme le Npugü hon. Senru lihie swüo tseryü gü tsüle Npugü hon.

³³Senru npugü le kegwakeshvu shwio gwakemvu dan kejüshü lo nrün ndi, lo nme-e kelu lo nrün ndi, a-le senru nme pe kecha nme kelu tiyatselo kenyhun nren Npugü hon thyü lati lo hei nilo nrün ndi.

³⁴Hidan hile Israel nyu genyu Npugü le Sinai kazüthun ge pe Mosa ketsü johokeshü dan.