Read Southern Rengma Naga LEVINYU 3 Bible Online

LEVINYU 3 - Southern Rengma Naga bible

LEVINYU 3

¹Ligü higü methu nme pe kepvüshe kerüshvu thyü yatselo, tsü le a-tse nmvue a-lü tetsin nme kendi ti.

²Temi gü le a-ben pe senru gü pe ge shüo Npugü kehü Phika gü khenpvü ka tsü dushvu ti. Lo Aaron nyu püshükeda dan le tezi gü shwe pe kershvubin gü te lizin hizin a-phu ka shüti

³lo senru thyü hidan pe ketyüketsü kerüshvu thyü pe Npugü ki shüti: a-ri ge keshvu aphu,

⁴a-kisha lo tsüge kebin keshvu lo a-sen kegwa tsin.

⁵Püshükeda gü le hi aphu pe rope kerüshvu kesin-o kershvubin ge ro lati. Ketyüketsü kerüshvu rün hi Npugü le a-kenyü.

⁶Tanyü nmvue tenyü nme sen-o kepvüshe kerüshvu thyü yatselo, tsüle tse nmvue lü-e logwa ai tsüno a-ge tetsin nme kendi mvulo shvu.

⁷Temi nme le tanyü nme pe rüshvu yatselo,

⁸a-le a-ben pe tsügü pe ge shüo phika gü mhundyü nyu tsü dushvu loti. Püshükedagü le a-zi shwe pe kershvubin lizin hizin aphu nyu shü ti,

⁹lo senru gü thyü hidan pe ketyüketsü kerüshvu thyü pe Npugü ki shüti: a-keshvu, a-senru khoka a-ma duthü kelo ge keshvu, a-ri kerho aphu,

¹⁰a-kisha lo tsüge keshvu dan, lo a-sen kegwatsin.

¹¹Püshükeda güle hi aphu pe kershvubin ge ketyüketsü kerüshvu hontse rope Npugü ki shü lati.

¹²Temi nme le tenyü nme pe rüshvu yatselo,

¹³a-le a-ben pe tsügü pe ge shüo phika gü mhundyü tsü dushvu loti. Püshükeda gü le a-zi shwe pe kershvubin te lizin hizin aphu nyu shü lati,

¹⁴lo thyü hidan pe ketyüketsü kerüshvu thyü pe Npugü ki shüti: a-ri kerho aphu,

¹⁵a-kisha tsü ge kebin keshvu, lo a-sen kegwatsin,

¹⁶Püshükeda gü le hi aphu pe kershvubin ge rope ketyüketsü kerüshvu Npugü kenyü thyü lati. A-keshvu aphu Npugü hon.

¹⁷Israel nyu nme no a-keshvu nmvue a-zi tyü nya. Israel nyu le lika hika yhun hü-e kethonthen hipe tejvu nme thyüo then hüti.