Read Southern Rengma Naga LEVINYU 4 Bible Online

LEVINYU 4 - Southern Rengma Naga bible

LEVINYU 4

¹Npugü le Mosa no,

²Israel temi dan ka ligü higü shamvuo Npugü johokeshü lihie borho kela nyu no tejvu hidan then ti tse zoshü lotse shü.

³Püshükengun gü le kemu thyükela genyu kemu khvu le temi dan ge bin la yatselo, a-le methu tsebwe a-ge tetsin nme kendi senryüo a-kemu rora thyüpe Npugü ki shüti.

⁴A-le methutse gü zen phika gü khenpvü ka ryü, a-ben pe tsügü pe ge shüo Npugü mhundyü nyu tsü dushvu ti.

⁵Tson-o Püshükengun gü le methu tse gü zi peha sen-o phika gü nyu yüti.

⁶A-le a-zenkero pe tezi günyu ntsen lo njüo kesunphi kenshü gü mhundyü nyu gwen tsenyü ge kezen shüti.

⁷Tson-o a-le tezi peha pe phika günyu tharünkegwa kershvubin qvün ka a-to dan ge shü ti. A-le tezi nsenkebin tsü jape phika khenpvü ka rope rüshvu kehü kershvubin gü phasin ka shü lati.

⁸Ale methu tse gü ge a-keshvu aphu, a-ri kerho,

⁹a-kisha lo tsü ge a-keshvu lo a-sen kegwatsin khilo ti.

¹⁰Püshükeda gü le, a-le kepvüshe kerüshvu genyu senru dushvu kelo ka a-keshvu pe shü kehü hontse keshvu hidan khipe rope kershvubin thyü kehü bin ge ro lati.

¹¹Ai a-le methu tse gü a-gi, a-thyü aphu, a-pe, apha lo a-sen a-ri sin,

¹²aphu sen-o kensenbin tegwen ki gü jonbü jala kehü bin kenshün nme ka tesen soge ro lati.

¹³Israel nyu temi süda le shamvuo Npugü johokeshü borho-o kemu thyüla yatselo

¹⁴kemu gütsü shalo nyemhun süda güle kemu ro kethyü methu tse bwe nme san ryüti. A nyugun le tsü sen-o Npugü kehü phika gü ka ryüo;

¹⁵sharhinyu dan no ben shwe pe tsügü pe ge shüo tsüka dushvu loti.

¹⁶Püshükengun gü le methu tse gü zi peha sen-o phika günyu yügü

¹⁷a-zenkero pe tsünyu ntsenlo-o kesunphi gü mhundyü nyu gwen tsenyü ge kezen shüti.

¹⁸A-le tezi peha pe phika günyu tharün kegwa kershvubin qvün ka a-to dan yün shüti lo a-sen jape, phika gü khenpvü ka kebin rope kershvubin gü phasin ka shü lati.

¹⁹Tson-o a-le tsü keshvu aphu pe kershvubin ge ro lati.

²⁰A-le kemu ro kethyü methu tse gü pe kethyü hontse methu tse higü ko pe tson lati lo hihontseo a-le temi dan kemu genyu rora thyüo anyugun kemu jü lati.

²¹Tson-o a-le methu tse gü sen-o kensenbin tegwen ki gü a-npfü a-kemu ro kethyü methu tse gü tsü hontse ro lati. Hile süda gü kemu sentin kela kerüshvu.

²²Kekvu kesen nyu nme le shamvuo Npugü johokeshü nme borho lao mula yatselo,

²³a-le mukela shalo nyemhun a-no tetsin nme kendi tenyü tse nme sen ryüti.

²⁴Lo a-le a-ben pe tsü gü pe ge shüo, rope kerüshvu thyü kehü senru dushvu kehü kershvubin teso zin tsü dushvu loti. Hile kemu sentinla nrün kerüshvu.

²⁵Püshükeda güle a-zankoro pe senru gü zika ntsen lo-o pe kershvubin qvün ka a-to dan yün shü lo a-sen jape kershvubin phasin ka shü lati.

²⁶Tson-o a-le kepvüshe kerüshvu genyu senru dushvuo a-keshvu kero hontse tsü keshvu aphu pe kershvubin ge ro lati. Hihontseo püshükeda gü le kekvukesen gü kemu rora thyü lao a-kemu jüpe tsüti.

²⁷Mija nyu nme le shamvuo Npugü johokeshü nme borho lao mula yatselo,

²⁸a-le mukela shalo nyemhun a-no tetsin nme kendi tenyü lü nme senryüti.

²⁹A-le a-ben pe tsügü pe ge shüo rope kerüshvu thyü kehü senru dushvu kehü kershvubin tesozin tsü dushvu loti.

³⁰Püshükeda gü le a-zenkero pe senru gü zi nyu ntsenlo-o pe kershvubin gü qvün ka a-to dan yün shü lo a-sen jape kershvubin gü phasin ka shü lati.

³¹Tson-o a-le kepvüshe kerüshvu genyu senru dushvu kethyü ka a-keshvu khila kehü hontse a-keshvu aphu bolati, lo a-rün Npugü no a-kenyü nrün genyu pe kershvubin ge ro lati. Hihon tseo püshükeda gü le temi gü kemu rora thyü lao a-kemu jüpe tsüti.

³²Temi nmele kemu ro kethyü genyu tanyü senryü yatselo, tsüno tetsin kendi lü nme mvuloshvu.

³³A-le a-ben pe tsügü pe ge shüo, rope kerüshvu genyu senru dushvu kehü kershvubin tesozin tsü dushvulo.

³⁴Püshükeda gü le a-zenkero pe senru gü zi nyu ntsen lo-o kershvubin qvün ka a-to dan yün shüti, lo a-sen jape kershvubin gü phasin ka shü lati.

³⁵Tson-o a-le kepvüshe kerüshvu genyu tanyü dushvuo a-keshvu khi kela hontse a-keshvu aphu khi lati, lo a-le tsü pe ketyüketsü pe Npugü ketsü kesin-o kershvubin ge ro lati. Hihontse püshükeda gü le temi gü kemu rora thyüo a-kemu jü pe tsüti.