Read Southern Rengma Naga LEVINYU 5 Bible Online

LEVINYU 5 - Southern Rengma Naga bible

LEVINYU 5

¹Kemu rokethyü ka thakon hidan thenti. Temi peha no ryüo jokera bin nyu a-kesha kehyu ketsin tsü zoshü lotse koshüe zomvu laya tselo a-le khvu tsü pfü mvu loshvu.

²Temi peha le shamvuo nshün kemvu, nyukhu simi kesüla yatselo, a-le nyuthyü layo shalo nyemhun nshünmvu lo mu laso.

³Temi peha le shamvuo nshün kemvu temi ge chwikeryü lihie kesüla yatselo, a-le nyuthyü layo shalo nyemhun nshünmvu laso.

⁴Temi peha le tharüchün petsü kegwa thyümvuo swe la, thakon lihie, tson yatselo a-le tsü shalo nyemhun a-le mu laso.

⁵Temi nmele mula yatselo, a-no kemu gü tsü zoshwila mvu loshvu;

⁶lo a-kemu chün tanyü nmvue tenyü lü nme senryü Npugü tsüti. Püshükeda güle temi gü kemu genyu a-rora thyüti.

⁷Temi güle tanyü nmvue tenyü nme khishülo ho yatselo a-kemuchün genyu nsu nmvue paro kenyhun senryü ti nme le kemu ro kethyü lo kecha gü le rope kerüshvu genyu.

⁸A-le tsü sen-o püshükeda gü ki ryüti, lo püshükedda güle tegü kerigü pe kemu ro thyüti. A-le a-pe süthü mvuo a-gunda chwese lati,

⁹lo a-zi peha kezen pe kershvubin gü te gwenshü ti. Lo a-sen tsü jape kershvubin gü phasin ka shü lati. Hile kemu sentin kela kershvu nme.

¹⁰Tsüsika a-le tegü kenyhun gü tsü pe tejvu then-o rope kerüshvu thyüti. Hihontse püshükeda gü le temi gü kemu rora thyüo a-kemu jü pe tsüti.

¹¹Temi nme le nsu nmvue paro kenyhun khishü loho yatselo, a-kemu genyu tho kilogram nme senryüti. A-le oliv terzü nmvue tharünkegwa nme pe tsüge shü loho, tsüle shyeni kerüshvu mvu le kemu rora genyu.

¹²A-le tsü sen püshükeda gü ki ryüti, tsü aphu pe Npugü tsü kela zansü, püshükeda güle jenthüngwa khipe ketyüketsü kerüshvu hontse kershvubin ge ro lati tsü le kemu sentin kela kerüshvu nme.

¹³Hihontseo püshükeda gü le temi gü kemu genyu rora thyüo a-kemu jüpe tsüti. Shyeni pe kerüshvu ka hontse; tho nsen kebin tsüle püshükeda gü hon.

¹⁴Npugü le tejvu hidan pe Mosa tsüshü.

¹⁵Temi nme le shamvuo thyü kenshün pe Npugü ketsü hon khishü mvula yatselo, a-le tsü thoni kethyü tanyü nmvue tenyü tse tetsin kendi nme senryü Npugü rüshvu ti, tsüle me ha khoka a-mitho ti.

¹⁶A-le khishü mvukela gütsü shü lo tsüsoki tsime ge nki pe shümvu loshvu. A-le tsü pe püshükeda gü tsüti lo püshükedda gü le senru pe temi gü kemu rora thyüo a-kemu jüpe tsüti.

¹⁷Temi nme le shamvuo Npugü johokeshü nme gwenrho-o kemu thyüla yatse-e, a-le mu laso lo a-le kemuchün tha mvulo shvu.

¹⁸A-le kerüshvu mi thyüni kethyü chün tanyü nmvue tenyü tse tetsin nme kendi sen-o püshükeda gü ki ryü mvulo shvu. Tsüle me hakho ka a-mi tha ti. Püshükeda gü le temi gü le shamvu tse thyüzü kela kemu genyu tsü rora thyü lao a-kemu jü pe tsüti.

¹⁹Tsüle a-le Npugü mhundyü ka mu kela genyu kerüshvu min thyüni kethyü.