Read Southern Rengma Naga LEVINYU 6 Bible Online

LEVINYU 6 - Southern Rengma Naga bible

LEVINYU 6

¹Npugü le tejvu hidan pe Mosa tsüshü.

²Temi nmele a-pvünyu Israel nyu le thape a-no ntsen kebin rani pe tsümvula, nmvue a-hon rühu lola, nmvue a-sa lola,

³thakemhen peha hyulo-e nkuo a-le hyulo mvu letse swen lao, Npugü mhundyü nyu mula yatselo kerüshvu nme thyü ti.

⁴Temi nme le hihontse kethyü ka mula yatselo, a-le ketsin kemvu ka lihi hyulo-e tsü tho niti. A-le mvukela shakelo nyü a-sun lo tsünyeki tsime ge nki sin pe tsümvu loshvu.

⁶A-le thonikethyü kerüshvu tanyü nmvue tenyü tse a-ge tetsin kendi nme sen-o püshükeda gü ki ryüti. Tsüle me hakho ka a-mi tho shüti.

⁷Tson-o temi gü kemu genyu püshükeda gü le a-rora thyü lao a-kemu jüpe tsüti.

⁸Npugü le Mosa ka zoshü

⁹Kero kerüshvu jvu hidan pe Aaron lo a-nyudan ka zoshü lo. Rope kerüshvu no khensin kershvubin ge bin, lo mah gü no rozin bin ti.

¹⁰Lo Püshükeda güle linen mirün ben linen nyao kershvubin ge jonbü khüpe kershvubin kho ka shü lati.

¹¹Lo a-le phinya kelu lo-o jonbü gü sen kensenbin tegwen ki gü bin kenshün nme ka shü lati.

¹²Kershvubin gü ge mah no rozin bin mvulo shvu, tsü no nmhü la nya. Lonyü tsen Püshükeda gü le tesen pe tsüge shüo, rope kerüshvu ndalo-o kepvüshe kerüshvu keshvu pe roti.

¹³Mah gü no kershvubin ge rozin bin mvulo shvu, tsü no nmhü lanya.

¹⁴Shyeni pe kerüshvu tejvu le hi. Aaron nyu püshükeda gü le kershvubin gü mhundyü nyu shyeni kerüshvu thyü pe Npugü tsüti.

¹⁵Tson-o a-le tho jenthüngwa, terzü lo tharün kegwa khilo-o tsü aphu pe Npugü rüshvu kebin zansü tsüpe kershvubin ge roti. Kerüshvu rün hi le Npugü le a-kenyü.

¹⁶Püshükeda nyu le a-sen tyüti. Tsüpe kebu no shümvu tse tensü thyülo-o Npugü kehü phika gü kamhun ka kenshün bin nyu tyü lati. Npugü le tsü pe ketyüketsü kerüshvu ka püshükeda nyu jün thyü laso. Tsüle kemu rora lo thonikethyü kerüshvu hontse nshünsa.

¹⁸Ryükejü gwenkho aphunyu Aaron tsipwen pechenyu aphu ketyüketsü kerüshvu ka tsü le anyugun jün thyüo tyü logwa. Kechanyu le ketyüketsü kerüshvu tsü kesü yatselo tsü kenshün kekvu le a-nthyünyü lati.

¹⁹Npugü le tejvu hidan pe Mosa tsüshü.

²⁰Aaron tsipwen nyu khikho pe püshükeda tho nyu keshü genyu. A-khikho kecha thyükelo jonnyü (khenyütsen ketyüketsü kerüshvu hontse) a-le tho kilogram nme senryü, lonyü peha lo ngwen ki peha tse pe Npugü rüshvuti.

²¹Tsüpe terzü kerhün-o ketsekhun nme ka tsen-o boshwe pe shyeni kerüshvu hontse tharün kegwa thyüpe Npugü ki shüti.

²²Ryükejü gwenkho aphu nyu Aaron tsipwen ligü higü Püshükengun tho thyü kebin gü le kerüshvu hi gü thyü ti. Tsü robu pe rora thyüpe Npugü ki shüti.

²³Püshükeda nyu le shyeni kerüshvu tsü keshanyue tyülo nrün ndi, tsü aphu rola mvu loshvu.

²⁴Npugü le Mosa ka zoshü

²⁵Kemu rora jvu hidan pe Aaron lo a-nyudan tsüshü lo tse. Kemu rora genyu senru tsü pe kershvubin tesozin rope kerüshvu senru dan dushvu kehü bin ka dushvuti. Hile nshün sa kethyü kerüshvu nme.

²⁶Püshükeda senru gü pe rora kethyü güle Npugü kehü phika gü kamhun nyu kenshün bin nme nyu tsü tyüti.

²⁷Temi nmvue tha lihie senru gü thyü kesü keshü gü le tsügü kenshün kekvu le nthyü nyü lati. Senru tsügü zi le phi nye la yatselo, kenshün bin ka tsü thula mvuloshvu.

²⁸Nnyola lihi ka thyü gü nilo tsü boren la lo tegi la ka nilo, tsü shon lao zü pe chwela mvulo shvu.

²⁹Püshükeda kami peche ligü higü kerüshvu higü tyü logwa; tsüle nshünsa.

³⁰Ai a-zi peha sen phika nyu ryüo kemu sentinla nrün lothothyü yatselo, senru gü thyütyü nyao tsü rola mvuloshvu.