Read Southern Rengma Naga LEVINYU 7 Bible Online

LEVINYU 7 - Southern Rengma Naga bible

LEVINYU 7

¹Gwenrho kela genyu kerüshvu jvü le hi, tsüle nshünsa.

²Hi genyu kerüshvu senru tsüpe kershvubin tesozin rope kerüshvu nyukhu dan dushvu kehü bin ka dushvuti, lo tsü zi shwe pe kershvubin te lizin hizin aphu ka shüti.

³A-keshvu tsü aphu khipe kershvubin ge rüshvu lati: a-ma ge keshvu, a-rikerho,

⁴a-kisha lo tsüge kebin keshvu, a-sen kegwatsin.

⁵Püshükeda güle a-keshvu aphu pe kershvubin ge ketyüketsü kerüshvu hontse rope Npugü ki shü lati. Tsüle gwenrho kela genyu kerüshvu.

⁶Püshükeda kami peche ligü higü tyü logwa, ai kenshün bin ka tyü mvuloshvu, tsüle nshünsa.

⁷Gwenrhokela genyu kerüshvu lo kemu rora kethyü au jvu le nme: tsü thyü gü tsüle Püshükeda rora thyü keshü gü hon.

⁸Rope kerüshvu kethyü senru gü gi tsüle rora thyü kebin püshükeda gü hon.

⁹Shyeni pe kerüshvu maphun ka tsenkelo nmvue keshvula nmvue ketsenkhun ka tsenkelo lihie tsüpe Sunggigü rüshvu keshü Püshükeda gü hon.

¹⁰Ai terzü pe kerhün kela nmvue a-kesin-e shyeni pe kerüshvu ketegi aphu tsüle Aaron nyenyu püshükeda ju hon lo tsü pe anyu kenjün ketun lo mvulo shvu.

¹¹Kepfüshe kerüshvu pe Npugü ketsü jvu le hidan hi:

¹²Temi nme le chenkeno kerüshvu hi thyü pe Sunggigü ki shü ya tselo, a-le pe kerüshvu thyü nrün senru gü pe kebu no shü kemvu tensü kesin-o hoshüti: tho pe oliv terzü ka kerhün pe kethyü tensü thün nmvue oliv terzü pe yün kethyü tensü kerüpvü nmvue oliv terzü lo tho kerhün kethyü tensü pe sin ti.

¹³Tsünyeki, a-le kebu pe keshü tensü thün me pe sin-o rüshvu ti.

¹⁴A-le tensü kechacha tsü jün me pe Npugü ketsü thyü lati; tsü le senru gü zi shwe pe kershvubin ge keshü püshükeda gü hon.

¹⁵Khipe rora kethyü jonnyü senru gü thyü tsü tyüla mvuloshvu; tsü no bin-o lonyü gü tinya.

¹⁶Temi nme le zoshwishü kenjü thyüpenlo nmvue a-npvü a-kenyü ka kerüshvu hontse kepvüshe kethyü kerüshvu senryü yatselo, khipe rüshvu kethyü jon nyü tyü bula kemvui ai nsen kebin tsüsinyü tyü logwa.

¹⁷Ai thyü nsen bin-o jonshen ti yatselo pe rola mvuloshvu.

¹⁸Ai jonshen nyü tsü peha tyü yatselo Sunggigü le temi tsügü kerüshvu lo loho. Kerüshvu tsügü sümvu lati, tsüpe nshünkemvu thyü lati lo ligü higü tsü ketyü güle kemu khvu pfüti.

¹⁹Thyü güle lihie nshün kemvu kesü layatselo, tsü tyü loho ai pe rola mvuloshvu. Nshün kethyü nyu aphu thyü gü tyü logwa,

²⁰ai lihigü nshün kemvu gü le tsü tyülo, a-le Sunggigü temi letse mvu lati.

²¹Lo lihigü temi nmvue senru ge nshünkemvu le kebin kesüo kerüshvu higü thyü tyü yatselo a-ko Sunggigü temi letse mvu lati.

²²Npugü le tejvu hidan pe Mosa tsüshü,

²³Israel temi genyu. Methu, tanyü nmvue tenyü keshvu tyü nya.

²⁴Senru a-npvü sikela nmvue tehenthyü le tün kela keshvu tyünya ai pe thakecha lihie thyü logwa.

²⁵Ligü higü senru pe ketyü kerüshvu thyüpe Npugü ketsü thyü keshvu tyü yatselo a-le Sunggigü temi letse mvu lati.

²⁶Israel nyu le lika hika yhun hü-e anyugun le tegü nmvue thyü zi tyü loho.

²⁷Ligü higü tejvu hi gwenrho kethyü gü le Sunggigü temi letse mvu lati.

²⁸Npugü le tejvu hidan pe Mosa tsüshü,

²⁹Israel temi genyu. Ligü higü kepvüshe kerüshvu sen keryü güle tsü peha pe jwe kerüche thyü senryü Npugü tsü mvuloshvu,

³⁰ketyüketsü kerüshvu hontse a-npvü tsü senryü mvuloshvu. A-le senru gü keshvu lo a-nyü senryü jwe kerüche thyü pe Npugü tsüti.

³¹Püshükeda gü le a-keshvu pe kershvubin ge roti ai a-nyü le püshükedanyu dan hon.

³²Kerüshvu kethyü senru gü pha nzhü gü pe

³³tezi lo a-keshvu sin-o kepvüshe kerüshvu thyü keshü püshükeda gü tsü lati.

³⁴Senru gü nyü tsüle jwe kerüche lo a-pha nzhü gü tsüle Npugü le Israel temi ka khikelo tsüpe püshükeddanyu tsü laso. Ryükejü gwenkho aphu ka Israel temi le higü hi pe püshükedanyu tsümvu loshvu.

³⁵Ketyüketsü pe Npugü kerüshvu ka pe Aaron lo a-nyenyu ketsü le hi, anyugun kejü pe püshükeda thyü kelo nyü.

³⁶Tsüjon nyü Npugü le Israel nyu no kerüshvu hon tsü pe anyugun tsü lotse johoshü, ryükejü gwenkho aphu nyu Israel nyu le tejü higü then mvulo shvu.

³⁷Hidan hile rope kerüshvu, shyeni pe kerüshvu, kemu rora, gwenrhokela genyu kerüshvu, khikhokelo kerüshvu lo kepvüshe kerüshvu tejvü dan.

³⁸Kazü kesi Sinai kazüthun ge Npugü le Israel nyu no kerüshvu thyü lo tse zo keshü jonnyü jo hidan pe Mosa tsüshü.