Read Southern Rengma Naga LEVINYU 8 Bible Online

LEVINYU 8 - Southern Rengma Naga bible

LEVINYU 8

¹Npugü le Mosa ka zoshü.

²“Aaron lo a-nyu dan zen ale kehü phika gü khenpvü ka ryü, lo Püshükeda phi, yün kehü terzü, kemu ro kethyü genyu methu tsebwe, tenyü tse kenyhun lo kebu no shükemvu tensü rokhu gü tse senryülo.

³Tson-o temi apentha ko kequen pe tsüka shülo.”

⁴Npugü le johokeshü hontse Mosa le temi dan kokequen pe kehun lo,

⁵tson-o a-le anyugun ka, “Ale ntsoka thyü titse kebin hile Npugü le thyülo tse johokeshü le.”

⁶Mosa le Aaron lo a-nyudan zen me mhundyü chwiryüo anyugun no zülu lalotse zoshü.

⁷Lo a-le bola lo mirün pe Aaron nben shü lo a-rhe gü pe a-senkhin shü. A-le Püshükeda phi pe a-ge shüo do pe gwasa kethyü senkephin pe a-senphin shü.

⁸A-le shüntyü gü pe a-ge shü, lo tsüge Urim lo Thummin pe shü.

⁹A-le peju khipe a-pe ge shü lo tsü mhundyü zin khikhokelo kenshün zansü suna pe kethyü tsü peshü, Npugü le a-ka zokeshü hontse.

¹⁰Tson-o Mosa le yün kehü terzü khipe Npugü kehü phika gü lo tsünyu kebin kanyü dan aphu yün-o thyükenshün pe Npugü tsüla.

¹¹A-le terzü peha khilo-o gwentsenyü kezen pe kershvubin, lo tsü kanyü, khunda lo tsü kedunbin dan thyü kenshün pe Npugü tsüshü.

¹²A-le yün kehü terzü jape Aaron pe ge shüo a-khikho lo.

¹³Tsüsika Mosa le Aaron nyenyu zenryüo a-nyugun bola pe nbenshü, a-rhe pe anyugun sen khinshü, lo perün pe npvü shü, Npugü le zokeshü hontse.

¹⁴Tson-o Mosa le kemu rokethyü methu tsebwe gü zenryüo Aaron lo anyu dan no benshwe pe a-pe ge shü.

¹⁵Mosa le tsü dushvu lo-o a-zi peha khi lo-o a-zenkero pe kershvubin gü to dan geshüo tsü thyü nshün lo. Lo a-sen jape kershvubin kedunbin pha ka shüla. Hihontse-o a-le tsü khikholo-o thyü kenshün lo.

¹⁶Mosa le thyü gü rikerho, a-sen kegwatsin, a-kisha lo tsüge a-keshvu aphu pe kershvubin gü ge rola.

¹⁷Lo Npugü le johokeshü hontse a-le methu tse gü thyü nsen kebin, a-gi, a-tsi, lo a-ri tse pe kensenbin gü tegwen ki rola.

¹⁸Tsüsika, Mosa le rope kerüshvu genyu tanyü tse gü zen ryü, tson-o Aaron lo anyudan le benshwe pe tsügü pe ge shü.

¹⁹Mosa le tsü dushvu lo-o a-zi pe kershvubin lizihizin shü.

²⁰Lo Npugü le johokeshü hontse a-le tanyü tsegü duthürü lo, lo zü pe a-ri lo a-pha süla, tson-o tanyü tse gü a-pe, a-keshvu lo a-sen aphu pe kershvubin ge rola. Rope kerüshvu hile ketyüketsü pe kerüshvu, lo tharün hi Npugü le a-kenyü.

²²Lo Mosa le tanyü tse kenyhun gü pe püshükedanyu khikho kelo thyü nrün genyu zenryü, tson-o Aaron lo anyudan le ben shwe pe a-pe ge shü.

²³Mosa le tsü dushvu lo-o a-zi pe Aaron nyüchwe nzhüzin, a-ben zentsü nzhüzin, lo a-pha zentsü nzhüzin tse yünshü.

²⁴Tson-o a-le Aaron nyudan zenryüo tezi pe anyugun nyüchwe nzhüzin, a-ben zentsü nzhüzin lo a-pha zentsü nzhüzin yünshü. Tsonshüo Mosa le tezi a-sen tsü shwe pe kershvubin tekho lizin hizin aphu ka shüla.

²⁵Lo a-le a-keshvu a-ma ge kebin lo a-rikerho aphu, a-sen kegwatsin, a-kisha lo tsügekebin keshvu lo a-pha nzhüzin tse khilo.

²⁶Tson-o a-le khikho pe Npugü tsü kela kebu no shükemvu tensü rokhu günyu tensü nme, terzü no keshü tensü nme lo tensü kerüpvü nme tse khipe thyü keshvu lo thyüpha gü soge shülo.

²⁷A-le ketyüketsü hi aphu pe Aaron lo anyudan bennyu shüo anyugun no jwe kerüche hi pe Npugü tsüshü.

²⁸Tson-o Mosa le anyugun ben ka tsü khilo njüo pe khikhokelo hontse tsü pe kershvubin ge rope kerüshvu so ge roshü. Hile ketyüketsü kerüshvu lo hirün Npugü le a-kenyü.

²⁹Mosa le a-nyü gü khilo-o jwe kerüche thyüpe Npugü tsüshü. Tsüle Khikhokelo tanyü tse Mosa jün. Npugü le johokeshü hontse Mosa le tha aphu thyü külo.

³⁰Mosa le yün kehü terzü peha lo kershvubin ge tezi peha tse khilo njüo kezen pe Aaron lo anyudan lo anyugun phinya gwünshü. Hihontse a-le Aaron lo anyudan lo anyugun phinya thyü kenshün pe Npugü tsüshü.

³¹Mosa le Aaron lo anyudan ka zoshü, “Npugü le johokeshü hontse thyü gü sen gü Npugü kehü phika khenpvü ka nilo-o khikhokelo kerüshvu rokhu nyu tensü gü sin-o tsü ka tyülo.

³²Thyü lo tensü-e nsen kela tsü pe rola.

³³Hagun le hagun khikhokelo jvu penla kemvuthen jon tsenyü phika khenpvü gü nken tin loho.

³⁴Hagun kemu sentinla nrün genyu Npugü le ngun le nthu nyuthyü layo tsü thyülo tse johoshü le.

³⁵Hagun le phika gü khenpvü ka nhenyu lo khejenyue jontsenyü bin-o Npugü le nyuthyü lotse johoshü yo tsü thyüti. Hagun le tsomvu yatselo si lati. Npugü le aka johigü zoshü le.”

³⁶Tsügenyu Aaron lo anyudan le Npugü le Mosa ka johokeshü aphu thyülo.