Read Southern Rengma Naga JEREMIAH 1 Bible Online

JEREMIAH 1 - Southern Rengma Naga bible

JEREMIAH 1

¹Lesü higü hile Benjamin kazü Anothoth nyida nyu püshükedanyu nme Hilkiah nyugü Jeremiah jo.

²Amon nyugü Josiah le Juda Raja thyükelo chen tseryü kenshen gü ka Npugü le Jeremiah kazo,

³lo Josiah nyugü Jehoiakim le raja thyü kebin ka a-ka zoni. Tsüsika Josiah nyugü Zedekiah le keda thyükelo chen tseryü nme gü keti Npugü le gwün kechon a-nthon. Tsü chen shye pvüngü ka Jerusalem temi dan tenzen-o do thyü tinla.

⁴Npugü le aka zo,

⁵“Ale nrhen keshü mhundyü, lo nnyukelo mhundyü nno senye dan ka sidyüjo kezo nyu thyü nrün genyu nkejülo laso.”

⁶Ale a-jo kenio, “Aphuso kekvu Npugü, ale jo zolo sha mvu; ale ncheri zunle.”

⁷Ai Npugü le aka zo, “Nle ncheri zun letse zonya, ai ale nni pe shükebin temi dan ka güo, ale nka johokeshü aphu pe anyugun ka zoshülo.

⁸Nle tsüdan nshvu nya, kechamvule ale nzen-o n ntsen hüti. Ale Npugü, ale zoshü laso.”

⁹Tson njüo Npugü le a-ben keto shüo amüntse kesüo aka, “Nyülo, ale nno zo mvulo keshvu jodan khipe ntsü binle.

¹⁰Nthu ale nno senye lo rajaphen dan jwila, süshyela, nkela lo pe shwenla, thyüni lo senlo nrün kekvu pe ntsü binle.”

¹¹Npugü le aka shün, “Jeremiah, nle nyu hyu binla?” Ale a-jo kenio, “Almond senro nme le.”

¹²“Nle zo loso,” Npugü le zo, “Lo ajo le ketsin thyüla nrün genyu ale nribin nyo.”

¹³Tsüsiki Npugü le aka zoni. A-le aka, “Nle nyu ko hyu bin la?” Ale a-ka, “Tesokipon la nme njwa kebin hyu binle, lo tsüle hi denzin ntsun ryüjü.”

¹⁴A-le aka zo, “Kenke le tesokipon njwa sen-o kazü higü nyu yhun kebin nyu aphu gen tsü ryüti,

¹⁵Ale tesokipon senye aphu koshü kebin genyu. Raja tsüdan le Jerusalem khinrun, a-chwida kehun, lo Juda nyida dan hun-o anyugun keda penso ti.

¹⁶Atemi dan le mukela genyu ale shaja pe anyugun tsüti; anyugun le akhelao kershvu thyüpe tero kecha dan tsü lo thame züo rüshvu bin kela genyu.

¹⁷Gwendolo, Jeremiah; tson-o güo ale nka zokeshü aphu pe anyugun ka zolo. Ntsoka we nle anyugun nshvu nya gwen, nle nshvu yatselo anyugun dannyu binkelo ka nno nshvu kvu lati.

¹⁸Nyülo, Jeremiah! Kazü higü nyu Juda raja nyu, kedanyu, Peshükedanyu lo temi dan no n-ntsunti. Ai nthu ale nno anyugun nyhenlo kegwa kekvu pe ntsü binnyo; nno khwen kegwa thyü kenjü nyida hontse, tegi kachon hontse lo lazo chwida hontseti. Anyugun le nso kvulo ho, kechamvule ale nzen-o n ntsen hüti. Ale Npugü, ale zolaso.”