Read Southern Rengma Naga JEREMIAH 10 Bible Online

JEREMIAH 10 - Southern Rengma Naga bible

JEREMIAH 10

¹Israel temi dan, Npugü le hagun ka zo titse kebin hi nyülo.

²A-le zo, “Senye kecha then nya; tsangki zensü kecha kehyu ka senye kecha le nshvula yatse-e hagun we kevülanya.

³Temi hidan nyünyü le a-min ndi. Chün ki senbin nme phenlo-o tesen kechanyu no a-kanyü lope tsü ketsülo,

⁴lo suna lo rükagi lope nthyü lo. Tson-o tsü no chela mvu nrün genyu gojal lope yhenkensü kelo nti.

⁵Teromen tsüle konkü-rhümvü low nyu low kendün hontsele; tsüdan le jo zolo hümvu, mele tsüdan pvühü kechamvule tsüdan le tsonchülo hümvu. Tsüdan nshvunya: anyugun le hagun nthyü loho, lo hagun genyu thakegwa thame thyüshü loho.”

⁶Npugü, nhontse kethyü nme-e ndile; nle kvu, lo nzan le gon lo kvusa.

⁷Senye aphu rajagü, segü le nrühvu mvu logwa la? Nle kerhvu lozü le. Senye dan nyu thakeshanyu aphu nmvue tsüdan rajanyu nme-e nhontse kethyü ndi.

⁸Anyugun aphu pin lo pho ri. Anyugun le tesen lope teromen kezü ka nyu shalo mon?

⁹Anyugun teromen dan tsüle Spain ki rakagi lo Uphaz ki suna pe je kelo, aphu men zükeshanyu tho; tsüdan phi le phidokeshanyu le kenzi lo nhon meren kethyü pe kedo.

¹⁰Ai Npugü, nwele ketsin Sunggigü, rhün kehü Sunggigü lo kethonthen rajagü le. Nle nyunta lo lo kazü le ndünla hünyo; senye dan le nnyun kenthün nyhen loho.

¹¹(Hagun le anyugun ka tsang lo kazü rhenshü kemvu terodan tsüle nke lati, lo tsüdan le kazü lika hikae bin sin kemvui so tse zoshü lo.)

¹²Npugü le a-kekvu nyu kazü rhenshü; lo a-kesha pe tsü thyüshü tson-o tsü sükhun pe tsang-e tishü.

¹³A-le ahza hokeshü ka tsang soki züle nho; a-le kazü keni ki nmha zen ryü. A-le tsangkechwü no tsangkeri nyu shwenshü lo a-kenya ka nyu tsangkenbu nishü hü.

¹⁴Tson kethyü ka temi le pinla lo adunthyüla hünyo; teromen cha keshü nyu le gwen kendi thyüla hünyo, anyugun le thyükehü terodan tsüle ketsin kemvu lo kerhün kendi genyu.

¹⁵Tsüdan le a-kenrun tsügenyu ntsüla mvulo shvu; Npugü le anyugun ki keryü ka nke lati.

¹⁶Jakob Sunggigü we tsüdan hontse mvu; a-we tha aphu thyü keshügü, lo Israel lope a-temi ketsin thyülo nrün genyu kejülo laso. Kekvutsin Npugü tsüle a-zan.

¹⁷Jerusalem temi dan, mele nhunlo laso! Hagun kanyü kequen logwen.

¹⁸Npugü le kazü higü nyu hagun khishwila titse bin laso; hagun nme-e nsen kebin then boshwenla titse bin nyo. Npugü le zo laso.

¹⁹Jerusalem temi le nrao, “Agun nthyü ritsin laso! Agun tejün shvu le ponlo hoso. Agun we tsüle nhenlo kegwa nme ado tse hüle!

²⁰Agun phika le renla; a-kephin ron le tükü laso. Agun nyenyu aphu tinla; nme-e agun phika penso ni keshüi ndi; nme-e phi sü sope hü nrün ndiso.”

²¹Ale tsü kenio, “Agun sharhidan le pinla; anyugun le Npugü ka tsonketsin-e hi mvule. Tsügenyu anyugun le gwalo mvula, lo agun temi le tsenchvu laso.

²²Nyülo! Jolo le ryü laso! Kekevü keda le senye teso ki hü laso; a-rihü dan le Juda lope kazü kesi ngwa la; mesükerun kebin bin thyü lati.”

²³Npugü, temi nme-e a-npvü a-keyhun npugü kemvu; nme-e a-npvü a-keyhun ketsenlo hümvu.

²⁴Npugü, ntemi thyü kenjü shülo, ai ngun gen kvu ritsin nya nmvue nnyunta kethyü nyu shaja pe agun tsü nyalo; tsonshü yatselo agun keyhun keni thyü lati.

²⁵N nyunkekhü süni pe nrüshvu hü kemvu senye lo nkelila kehü temi dan gen shü lata. Tsüdan le ntemi dan dushvu la; anyugun le agun nkeshü la lo agun kazü no nke laso.