Read Southern Rengma Naga JEREMIAH 11 Bible Online

JEREMIAH 11 - Southern Rengma Naga bible

JEREMIAH 11

¹Npugü le aka zo,

²“Kejozenkelo jo dan hi nyü shülo. Juda lo Jerusalem temi dan ka,

³Israel nyu Npugü Sunggigü, Ale keswe kesü lope kejozenkelo jo nyü kemvu nyu aphu gen shüla sele.

⁴Ale Ijiptnyu kazü nyu, mah le rokebin hontse kethyü nyu anyugun bonnyu zen-o chwikeryü ka kejozenkelo higü thyülo. Ale anyugun no akhwen nyü lo ale johokeshü aphu thyü lotse zoshü. Anyugun le akhwen nyülo anyugun no atemi thyü lo ale anyugun Sunggigü thyü titse zo shü.

⁵Tsonlo ale anyugun bonnyu zen-o kejoshü kenjü then-o anyugun le ntsoka yhunkebin kazü kegwa lo kenya pe anyugun tsüti tse zo.” Tsüka ale, “Ele, Npugü” tse zo.

⁶Npugü le aka, “Juda nyida lo Jerusalem tsonda dan ka gülo. Tsünyu ajün zoshü lo temi dan no kejozenkelo jo nyü lo tsüdan thenlo tse zoshülo.

⁷Ale Ijipt nyu kazü nyu anyugun bonnyu zenchwi keryüka anyugun no akhwen nyülo tse zen ketse shü, lo nthu keti hie temi dan ketse ni ryü bin nyo.

⁸Ai anyugun le nyü nmvue then-e mvula. Tsonkethyü gü mvule nmeme tse aphu nduka hontse anyugun nyun rü bin gwenzin la so. Ale anyugun no kejozenkelo then hü lotse zoe anyugun le nmvula. Tsügenyu ale tsünyu shaja thupe binkenjü aphu pe anyugun gen shüla.”

⁹Tsüsika Npugü le aka zo, “Juda lo Jerusalem temi le tedo rhio a ntsun bin nyo.

¹⁰Anyugun pepvünyu kemu tho hontse ni tinlaso; anyugun le tero kecha rüshvu tin laso. Israel lo Juda ai ale anyugun pepvünyu zen-o kejozenkelo gwenrho laso.

¹¹Tsügenyu ale kenke senryüo anyugun gen shüla titse binso, lo anyugun le thame thyü nrhilo kemvui letse anyugun zenshü bin nyo. Tsügenyu anyugun le nrao aka keche hi-e ale anyugun khwen nyü mvu lati.

¹²Tsonlo Juda lo Jerusalem temi dan le anyugun le rüshvu kehü terodan ki güo anyugun keche hisoti. Ai tero tsüdan le kenke higü le keryü ka anyugun kenilo mvu lati.

¹³Juda nyu le anyugun nyida aphu nyu teromen le bin kü, lo Jerusalem nyu keyhun tsonda aphu nyu Baal tero kershvu bin thyü kü njü.

¹⁴Jeremiah, temi hidan sunka aka hi nya. Anyugun le kenjün thyülo-o aka anyugun keche hi ryüe ale nyüshü loho.”

¹⁵Npugü le zo, “Ale sokehü temi dan le gwakemvu tho thyü hü laso. Anyugun no a Kershvuka nyu binlo kekü nyu kenjü le binla? Anyugun we aka johokeshü lo nyukhu pe kershvu genyu kenjün kethyü khinlo gwa letse hü ole? Tson kethyü nyu anyugun kenyülo gwa ole?

¹⁶Gwengwa ka we ale anyugun lope Oliv nyü kegwa lo a-sha nsha kehügü letse kohü, ai ntsoka we ale tsangkesen hontseo a-nyü lope mah nyu shüla lo a-rodan bose la tiso.

¹⁷“Kekvutsin Npugü, Ale Israel lo Juda pe senshü; ai ntsoka we ale kenke pe au kedün binso. Au npvü tha higü nsüpe au gen shü laso, kechamvule au le tha higü thyüzüla; lo tha pe Baal kershvu nyu ano anyun ntala.”

¹⁸Akenrhinyu le tedo rhio a ntsun kebin Npugü le atesha shü.

¹⁹Tanyünyu jvü kegwa hontse mele azen gü dushvula ti tse hü, ai anyugun le a nrhio tedo gwakemvu ndokebin ale sha lomvu. Anyugun le hihontse kenthon hü, “Ngun senbin higü le gwaketse ka phünla tile; a-dushvulao nme-e no a-rüchün mvula tile nu.”

²⁰Tsüselo ale hihontse hi, “Kekvutsin Npugü, nle jokera kenjügü; nle temi dan kerüchün aphu nrihü. Ale tha aphu pe n tenyen laso; tsügenyu ale nle temi hidan ge khenkelo nrin tile.”

²¹Anothoth temi dan le me no adushvula nyühü, anyugun le ale Npugü jo zo ni yatselo adushvula titse akazo.

²²Tsügenyu kekvutsin Npugü le zo, “Ale shaja pe anyugun tsü lati! Anyugun selo no teri nyu sila ti; anyugun nyenyu no khün si lati.

²³Ale Anathoth temi gen kenke senryü titse gwünkho tho laso, tsü le keryü ka anyugun nme-e rhünlomvu lati.”