Read Southern Rengma Naga JEREMIAH 12 Bible Online

JEREMIAH 12 - Southern Rengma Naga bible

JEREMIAH 12

¹Npugü, ale agenyu nzen-o kenya yatse-e nle njü kelai, ai ale joketsin rüla pe nka shün mvulo nrün ndi. Nyu thyüo serikemvunyu le gwakenyesa lohü nla? Nyugenyu joketsin senhü kemvunyu le chwilo hü ola?

²Nle tsüdan pe senshü, lo tsüdan le a-me tsenlo; tson-o min sogü a-sha nsha lo. Anyugun le azintse nzo ngwa hünyo, ai ketsin nyu we nsüshü hümvu.

³Ai Npugü, nle asha; nle ale nyu thyü hüyo, lo dihontse nso hüyo nle shabin le. Tanyü dushvula titse zengü kejü hontse temi gwakemvu hidan süsen tin lalo; anyugun dushvukela gwünkho tikemvuthen anyugun khwenlo.

⁴Dithen laki agun kazü no sin-o tehenno rügu bin mo? Agun temi serikemvu genyu nyukhu lo tegü le si bin laso, tsüdan le zo, “Sunggigü le agun le nyu thyü hüyo hyu hümvu.”

⁵Npugü le zo, “Jeremiah, nle temi zen kehüo nhokeli la yatselo, dihontse keru zen kehü logwa ola? Nle phenchvünyu solo mvu yatselo, Jordan tehen nyu we dihontse tila?

⁶N-npvü nkami nyu ntsasizen nyue nsala; anyugun le n when nrün genyu kerhünlo hünyo. Anyugun le nka jo shwen kegwa zoe anyugun tenyen nyalo.”

⁷Npugü le zo, “Ale Israel khelaso; Ale kejükelo tsipwen keli laso. Ale sokehü temi dan lope anyugun kenrhinyu kekvunyu shü laso.

⁸Ale kejükelo temi le rani a ntsun; menda le chün nyu nho kehü hontse anyugun le a nshwen hünyo, tsügenyu ale anyugun ntsüla.

⁹Ale kejükelo temi le kheno dan le hun-o whenlo kela tegü hontsela sele. Tehenthyü dan koshüo no keho nyu kerhün lolo!

¹⁰Sin rünyi ki kekvu kesen nyu kechon le a vain low nkela; anyugun le alow kedü la; anyugun le akazü kegwa lope kesin thyüla sele.

¹¹Anyugun le tsü lope tehen yhunkemvu thyüla; tsüle amhundyü nyu khe laso. Kazü gü apentha kesi thyüla, lo nme-e tsü shwimvula so.

¹²Rincho kazü kesi aphu nyu nkela nrün temi le ryü laso. Ale kazügü aphu nkela nrün genyu teri nishü la; temi nme-e bwen-o yhunlo hoso.

¹³Atemi dan le thoshye yishü, ai jontsü tsi gvülo; anyugun le tsügenyu thathyü kenjün thyü, ai tsügenyu thame hyulo mvula. Ale anyunthün sa kela genyu anyugun le chvulo mvula.”

¹⁴Npugü le zo, “Ale kazü khipe atemi Israel ketsü nkekela Israel kazon nyu dan genyu tha zo mvuloshvu bin nyo. Ale tehen jwikela hontse temi serikemvu tsüdan anyugun kazünyu hülao anyugun ben nyu Juda kenishüti.

¹⁵Ai ale anyugun zen tin kela siki anyugun shwi njün shüti; ale tsipwen dan zen nigü anyugun rünyi lo kazü dan ka shü lati.

¹⁶Anyugun nyun aphu pe atemi nyünyü lolo-o, anyugun le gükela ka atemi dan no Baal zan nyu swe kehü hontse azan nyu swe-o ‘Npugü le rhünkehü hontse’ tson zo-o swela yatselo anyugun kono atemi peha thyüo gwa kenye loti.

¹⁷Ai tsipwen ligü higüe ajo zenmvulo ale a-men jwilao nke lati. Ale Npugü, tsü zo laso.”