Read Southern Rengma Naga JEREMIAH 13 Bible Online

JEREMIAH 13 - Southern Rengma Naga bible

JEREMIAH 13

¹Npugü le ano güo linen nya ketsekhin dan me hilo-o nya lo lotse zo; ai a-le ano tsüdan pe zü ntsen nya lotse zo.

²Tsügenyu ale tsüdan hilo-o nyalo.

³Tsüselo Npugü le aka zonio,

⁴“Eufrates züri ki güo nya ketsekhin gü tsü lope tsonye kü nyu kebula lo.”

⁵Tsügenyu ale tsü sen güo Eufrates züri khoka kebula.

⁶Gwenkho peha sika Npugü le ano Eufrates züri nyu güo nya ketsekhin gü khinilo la lotse zo.

⁷Tsü hontse ale güo tsü pe kebu kenjü bin gü hyukelo ka, tsü le renlao senlo nrün ndikela hyulo.

⁸Tsüsika Npugü le aka zonishü. A-le kezole,

⁹“Tsühontse ale Juda ketekho lo Jerusalem ketekhosa kehü gü nke lati.

¹⁰Temi gwakemvu hidan le akhwen nyünyü mvu laso. Anyugun le anyugun nyunrü lo serimvu ni laso; tson-o tero kecha rüshvu lo tsüdan lothyü bin laso. Tsügenyu anyugun le nya ketsekhin renlao senloshvu kela tsüdan hontse lati.

¹¹Nya ketsekhin dan le nmakhun ketsenlo kehü hontse ale Israel lo Juda nyu aphu no a nsü bin kethyü akenyü. Ale anyugun no atemi thyüo teshwen lo kerhvu senryüo atsülo titse tsühontse thyü le, ai anyugun le akhwen nyü mvula.”

¹²Npugü Sunggigü le aka zo, “Jeremiah Israel nyu dan ka zukhin aphu vain zu pe süla mvulo shvu letse zoshülo. Anyugun le vain zukhin aphu vainzu pe sü mvulo keshvu anyugun le shabin letse zo lati.

¹³Tsonlo anyugun ka zoshülo, Ale Npugü, ale vain zupe kazü higü nyu temi dan: David senye rajadan, püshükeda dan, sidyükesha dan lo Jerusalem nyu keyhun aphu nzeüla kemvu then süshü ti.

¹⁴Tsüselo la kejon ren kethyü hontse ale ntsenyue lo peshünyue boren lati. Ale anyugun shwi njün, so nmvue phin rüchün letseo dushvu mvula loho lati.”

¹⁵Israel temi dan, Npugü le zo laso! Hagun thyü ketsenyo lo-o a-khwen nyülo.

¹⁶Npugü, hagun Sunggigü rühvulo, a-le kezün zenryüo, hagun kazüthun dan gen pha nsüla; lo hagun le keben nnyü kehü gü a-le tsüpe kezün kentsun nyu shüla kemvu ka.

¹⁷Hagun le nyü mvulo, ale hagun ketekho genyu kekebu nyu chüti; Ale chüsa, lo ayhüphu cheti kechamvule Npugü temi dan lope donyu hontse zentin kela genyu.

¹⁸Npugü le aka zo, “Rajagü lo a-jvü au no kedakhün gen tsenryüla gwenlo tse zoshülo, kechamvule au kedaperen kezegwa le au pegen chekela genyu.

¹⁹Juda tesin kipon rünyi ju le mele hunlo laso; nme-e tsüdan pvüthü yülo kemvüi so. Juda temi aphu zen-o me kazü ki gü laso.”

²⁰Jerusalem, nrishülo! Nkenrhinyu le teso kipon tsüryü jü laso! Nle anyugun genyu ketekho sa kehü ntemi dan pe n tenyen keshü dan le diki güla ola?

²¹Nle npvünyu letse rüchün kehü temi dan le nso kvulo-o keda thyülo la yatselo nle nyu zo mon? Nle tenunyu le nyuzen-o kenjün thyü kebin hontse lati.

²²Nle nyu genyu n gen tha hihontsela, lo nphi sürhen lao nsüsen tinla yo tse shün yatse-e tsüle nkemu le ketetsin thyükela genyu.

²³Temi ketsi nyu le a-gi kelulo gwa ti ole, nmvue meren le a-kemeren kelulo gwa ole? Anyugun le tsonlo gwa yatse kethyü we hagun tha gwakemvu nti thyü kehü nyule kenjü tho thyükelo jvu shalo züle.

²⁴Kazü kesi ki tsangkenbu le npen whün sen tinla kehü hontse Npugü le hagun khikezen lati.

²⁵Npugü le tsüpe njün thyü titse zo. A-le ngen tson titse rhiloso, kechamvule nle a-khelao tero ketsin kemvu tenyen tinkela genyu.

²⁶Npugü le nphinya yho lao nno kaja pvüti.

²⁷A-le ntsükehü tho nle thyükebin hyu laso. Temi nme le a-kajon nyu nunyu fükehü hontse lo kerutse le a-lü hükehü hontseo rincho gen lo tehen nyu tero kecha dan ki gü kehü a-le nhyu laso. Jerusalem temi dan, nwe thyülo tiso! Nle dicheka nshünlo tila?