Read Southern Rengma Naga JEREMIAH 14 Bible Online

JEREMIAH 14 - Southern Rengma Naga bible

JEREMIAH 14

¹Npugü le tsangri mvula nrün rüla pe aka zo,

²“Juda le dyükezün nyu bin laso; a-nyida dan le sibin laso, a-temi dan le nyu kenjün thyüo kazü nyu keto bin, lo Jerusalem le kekeche hio nra binso.

³Kenyanyu le gonyu dan nipe zü fü; tsüdan le zü ka gü, ai zü hyulo mvu; anyugun le zükhin kenrun sen-o ranila. Anyugun shese lo gwenkeshvu thyü anyugun mhun pe kebu.

⁴Tsang le rimvula lo kazü le sinkela genyu, lowketsünyu le anyun kenjün thyü; anyugun mhun pe kebu bin laso.

⁵Low nyu thyüje dan-e jonyü ndi kela genyu a-nyu dan khe bin laso.

⁶Tehen gada dan le rinchothun gen bin-o mesükerun hontse hen loho binso; tehen ndikela genyu anyugun yhütyü le tha hyumvula.

⁷A temi dan le aka hio, ‘Agun kemu le agun nkhin-e, nle zokenjü hontse agun che shülo. Agun le gwen kechon nkipon ranio tin lale; agun le mupe n ntsun laso.

⁸Israel nyu sidyü le n nti; nle kenke-kemhü nyu agun kenishü kehü güle. Nle nyuthyüo tesin hontse, kenjwen nyu le kheje me nti nsen kethyü hontse agun kazü nyu bin hü nla?

⁹Nle nyuthyüo a-kerükela nyu hontse, a-kekvu ndikela shüpahü nyu hontse hü nla? Ketsin, Npugü, nle agun zenbin nle! Agun le ntemi laryü; agun khe nyata.’ ”

¹⁰Npugü le temi hidan rüla johü, “Anyugun le akipon tinla nyü hü nyo, lo anyugun le anyugun kekhe loho. Tsügenyu ale anyugun gen akenyü mvule. Ale anyugun thyükezüdan rüchün-o anyugun kemu genyu shaja pe tsüti.”

¹¹Npugü le aka zo, “Ano temi hidan cheshü lotse aka hinyalo.

¹²Anyugun le nyen yatse-e ale anyugun le kekeche kehi nyü loho; lo anyugun le tha rope arüshvu lo ketyüketsü pe a rüshvue ale tsü genyu akenyülo kemvui. Ale tsü lokethyü gü mvuo teri lo chenda, kethyü kenyü nyu anyugun boshvu lati.”

¹³Tsüselo ale zo-o, “Kekvutsin Npugü, sidyükezonyu le temi dan ka teri lo chenda ryü kemvui letse zobin nyo, anyugun le tson zo, kechamvule anyugun le nle kebwen kerüyü nti pe agun kazü nyu shüti tse zo njü letse hünyo.”

¹⁴Ai Npugü le zonio, “Sidyükezo nyu le azan nyu kenku zo bin nyo; ale anyugun nishümvu, nmvue anyugun no jokon nme-e pe tsüdan ka zolo tse shü mvule. Anyugun le tsemin zokehü tsüle akipon kemvu; anyugun le ryükejü rüla zokehü tsüle anyugun npvü nyun kendo zokethyüle.

¹⁵Ale Npugü, ale nishükemvu sidyükejo nyu dan azan ka zo-o temi dan ka teri lo chenda ryükemvui letse zokehü dan gen ale thyüshü nrün pe nka zoti-- Ale teri nyu lo chenda nyu anyugun no si lati.

¹⁶Anyugun le zope hikeshü dan ko tsü hontse boshvu lati. Anyugun simin khipe Jerusalem tsonda nyu shwen lati, tson-o nme-e anyugun kesun mi ndi lati. Tsühontse anyugun nunyu, anyugun nyenyu aphu kesin-o tson lati. Ale anyugun no anyugun serikemvu chün thoti.”

¹⁷Npugü le ano anyun kenjünkethyü rüla pe temi dan ka zolo tseshü: “Ayhüphu no khejekhenyütsen tsunlo, ano chüthüla nyata, atemi dan le jün sala lo jün ntsun kela genyu.

¹⁸Ale lowjvü nyu gü yatselo, teri nyu gakela min dan hyu, ale rünyi nyu gülo, temi dan le khün sigü kejü hyulo gwenzin la sele. Sidyükezonyu lo püshükedanyu le anyugun tho thyü bin hünyo, ai anyugun le thyü kebin gü shamvu.”

¹⁹Npugü, nle Juda kheshüla sele? Nle Zion temi ntsü hüle? Nle nyuthyüo agun nthyüsa lao agun no gwalo keho thyüla sela? Agun le kebwe kerüye fü, ai kegwa thame hyulo mvu laso; agun le thyü ngwakelo nrin hü, ai ketetsin thyü nila gwenzinle.

²⁰Npugü, agun le mupe n ntsunla sele; agun le agun kemu zoshwi, lo agun bonnyu kemue zoshwi hüle.

²¹Nle zokenjü dan rüchün-o agun ntsüla nyata; nle keja kepfü pe zenkechwi kethyü n kedakhün pe keshübin Jerusalem gen shüla nyalo. Nle agun zen-o kejozenkelo gü rho nya ta.

²²Tsipwen dan teromen kezü nme-e tsangkenri nishülo kemvui; tsang-e a-npvü tsangkenri khishü loho. Agun kenrin le ngen binle, Npugü, agun Sunggigü, kechamvule nle tha tsüdan thyüshü kehügü le.