Read Southern Rengma Naga JEREMIAH 15 Bible Online

JEREMIAH 15 - Southern Rengma Naga bible

JEREMIAH 15

¹Tsüselo Npugü le aka zo, “Mosa lo Samuel hvu le hinyu bin-o aka hi yatse-e, ale temi hidan gen shwikenjün khishü loho so. Anyugun no tinla lo, anyugun no amhundyü nyu tinlalo.

²Anyugun le dikipon gü mvulo shvu yo tse nka shün lo, ale zo hü nle tse anyugun ka hihontse zolo: Peha le kethyü kenyü nyu siti-- tsüle anyugun kegü bin! Kechanyu le teri nyu siti-- tsüe anyugun kegü bin! Peha le khün sila ti-- tsüle anyugun kegü bin! kechanyu le tenzen-o dothyüti tse laso-- tsüle anyugun kegü bin!

³Tha kenrin kethyü pezi no anyugun gen thyü titse, Npugü, a hile rhilo laso: teri nyu anyugun ga lati; anyugun min le tehi no nkarhen lati; tegü no tsü ndu, lo nyukhu dan no a-sen tyü lati.

⁴Hezekia nyugü Manasseh le Juda raja thyüketseka Jerusalem nyu thyükeshü thogü genyu ale kazü aphu no anyugun gen a-dunthyü ti.”

⁵Npugü le zo, “Segü le n njün mon, O Jerusalem, lo segü le ngenyu nyun gwakemvu thyü mon? Segü le sunthon-o nrüla shün mon?

⁶Hagun le akhela; hagun le akipon rani tinla. Tsügenyu ale aben ketolo-o hagun techeren lati kechamvule ale anyunkenta kekhe loho bin kela genyu.

⁷Hagun kazü nyu rünyi aphu ka ale hagun khipe npen hontse tsangkenbu ki shwen lati. Atemi dan, ale hagun nkela, Ale hagun nyenyu gala hagun le hagun jvü gwakemvu kekhe kemvu genyu.

⁸Hagun kazü nyu maginyu le züda hachon nyeki chon laso. Ale hagun selo ju anyugun kegwa ka gala lo anyugun jvü nyu no kenjün thyü shü. Ale ben no nyungwakemvu lo kenrin kethyü pe anyugun vüla hü.

⁹Nyeginyu a-nyu mi tsenyü nmhenkela gi le a-teshe ndio sitsen laso. A-tsangkeben le kezün thyü laso; a-le kejo lo a-nyun thyü laso. Ale nkenrhi nyu no rhün kebin dan tsüe galati. Ale Npugü tsü zo laso.”

¹⁰Ale dihontse gwen keshvu nyu thyüla seyo! Nyuthyü le tseo ajvu le a nnyun pe kazü nyu shüyo? Ale kazü higü nyu temi aphu zen kega lo kenyi bin gwenzin, Ale pisa pe me tepu mvu nmvue meka tepue mvu; ai aphu a swetsü gwenzin le.

¹¹Npugü, ale nlothyü kegwa thyülo mvula, lo akenrhinyu le kenjünthyü kemeni kelo ka anyugun genyu nka hilomvula lo anyugun shochün aphu no agen ryüketsin thyüta.

¹²(Temi n me-e teso kipon tegi, lazo pe kerhün kethyü gü tsü chwen loho.)

¹³Npugü le aka zo, “Ale atemi dan le anyugun kazü aphu nyu kemu thyükela chün shaja pe tsü nrün genyu kenrhinyu nishüo anyugun kenya dan pvü tin lati.

¹⁴Ale anyugun no shakemvu bin ki anyugun kenrhinyu go thyüti, anyunkenta le mah hontse, lo tsüle kethonthen robin ti.”

¹⁵Tsüselo ale zo, “Npugü, nle shabin. Arüchün shü lo a cheshülo. Ano a nshwe kehü nyu ge a khün lo lota. Anyugun le a boshvulao chwikelo gü nyu tsü anyugun gen nnyun thonri nyata. Nge nyu ale kemeni kelo gwenzin letse rüchün shüta.

¹⁶Nle aka zo lo ale njo aphu nyüle. Ale nhon le, Npugü Sunggigü, kekvutsingü, tsügenyu njo dan le shekerhün lo nyunkenyü pe anyun süpvü bin hü nle.

¹⁷Ale temi kechanyu zen me shwinyü lo akenyü thyü tinla hümvu. Njo kezen genyu ale a npvü bin-o nyunkenta pe asüpvü bin hü.

¹⁸Nyugenyu ale kenjünthyü zin binla? Nyugenyu a kethyü no gwa loho bin la? Nyugen nyu tsüdan ponlo mvu letsela? Nle ntsükerin ki sin la kehü rinyu hontse ano ashese la titse bin ole?”

¹⁹Npugü le jo higü kenio, “Nle rani ryü lo ale nzen ni loti, tson-o nle alokethyü nyu thyüti. A-kon kendi zobin nrün sunka a-min kebin jo zotinla lo nle agenyu sidyükezonyu thyü niloti. Temi dan le nka ni ryüti, tson-o nle anyugun ki gümvue gwa.

²⁰Ale anyugun mhundyü ka nkhipe lazo chwida hontse shüti. Anyugun le nzen kegati ai nyekvu loho. Ale nzen hüo n nopen lo n ntsen loti.

²¹Ale temi serikemvu lo rigwa kemvu kekvu nyu nkeni loti. Ale Npugü, tsü zo laso.”