Read Southern Rengma Naga JEREMIAH 16 Bible Online

JEREMIAH 16 - Southern Rengma Naga bible

JEREMIAH 16

¹Npugü le aka zonio,

²“Bin hihontse kethyü nyu tenulo nmvue nyue yhun nya.

³Hinyu nyunkelo nyenyu lo anyugun pepvünyu gen nyuthyü ryü jüyo ale nka zoshü tile.

⁴Anyugun le kethyü nyun ketetsin khipvüo silati. Anyugun min le methuvü hontseo kazü gen nthun binti. Teri nyu anyugun gala nmvue khünsi lati, tson-o anyugun min no tegü lo nyukhu dan chvu thyü lati.

⁵“Nle che chükebin kanyu yü kemvui. Temi nme genyu nyun gwamvu nya. Ale kebwen jochü pe atemi tsü nmvue keso lo shwikenjün lope atemi sha sin loho so.

⁶Kazü higü nyu kenyanyu lo rhokedyü nyue silati, ai nme-e anyugun sun nmvue chechü mvu lati. Nme-e nyungwa kemvu zansü thyüo a-npvü a-thyügvü nmvue ape thu loho.

⁷Kesonyu nme le siyatse-e temi nme-e a-nyun thyü nbwen nrün genyu a-zen-tyütsü kemvui. Temi peha le apepvünyu ndila yatse-e nme-e a-njünkeho nyu ndi lati.

⁸“Hokebin kanyu yü nya. Anyugun zen-o tyütsü nrün genyu dun nya.

⁹Kekvutsin Npugü, Israel Sunggigü, ale zotitse kebin gü hi nyülo. Ale shekerhün lo nkenyü khwenno nyü mvu la, lo senhü keho shekerhün khwen tsüe no ndila ti. Hinyu temi dan le yhun bin-o tsüle keryü shati.

¹⁰“Nle hi rüle aphu pe anyugun ka zoshülo anyugun le nka nyuthyüo ale shaja ketsen pe anyugun tsü titse rhilayo shün ti. Anyugun nyunka thyüzü la lo nyu kemu thyüpe anyugun Npugü Sunggigü kenyükemvu thyülayo shünti.

¹¹Tsonlo anyugun ka Npugü le hihontse zoshüla sele tse zota, ‘Hagun bon nyu le akipon ranio tero kecha rüshvu lo tsüdan lothyü tin la. Anyugun le akhelao ale senthyü keshü jodan nyü mvula.

¹²Ai hagun we hagun bon nyu nyeki gwamvu kvu laso. Hagun aphu hagun nyunrü lo gwamvu, lo ajo zen mvulaso.

¹³Tsügenyu ale hagun shwe pe hagun bon nyu lo hagun-e shahü kemvu kazü ki shü lati. Tson-o tsünyu khejekhenyütsen tero kecha dan lothyüti, lo ale hagun shwi njün shüloho.’ ”

¹⁴Npugü le zo, “Temi dan le ale Ijipt nyu kazü nyu Israel zen chwikeryü kerhün Sunggigü letse swen mvu kela jon le ryüti.

¹⁵Tsü sunka, ale hükezen pe teso kipon lo kazü lika hikae shü kela nyu aphu ale Israel zen chwiryü kelo kerhün Sunggigü letse swen tin lati. Ale anyugun zen niryüo ale khipe anyugun bon nyu ketsü kazü nyu shü lati. Ale Npugü, tsü zo laso.”

¹⁶Npugü le zo, “Ale temi hidan tünlola nrün genyu meke tünyu kechon nishübin. Tsüsika alo thyükehü nyu kechon ni shüo no kazüthun lo rincho gen lo tsonye ki thakü nyue tsü dan hüti.

¹⁷Ale anyugun tho aphu hyu hü nle. Thame-e aka kebulo hümvu; anyugun kemu le ayhü ka kebu loho.

¹⁸Ale anyugun no anyugun kemu lo gwakemvu chün jünhvu thoti, kechamvule anyugun le kerhün kendi simin hontse kethyü teromen kezü pe akazü nrhula, lo ketsin kemvu tero pe sükela genyu.”

¹⁹Npugü, nle a nopen lo kenko pe atsü kehü güle; nle kenjün kethyü gwünkho kae acheshü hü. Kazü keniki-e temi le ryüo hihontse zoti, “Agun bon nyu le ketsin kemvu tero lo lihi kemvu teromen kezü nyeki thame ndile.

²⁰Nmele a-npvü a-tero thyülo gwa ole? Tsonlo hümvu, a-le tson shülo tsüdan le tero ketsin kemvuso.”

²¹Npugü le zo, “Tsügenyu ale gwengwa thyü tsipwen aphu no akekvu lo kenko shalo ti; anyugun le ale Npugü letse shalo lati.”