Read Southern Rengma Naga JEREMIAH 17 Bible Online

JEREMIAH 17 - Southern Rengma Naga bible

JEREMIAH 17

¹Npugü le zo, “Juda, tegi kezüi pe nkemu zü laso; hira rakentsen lope nnyun ki rhope bin laso, lo nkerüshvubin quen ki zü laso.

²Ntemi ju le rinchothun gen, senbin aphu nyu Asherah terogi men kezü pe shükenjü kershvubin ki rüshvu hünyo,

³lo lowjvu lika hikae kazüthun dan gen tson hünyo. Hagun le hagun kazü aphu nyu kemu thyükela dan aphu genyu ale hagun kenrhinyu no hagun kenya lo kebin dan sentin lati.

⁴Hagun le ale khipe hagun ketsü kazügü tsü khe lati, tson-o ale hagun no shakemvu bin ki hagun kenrhinyu chünlo thyüti, kechamvule anyunkenta le mah hontse, lo tsüle kethonthen roti.”

⁵Npugü le zo, “Akipon ranio a-ketenyen khipe temi gen shü lo sila nrün temi kenko tenyen tin kelanyu, ale tsügü nmuti.

⁶A-le kazü kesi ki tehen yhun hü kemvu ki kazü kesin lo kenyün binki tehen nme hontse. Tha kegwa thame a-gen binlo hümvu.

⁷“Ai atenyen kehügü we jochü pe tsüti.

⁸A-le rinyu khoka senbin le yhun-o a-me no zü nyuki ntsen kebin hontse. Tsüle tsang kenyün le ryüe nshvu hümvu. kechamvule a-nyüdan le njvü bin hü; tsüle tsangri kemvu kae nyun kenkhi ndi; tsüle nshazin lohü.

⁹“Segü le temi nyun shalo mon? Nnyun hontse nsala kehü kecha ndi; tsüle gwamvurio ponlo keho nme.

¹⁰Ale Npugü, temi nyun keseü lo kegwakeshvu nri hünyo. Ale temi nmeme tse a-le yhunkehü hontse thyüshü hünyo, a-tho hontse pe tsü hünyo.”

¹¹Ketsinkemvu nyu pisa hyulo kehü güle tegü nme le a-npvü nzü shü kemvu bün kehü hontseti. A-keyhun kegwa lvuka a-kenya ndi lati, lo kenkhinki a-le kepin nyu thyüo lihi kemvunyu thyü lati.

¹²Agun Kershvuka le binzen ka nyu kazüthun gen pensolo kela rajakhün kezegwa hontse.

¹³Npugü, nle Israel nyu kenringü, lo ligü higüe nkhekela gü khipe kejokepvü nyu shü lati. Anyugun le kemphü gen zan thu kenjü hontseo ndi lati, anyugun le Npugü kerhünzü bingü, khekela genyu.

¹⁴Npugü, athyü ngwa shü, tsonlo ale gwashü lati; a kenishwi shülo, tsonlo ale keniketsin thyü lati. Ale shwen kehügü tsüle nle le!

¹⁵Temi dan le akazo, “Npugü le agun kedün kehü jo le dikipon la? A-no tsüdan thyü shüta!”

¹⁶Ai Npugü, ale nno kenke tsüdan senryüo anyugun gen shülo tse hü mvule. Ale kenjünkethyü no anyugun gen ryülo tse nnyüe mvu. Npugü, nle tsüsha, lo ale nyu zoyo nle tsüe shale.

¹⁷Aketsun nyalo; kenjünkethyü le keryüka nle aketesun bin güle.

¹⁸Kejokepvü senryüo a nthyü nnyü kehünyu gen shüta, ai nwe a nrho shülo, Npugü. Kenshvu pe anyugun süshü, ai aketsun nya, kenke senryü anyugun tsüo boshwen lata.

¹⁹Npugü le aka zo, “Jeremiah, gülo, tson-o ajo lope Temi dan Khinrungü, Juda rajanyu le yü lo chwi kehü bin nyu senshü; tsü sika Jerusalem Khinrun aphu nyu gülo.

²⁰Raja dan, Juda nyu aphu lo Jerusalem nyu yhun-o Khinrun higü nyu yü kehünyu aphu no ale zokeshü jo nyü lo lotse zoshülo.

²¹Anyugun le anyugun keyhun tepen hü yatselo Sabbath jon nyü khvu lihi-e pvünya; anyugun no khvu lihi-e pvüo Jerusalem Khinrun nme nyue chwinya

²²nmvue Sabbath jon nyü tha thyü nya; ale anyugun bon nyu ka johokeshü hontse anyugun le tsü lope kenshün jon nme hontse then mvu loshvu.

²³Anyugun bon nyu le akhwen nyü mvu nmvue ajo rüchün mvu. Tsonkethyü gü mvule anyugun nyun rüla; anyugun le ajo zenmvu lo aka thae shalo nyü mvula.

²⁴“Temi hidan ka anyugun le ajohokeshü aphu zen mvuloshvu letse zoshü. Anyugun no Sabbath jon nyü khvü thame pvüo Jerusalem Khinrun ka chwinya. Anyugun no Sabbath lope jon kenshün nme thyüo then lo tsünyü thame thyülo shvu.

²⁵Tsüsika raja dan lo rajanyu dan le Jerusalem Khinrun nyu yüo David le sen keryü hontse raja kekvu senti. Juda lo Jerusalem temi kengüo kerugari lo keru dan gen tinti, lo Jerusalem nyida le azin tse temi le keswü thyü lati.

²⁶Juda rünyi lo Jerusalem tekehun nyishen dan ka temi le ryüti; tsüdan le Benjamin kazü nyu, Kazüthunpha kipon, kazüthun ki lo Juda tesinzin temi le ryüti. Anyugun le, rotho, thape kershvu, shyeni lo tharün kenyü lo chekeno kershvu dan sen-o a Kershvuka nyu ryüti.

²⁷Anyugun le ajo zen lo Sabbath lope kenshün jon nme thyüo zen mvuloshvu. Anyugun no tsü jon nyü thame pvüo Jerusalem Khinrun nyu chwinya, anyugun le tsonlo ale Jerusalem chwida ka mah pe shü lati. Mah le Jerusalem nyu raja bin aphu ro lao nme-e tsü bokemhü lo nrün ndi lati.”