Read Southern Rengma Naga JEREMIAH 18 Bible Online

JEREMIAH 18 - Southern Rengma Naga bible

JEREMIAH 18

¹Npugü le aka zo,

²“Nnyonla kethyü gü ka ki nshyelo, tsü nyu ale jolo khishüti.”

³Tson-o ale nshye laryü lakethyü gü le la kenjwen bin gen la njwen kebin hyu.

⁴A-le thyü kebin lagü le gwamvula yatselo a-le tsügü lope kecha nme thyü nila la tse bin.

⁵Tsüsika Npugü le aka zo,

⁶“La kethyü güle lakethyü tsü hontse ale Israel temi zen-o tsonlo kegwa akenjü ndi ole? Gin le lakethyügü ben nyu kebin hontse hagun ko aben nyu bin.

⁷Keshanyu laka ale tsipwen nmvue keda peha phüla, boshwenla nmvue nkela titse zoshü,

⁸ai tsipwen tsügü le gwakemvu nyu ranila lo ale thyü titse kebingü tsü thyü mvu lati.

⁹nmvue ale tsipwen lo keda binzen lo pensoshü titse zoshü,

¹⁰ai tsipwen tsügü le akhwen nyü mvula lo ale thyü titse zokenjü gü tsü thyü mvu lati.

¹¹Tsügenyu Juda lo Jerusalem temi dan ka ale anyugun ntsun nrün rhibin lo shaja pe tsüti tse ndola seletse zoshülo. Anyugun no kemu nyu keyhun jvü tsü khelao anyugun tho lo anyugun tson kelulo lotse zo shülo.

¹²Anyugun le, ‘Nmvu le, agun le nyuthyüo tson bin mon? Agun aphu agun nyun rü lo gwakemvu tsü thyü binti,’ ” tse zoti.

¹³Npugü le zo, “Tsipwen aphu ka tha hihontse kethyü hile thyüla sele nmvuyo shün shwilo. Israel temi dan le ketetsin tho thyü laso!

¹⁴Lebanon tsonye ketetsodan tsüle khütso ndi hü ole? Kazüthun kekun tsünyu rinyu dan le sinla hü ole?

¹⁵Ai atemi dan we a nmhinla-o; tharün kenyi rope teromen kezü tsü. Anyugun le gü mvulokeshvu tson nyu tsü pha nsü laso, anyugun le tsonwhengü thensin mvu la; anyugun le tsonba nme ki gübin laso.

¹⁶Anyugun le anyugun kazü thyüpe kentsü kenchen thyü laso, kethonthen-e ntsükelai thyü laso. Tsü pvüthü kegü nyu aphu adunthyü ti; anyugun dunthyüo anyugun pe pfükezen ti.

¹⁷A temidan lope npho kipon tsangkenbu le kenphü whün sen kehü hontse kezen pe anyugun kenrhinyu mhundyü shü lati. Ale anyugun nrimvu lao, kenke le ryüe anyugun che mvu lati.”

¹⁸Tsüselo temi dan le zo, “Ngun Jeremiah genyu tha peha thyü tile! Azin tse ngun tsontsin nrün püshükedanyu le binti, thakeshanyu no ngun senthyü, lo sidyükeshanyu no Sunggigü jün zo tseti. Ngun a-kentsun jodan senryü, lo a-jo gü nyü sin mvula tile.”

¹⁹Tsügenyu ale hio hihontse zo, “Npugü, ale zokebin hi nyü shü, lo akenrhinyu le agenyu tha zokebin tsüko nyü shülo.

²⁰Kegwa chün le gwakemvu ole? Tsonlo anyugun le ano chela nrün genyu chwen tso bin nyo. Tsügenyu ale nka ryüo anyugun sunka nno anyugun gen nnyunta mvu nrün genyu hikethyü tsü rüchün shüta.

²¹Ai ntsoka we anyugun nyenyu no khün sila lo anyugun no terinyu gala ta. Nyeginyu no anyepvü lo anyenyu ndila; pelüjü no kethyükenyü pvüo si lo selo dan no teri no gala lo.

²²Anyugun no shamvu tse temi nipe anyugun ka dan nkela lo; anyugun no kerükeshvu thyü chüta. Anyugun le ano chela nrün genyu chwenkü tso lo aminla nrün genyu a nsen.

²³Ai Npugü, anyugun le adushvula titse tedo rhi kethyü aphu nle sha. Anyugun gwakemvu nmhin nya nmvue anyugun kemu jüpe tsünya. Anyugun no kvulo mvula lo nyunta ketseka anyugun gen tha thyü shülo.”